Debleskri gili 145 - O Debleskro Drom 2021 (Sinte)

O Dewel atchell hako tsiro o baro rai

1 Kai gili kras o David te sharell lo o Debles.

¹ Kai gili kras o David te sharell lo o Debles. Me kamau tut te hadell, miro Debles. Tu hal o baro rai. Tut kamau me te sharell kanna un hako tsiro.

² Hako diwes kamau man pash tute te parkrell. Kanna un hako tsiro kamau tut te sharell.

³ Sorelo hi o baro Dewel un bud moldo, te well lo sharedo. Kek haiwell, har baro job hi.

⁴ Ninna mare tchawengre tchawe sharenn, hoi tu kral, un rakrenn pral tiro sorelo koowa.

⁵ Jon rakrenn pral tiro railepen un barepen. Un me mukau mange an o shero te well, hoi tu kral un hoi kek wawar nai krella.

⁶ Jon rakrenn pral tiri soor, hoi jaake baro hi, te well men daar. Un me rakrau pral tiro railepen.

⁷ Jon sharenn tiro baro latchepen, un giwenn pral tiro tchatchepen.

⁸ Latches hi o baro Dewel un krell i menshenge peskro dji pre. Job well gar sik chojedo. Un leskro kamlepen hi baro.

⁹ O baro Dewel hi latches ap hakeneste. Un krell peskro dji pre halauterenge, kolen job kras.

¹⁰ Kolla lauter, kai tu kral, mu sharenn le tut, baro Dewel, mu parkrenn pen pash tute kolla, kai tire hi,

¹¹ un sharenn, hawo railo un latcho baro rai tu hal. Mu penenn le, har baro tiri soor hi,

¹² te shunenn i tsele menshe, hawo baro koowa tu kral, un hawo railo un latcho rai tu hal pral mende.

¹³ Tu hal un atcheh o baro rai kanna un hako tsireske. O baro Dewel rikrell peskre tsele laba, un hi latcho an halauter, hoi krell lo.

¹⁴ O baro Dewel rikrell hakenes, kai perell, un hadell hakenes pale pre, kai tele dino hi.

¹⁵ Menshe un vieche denn jak ap tute, te dess len pengro chapen ap o tchatcho tsiro.

¹⁶ Tu kreh tiro latcho wast pre, un deh lauteren, hoi djiwenna, jaake bud te chal, te wenn le tchalo.

¹⁷ An lauter, hoi o baro Dewel krell, djal lo pal o tchatchepen. An lauter, hoi krell lo, hi lo latcho.

¹⁸ O baro Dewel hi gar dur hakenestar, kai dell les an-gole, hakeneske, kai dell les an-gole an o tchatchepen.

¹⁹ Kolenge, kai o djijestar ap leste shunenna, krell lo, hoi jon mangenna, un shunell, har denn le gole, un well ap lengri rig.

²⁰ Kolla, kai les o djijestar kamenna, pral kolende rikrell lo peskre wasta. Kolla, kai tchilatcho koowa krenna, mukell lo te merell.

²¹ Miro mui te sharell o baro Debles! Lauter, hoi djiwella, mu sharell koles, kai kokres o tchatcho Dewel hi, – kanna un hako tsiro!