Debleskri gili 132 - O Debleskro Drom 2021 (Sinte)

O Debleskro kheer ap i berga Zion

1 I gili te giwell ap o drom an Jerusalem.

¹ I gili te giwell ap o drom an Jerusalem. Baro Dewel, ma biste o Davides un ko tselo pharo koowa, hoi lo ap peste las.

² Job das pes sowel glan tute, o Jakobeskro sorelo Debleste, un penas:

³ “Me djau gar an miro kheer, un tchiwau man gar tele an miro tchiben,

⁴ pandau gar mire jaka, te sowap gar dren,

⁵ bis te hatsom i platsa o baro Debleske, un krom i kheer o Jakobeskro sorelo Debleske.”

⁶ Har hams an Efrata, shunam kai o sonakaskro mochton hi, ko sikepen, kai o Dewel khere hi. Kowa hatsam mer pash o foro Jaar.

⁷ Awenn, mer djah an leskro kheer, un perah tele glan o stamin, kai tchiwell lo peskre herja pre.

⁸ Baro Dewel, ste pre, un dja pash koi platsa, kai khere hal, tu un ko mochton, hoi men tiri bari soor sikrell.

⁹ Tchip o tchatchepen pral tire rashaja har i ripen! Mu denn tire menshe gole i bachtjatar!

¹⁰ Tu rodal o Davides win, te well lo baro rai. Ma bitche les tutar krik, tiro budepaskres!

¹¹ O baro Dewel das o Davideste i sowel, un job lell koi sowel gar pale. Un job penas: Me rodau jekes tire tchawendar win, te well lo baro rai pal tute.

¹² Te rikrenn tire tchawe ap mande un mire laba un krenn, hoi me lenge penau, palle wenn ninna lendar bare raja, jaake te well hako tsiro jek tire tchawendar baro rai.

¹³ O baro Dewel rodas peske i berga Zion win. Un leske hi shukar te djiwell lo kote.

¹⁴ “Kaja hi i platsa, kai khere hom hako tsiro” penell lo. “Kate kamau te djiwell.”

¹⁵ Me dau i menshen an o foro Jerusalem lauter, hoi len hunte well djipaske. Ninna i tchorwelende, kai kote djiwenn, dau doha chapen.

¹⁶ Lengre rashajenge dau an o dji, te penenn le miro latchepen dureder. Un kol menshe, kai mire hi, denn gole i bachtjatar.

¹⁷ Kote well jek o Davideskre tchawendar i sorelo baro rai. Ko baro rai, koles mange wi-rodom, well i menshenge har i momeli, hoi hako tsiro chatchella.

¹⁸ Leskro railepen well baro un bareder. Un ap kolende, kai leske tchilatchepen kamenn, tchiwau bari ladj.