Debleskri gili 12 - O Debleskro Drom 2021 (Sinte)

I ropen pral kowa, hoi i tchilatche krenna

¹ I gili o Davidestar te giwess lat pash o bashepen ap i ochta-dorjengri bashepaskri.

² Baro Dewel, ab ap miri rig! Tire menshe hi buder gar bud. Awa, kolla, kai patsle hi mank i menshende, hi gar bud.

³ Hakeno chochell o wawares. Jon rakrenn dui tchipjentsa un dran dui djia.

⁴ Baro Dewel, kre, te rikrenn le pengre muja, kolla, kai rakrenn dui tchipjentsa! Pande kolenge o mui, kai jaake bares rakrenna,

⁵ un penenna: “Mer haiwah te rakrell. Maro rakepah ham soreles. Koon hi o pralstuno pral mende?”

⁶ “Kanna”, penell o baro Dewel, “stau me pre. Ap i tchorwelende djan le sorjah. Me shunom lengro ropen. Kanna rikrau mire wasta pral hakeneste, kai peskro tselo djijeha kamell, te wap ap leskri rig.”

⁷ O baro Debleskre laba hi djudjo har rup, thodo an i jagakro bob efta kope.

⁸ Tu, mo baro Dewel, rikreh tiro lab, un rikreh tiro wast pral mende hako tsiro, te nai krenn kol menshe menge kek tchilatchepen,

⁹ ninna te nashenn kolla trujel, kai kamenn tutar tchi te djinell, un o tchilatchepen bareder well mank i menshende.