Debleskri gili 114 - O Debleskro Drom 2021 (Sinte)

Har i Israelitarja dran Egiptia djan, kras o Dewel baro koowa

¹ Har o Israel dran o them Egiptia win djas, har o Jakobeskre menshe kol menshen mukan, kolengro rakepen jon gar haiwan,

² koi was o them Juda kowa them, kai le o baro Debles an-mangan. Un o Israel was kowa them, pral koleste job o baro rai hi.

³ Har wan le pash o baro pani, nashas o pani peske. Har wan le pash o pani Jordan, djas o pani pale.

⁴ I berge stan har bakre, un i tikne berge har terne bakre.

⁵ “Tu baro pani, hoi his tuha, te nashal tuke, un tuha, tu pani Jordan, te djal pale?

⁶ Un tumer berge, hoi his tumentsa, te stan har i bakre? Hoi his tumentsa, tumer tikne berge, te stan har terne bakre?”

⁷ O baro Dewel his koi. Doleske was kowa jaake. Hakeno ap i phub hunte trissell glan o baro Debleste, ko Debleste o Jakobestar.

⁸ Job hi kowa, kai kras pani dran i baro bar, un mukas dran barra tikne panja te nashell.