Debleskri gili 102 - O Debleskro Drom 2021 (Sinte)

I bibachtelo dell gole ap o Debleste

¹ I mangepen jekestar, koleske gar mishto djal, un koles buder kek soor hi, un kai glan o baro Debleste peskri dji win tchorella.

² Baro Dewel, shun miro mangepen! Shun, har dau ap tute gole!

³ Ma dja krik mandar ap kau diwes, kai mange ropaske hi! Risse tut pash mande ap kau diwes, kai ap tute gole dau! Shun man sik!

⁴ Mire diwessa djan trujel har i tampa hoi djal dran i jag pre. Mange hi tato, har wals i jag an mande.

⁵ Miro dji hi phagedo, un les hi buder kek soor jaake har o khass, hoi tele dino was. Bistrau ninna miro maro te chal.

⁶ Me hom jaake sano, kai nai dikeh i kokale, jaake bud rowau un dau gole.

⁷ Me wom har i diwjo tchirklo an o mulo them, har i ratsjakro tchirklo, hoi djiwell mank i barra i paash-dino forestar.

⁸ Rati sowau gar, dau gole har i tchirklo, hoi kokres hi un pral ap o kheer beshdo hi.

⁹ Hako diwes sanenn kolla pral mande, kai kamenn mange tchilatchepen, un praassenn man.

^10-11 An tiri choli dal tu man trad, hadal man pre un witsral man pale tele ap i phub. Doleske chau jagakri tchik har maro. Un mire swa perenn an miro pipen.

¹² Miro djipen djal peske har o diwes, te well i rat, har o khass, hoi tele merell an o kham.

¹³ Tu, baro Dewel, atcheh hake tsirenge, tut denn le an-gole an ko tsiro, hoi wella.

¹⁴ Ste pre un ab pale kamles ap i menshende an o foro Zion. O tsiro was, te less lengri doosh lendar krik. Kanna hi o tchatcho tsiro kai.

¹⁵ Tire budepangre kamans, te well o foro newes kerdo. Lenge hi ropaske pral i barra ko tele-phagedo forestar.

¹⁶ I menshe an i tsele themma trashenn palle glan tute, o baro Debleste. Un i tsele bare raja ap kai phub witsrenn pen tele glan tiro railepen.

¹⁷ O baro Dewel tchiwell o foro Zion pale pre, un mukell pes te dikell an peskro railepen.

¹⁸ Job shunell o mangepen kolendar, hoi muklo wan. Ap lengro mangepen dikell job latches.

¹⁹ Tchinenn kal laba pre kolenge, kai pal mende wenna, jaake te sharenn ninna kolla menshe o baro Debles!

²⁰ O baro Dewel dikas pral tele dran o pralstunepen, kai lo khere hi. Dran o bolepen dikas lo tele ap i phub,

²¹ te shunell lo o ropen kolendar, hoi stilde hi, te krell lo i shelle pre kol menshendar, kai an o merepen hi.

²² Jaake te sharenn le o baro Debles ap i berga Zion, an o tselo foro Jerusalem hadenn le leskro lab,

²³ ap ko tsiro, kai wenn menshe dran i tsele rajengre themma kote khetne, te mangenn le o baro Debles an.

²⁴ Har homs gar dureder har mashkral ap miro drom, phagas job miri soor, mukas man sikeder phuro te well.

²⁵ Me penom: Mo Dewel, le man gar krik ap o paash drom miro djipastar! Tiro djipen herell gar pre, an kek tsiro.

²⁶ Tu kral i phub glan rah tsirja, un tire wasta kran o bolepen.

²⁷ Jon atchenna gar. Tu hal kowa, kai atchella. Jon wenn phuro un djan paash har i ripen. Tu tchiweh len ap i rig har phure ripja un leh tuke newe. I phure hunte djan penge.

²⁸ Tu atcheh jaake har tu hal, un djiweh hako tsiro.

²⁹ Mare tchawen mukeh tu an o them te djiwell, un ninna lengre tchawe wenn bares glan tute.