Debleskri gili 101 - O Debleskro Drom 2021 (Sinte)

Jaake hunte wals i baro rai

1 I gili o Davidestar.

¹ I gili o Davidestar. Pral o latchepen un o tchatchepen kamau me te giwell. Tut, mo baro Debles, kamau me te sharell.

² Me dau jak, te djap o tchatcho drom. Kamau te wess pash mande. I djudjo djijeha djiwau khetne lauterentsa an miro kheer.

³ Rikrau man pale te krap chocheno koowa, un kamau gar khetne te well kolentsa, kai bango koowa krenn. Sawo koowa kamau gar glan i jaka te dikell.

⁴ Kones i chocheno dji hi, kowa hunte djal peske mandar. I tchilatchen kamau me gar te prindjrell.

⁵ Koon rakrell tchorchanes djungelo koowa pal o dumo kolendar, kai trul leste hi, koles pandau leskro mui. Kamau koles gar, kai pre-phurdo hi, un ap wawar menshende tele dikell.

⁶ Mire jaka rodenn pal kolende an o them, kai rikrenn pen ap tire laba, te djiwenn jon pash mande. Kolen, kai o tchatcho drom djan, lau me pash mande, te budrenn le mange.

⁷ Kolla, kai rakrenn dui tchipjentsa, nai atchenna gar an miro kheer, un i chochene hunte djan mange dran i jaka.

⁸ Hako diwes tchiwau i tsele tchilatchen an o them pale. Kolen, kai i wawaren tchilatchepen kran, mukau buder gar an o baro Debleskro foro te djiwell.