Debleskri gili 10 - O Debleskro Drom 2021 (Sinte)

Mo Dewel, hoske hal tu jaake dur mandar?

¹ Baro Dewel, hoske hal tu jaake dur mandar krik? Hoske khatreh tu tut mandar an o tchilatcho tsiro?

² O tchilatcho hi pre-phurdo un lell i tchorwelen palla, un krell lentsa ko tchilatcho koowa, hoi leske an leskro shero trujel djal.

³ Job sharell pes pral kowa, hoi lo kamell te krell. Un kowa, kai i meen gar pherdo lell, praassella o baro Debles un sal pral leste.

⁴ O tchilatcho rikrell o nak pral un penell peske: O Dewel putchell gar palla. Lauter, hoi leske an o shero trujel djala, hi: Dell kek Dewel.

⁵ Lauter djal leske, har job kamella. Te deh tu leste i phagi, patsell lo kowa gar, jaake dur hal tu lestar krik. Job tchungrell ap lauterende, kai leske an o drom tardo hi.

⁶ Job penell peske an peskro dji: Tchi nai witsrell man trujel. Kek bibacht well ap mande.

⁷ Job koshell, chochell un dell trad. Leskro rakepen anella duka un bibacht.

⁸ Khatemen pal i khera hi lo beshdo, un tchorchanes dell lo kolen mulo, kai ap lende kek doosh hi. Leskre jaka djan o tchorweleske palla.

⁹ Tchorchanes khatedo har i lewo an i burra, jaake lurell job ap o tchorweleste, un taprell les an peskri netsa un tserdell les krik.

¹⁰ Job djal tele ap i tchanga un stell ap o tchorweleste, un peskri sorjah witsrell lo les an i tchik.

¹¹ An peskro dji penell lo peske: “O Dewel djinell kowa gar. Job das gar jak pre un dikell tchi.”

¹² Ste pre, baro Dewel! Mo Dewel, hade tiro wast! Ma biste i tchorwelen!

¹³ Hoske nai praassell tut kowa, kai kamell tutar tchi te djinell? Hoske nai penell lo an peskro dji: “O Dewel putchella gar palla.”

¹⁴ Tu dikal les. Tu deh jak ap kolende, kolenge le o djipen phares krenn, un djineh lengre duka, un leh lengro koowa an tiro wast. Awa, i tchorwele tchiwenn pengro djipen an tiro wast. Tu hal ap i rig kolendar, kolen kek dad buder hi.

¹⁵ Phage i soor kol tchilatchendar un midjak menshendar, hoi len pral i wawarende hi! De len pengri phagi, te krenn le buder kek tchilatcho koowa!

¹⁶ O baro Dewel hi o baro rai kanna un hako tsiro. Kolla, kai gar ap leste patsenna, djan penge dran leskro them.

¹⁷ Kowa, hoi i tchorwele tutar mangenna, shuneh tu, mo baro Dewel. Tu kreh lengro dji sorelo, un tiro kand hi lenge pre.

¹⁸ Un tu deh o tchatchepen i tchorwelenge un kolenge, kai len kek dad buder hi, jaake te nai krell buder kek mensho i wawarenge daar ap kai phub.