Čačepangre 1 - O Debleskro Drom 2021 (Sinte)

O Israelengro kurepen i menshentsa an o them Kanaan

¹ Un har o Josua meras, putchan i Israelitarja o baro Debles: “Koon mendar djal glanstunes an o kurepen i menshentsa an o them Kanaan?”

² Un o baro Dewel penas: “I mursha dran o kheer Juda djan pre. Me dom ko them an lengro wast.”

³ Koi penan i mursha dran o kheer Juda ap pengre phralende an o kheer Simeon: “Awenn mentsa pre an ko them, hoi menge well. Un mer khetne marah i Kanaanitarja koi. Un palle kamah mer tumentsa an ko them te djal, hoi tumenge well.” Un i mursha dran o kheer Simeon djan khetne i murshentsa dran o kheer Juda.

⁴ Un i mursha dran o kheer Juda djan pre, un o baro Dewel das i Kanaanitarjen un i Perisarjen an lengro wast. Un pash o foro Besek maran le 10.000 (deesh-serja) mursha.

⁵ Un jon hatsan lengro baro rajes, o Adoni-Besek an o foro Besek un kuran pen leha, un maran i Kanaanitarja un i Perisarja.

⁶ Un o Adoni-Besek nashas peske. Un jon lan les palla, un tapran les, un dan leske i pesse gushte leskre wastendar un i bare tsebe leskre pirendar tele.

⁷ Koi penas o Adoni-Besek: “Efta-deesh bare rajenge mukom i pesse gushte lengre wastendar tele te dell un ninna i bare gushte lengre pirendar. Un jon hunte chan, hoi miri chapaskri tele peras. Un jaake har me les lentsa krom, jaake das les man o Dewel pale.” Un jon anan les an o foro Jerusalem. Un kote meras lo.

⁸ Un i mursha dran o kheer Juda maran pen ko foreha Jerusalem un lan les dren. Un jon dan kolen o chareha temerl, kai kote djiwan, un chatchran o foro pre.

⁹ Pal kowa djan i mursha dran o kheer Juda tele, te kurenn le pen kolentsa an o them Kanaan, kai ap i berge djiwenn, un kote kai o kham pralstunes tardo hi, un kolentsa, kai an o telstuno them djiwenn.

¹⁰ Un palle kuran le pen kolentsa an o them Kanaan, kai an o foro Hebron djiwenn. – Un ko foro kharas glan ko tsiro Kirjat-Arba. – Un jon dan i familjen Sheshai un Ahiman un Talmai un his sorleder har jon.

¹¹ Un jon djan dureder un kuran pen kolentsa, kai an o foro Debir djiwenn. Un ko foro kharas glan kowa Kirjat-Sefer.

¹² Un o Kaleb penas: “Koon Kirjat-Sefer kurell un dren lell, koles dau miri tchat Achsa, te well li leskri romni.”

¹³ Kote las o Otnijel o foro dren. Koleskro dad his o Kenas, koleskro phureder phraal his o Kaleb. Un o Kaleb das les peskri tchat Achsa, te well li leskri romni.

¹⁴ Un har li pash o Otnijel was, rakras lo lake an o dji, te mangell li lakro dadestar jek kotar phub. Un joi stas peskri burika tele. Koi penas o Kaleb ap late: “Hoi hi tut?”

¹⁵ Un joi penas ap leste: “De man latchepen! I phub, hoi tu man dal, kote kai o kham pralstunes hi, hi gar sapeno. De man ninna i them, kai panjengre hi!” Un job das lat pestar kol panja, hoi kharenna pralstuno pani un telstuno pani.

¹⁶ Un i Kenarja, – lengro phuro dad his o Moseskri romjakro dad, – kolla djan win dran o palmtikro foro un djan khetne i murshentsa dran o kheer Juda an o mulo tato them, hoi pash o foro Arad tchiddo hi, ap i tchatchi rig. Un jon atchan kote un djiwan mashkral kol menshende.

¹⁷ Un i mursha dran o kheer Juda djan peskre phralentsa dran o kheer Simeon dureder un maran i Kanaanitarja an o foro Zefat, un dan lauteren mulo, un dan ko fores o lab Horma.

¹⁸ Un o Juda las ninna i forja Gaza, Ashkelon un Ekron dren un o them, hoi koi pashel his.

¹⁹ O baro Dewel his i murshentsa dran Juda. Doleske las o Juda o pralstuno them dren. Kolla, kai an o telstuno them djiwan, len his sasterne wurdja o kurepaske. Doleske nai tradan le len gar win.

²⁰ Un jon dan o foro Hebron o Kaleb, jaake har o Mose kowa lenge penas. Un job tradas kotar kol triin familjen win, kolengro phuro dad o Anak his.

²¹ An o foro Jerusalem djiwan i Jebusarja. Un i mursha dran o kheer Benjamin tradan len gar win. Jaake atchan i Jebusarja pash i Benjaminarja an o foro Jerusalem, un djiwenn gomme kau diwes koi khetne.

²² Ninna i mursha dran o kheer Josef djan pre pash o foro Betel, un o baro Dewel his lentsa.

²³ Un jon bitchran tchorchanes murshen an o foro dren, te dikenn le pen dren trujel. Ko foro kharas glan ko tsiro Lus.

²⁴ Un kolla dikan i murshes dran o foro win te well, un penan ap leste: “Sike men, har nai wah mer an o foro dren, palle krah mer tuke tchi.”

²⁵ Kote sikras job len, har nai wenn le an o foro dren. Un jon maran o tselo foro o chareha. Ko murshes un leskre menshen mukan le te djal.

²⁶ Un ko mursh djas an o them, kai i Hetarja djiwenn. Un kote kras job i foro, un das ko fores o lab Lus. Un jaake kharell ko foro gomme kau diwes.

²⁷ I mursha dran o kheer Manasse tradan gar i menshen krik dran i forja Bet-Shean, Taanach, Dor, Jibleam un Megiddo, witar gar dran i gaba pash kol forja. Jaake atchan i Kanaanitarja an ko them un djiwan kote.

²⁸ Un har i Israelitarja soreles wan, kran le, te wan i Kanaanitarja lengre budepangre, kai lenge phares hunte budran, – win tradan le len gar.

²⁹ Ninna i mursha dran o kheer Efrajim tradan i Kanaanitarjen gar krik, kai djiwenn an o foro Geser. Un jaake atchan i Kanaanitarja un djiwan mashkral lende an o foro Geser.

³⁰ Ninna i mursha dran o kheer Sebulon tradan gar kol menshen krik, kai an i forja Kitron un Nahalal djiwenn. Un jaake atchan i Kanaanitarja kote un djiwan mashkral lende. Un jon kran lendar budepangre, hoi lenge phares hunte budran.

³¹ I mursha dran o kheer Asser tradan i menshen gar krik, kai djiwenn an kol forja Akko, un Sidon, un Ahaleb, un Achsib un Helba un Afek un Rehob.

³² Doleske djiwan i menshe dran o kheer Asser mashkral i Kanaanitarja, kai kote khere his. Wi tradan le len gar.

³³ I menshe dran o kheer Naftali tradan kol menshen gar krik, kai an i forja Bet-Shemesh un Bet-Anat djiwenn. Na-a, jon djiwan mashkral kol Kanaanitarja, kai kote khere his. Un kolla wan lengre budepangre un hunte budran lenge phares.

³⁴ Un i Amorarja tradan i menshen dran o kheer Dan pale an i berge, un mukan len gar tele te well an o telstuno them.

³⁵ Un i Amorarja atchan ap i berge, hoi kharenna Heres, un mukan pen gar krik te tradell, un atchan jaake an i forja Ajalon un Shaalbim. Pal i tsiro was o kheer Josef sorleder har jon. Un jon wan lengre budepangre, un hunte budran lenge phares.

³⁶ O them, kai i Amorarja djiwan, djas pral i berga Akrabbim bis pash ko foro Sela, un kotar dureder pral.