Bičepangre 10 - O Debleskro Drom 2021 (Sinte)

O Petro un o Kornelio

¹ An o foro Cesarea djiwas i mursh, ko kharas Kornelio. Kowa his i Remarjengro pralstuno pral sheel lurdende. Kolen kharan le i lurde dran Italia.

² Kowa his i latcho mursh un patsas ap o Debleste peskre tsele menshentsa. Job das bud i tchorwelende, un mangas o Debles hako diwes an.

³ His i diwes. His trinenge. Koi dikas ko mursh i Debleskro bolepaskres, har kowa pash leste dren was. Ko bolepaskro penas ap leste: “Kornelio!”

⁴ Koles his daar, har job dikas les, un penas ap leste: “Hoi kameh tu mandar, rai?” Un kowa penas ap leste: “O Dewel shunas, har tu les an-mangal. Un job dikas ko latchepen, hoi tu kral i tchorwelenge. Un job bistras kowa gar.

⁵ Bitche kanna murshen an o foro Joppe, te anenn le o Simones pash tute. Kowa kharella ninna Petro.

⁶ Job hi an o kheer, kai ko Simon djiwella, kai budrell i viechengri mortsi. Leskro kheer hi pash o baro pani tchiddo.”

⁷ Har o bolepaskro peske djas, kharas o Kornelio dui budepangren un i patslo lurdes pash peste kolendar, kai his hako tsiro pash leste.

⁸ Kolenge penas job lauter, hoi o bolepaskro penas, un bitchras len an o foro Joppe.

⁹ O wawar diwes, har jon pash o foro Joppe wan, djas o Petro ap o kheer pral pre, te mangell lo o Debles an. His chapaskro tsiro.

¹⁰ Koi las job bok un kamas te chal. Har kran le leske i chapen, mukas o Dewel les tchomone te dikell.

¹¹ Job dikas, har o bolepen pre djas un tchomone pral tele was ap i phub. Kowa his har i bari plachta. Koja was ap hake star rigja rikedo.

¹² Koi dren his bud vieche: vieche star herjentsa, sapa, un tchirkle.

¹³ Un o Petro shunas, har jek penas: “Petro, ste pre, kre len mulo un cha!”

¹⁴ O Petro penas: “Na-a, miro rai! An miro tselo djipen chom me tchi, hoi pale-tchiddo hi.”

¹⁵ Un job shunas i duito kopo, har jek leha rakras un penas: “Ma kre pale-tchiddo, hoi o Dewel erligo kras!”

¹⁶ Kowa djas triin kope jaake. Palle djas koi plachta pale an o bolepen.

O Petro djal an i pale-tchiddo kheer

¹⁷ O Petro haiwas gar, hoske job kowa dikas, un putchas pestar, hoi kamas o Dewel leske te penell. Koi his i mursha, kai o Kornelio pal o Simoneskro kheer bitchras, glan o wudar tardo.

¹⁸ Jon dan gole un putchan: “Hi o Simon Petro pash tumende?”

¹⁹ Har djas o Petreske kowa an o shero trujel, hoi job dikas, koi penas o Debleskro Ducho ap leste: “Dik, triin mursha rodenn tut.

²⁰ Ste pre, dja tele, un dja lentsa! Pats, hoi jon tuke penenn! Me bitchrom len.”

²¹ Koi djas o Petro tele pash lende un penas: “Me hom kowa, kai tumer rodenna. Hoske han tumer kai?”

²² Penan le: “O Kornelio, ko pralstuno i lurdendar, bitchras men. Kowa hi i latcho mursh, un patsell ap o Debleste. I tsele bibolde rakrenn latches pral leste. I Debleskro bolepaskro penas ap leste, te lell job tut an peskro kheer, un te shunell job, hoi tu leske kameh te penell.”

²³ Un o Petro mukas len an o kheer te well, un das len i isema, te atchenn le kote. O wawar diwes djas job lentsa an o foro Cesarea. Un wawar patsle dran o foro Joppe djan ninna leha.

²⁴ O diwes koi pre was job an o foro Cesarea. Kote his o Kornelio peskre menshentsa un malentsa khetne. Job das len gole, te shunenn le halauter, hoi o Petro lenge penella.

²⁵ Un har o Petro dren was, djas o Kornelio pash leste, witsras pes glan leskre pire tele, un mangas les an.

²⁶ O Petro hadas les pre un penas: “Ste pre! Me hom i mensho har tu.”

²⁷ Un har jon jaake rakran, djan jon an o kheer, un hatsan bud menshen kote, kai khetne wan.

²⁸ Un o Petro penas ap lende: “Tumer djinenna, te hi kowa i biboldeske pale-tchiddo, te djal lo an o kheer dren, hoi gar i biboldeskro hi. Un kek wi-themari well pash i biboldeste an o kheer dren. Mande sikras o Dewel, te rikrap kekes pale-tchiddo.

²⁹ Doleske rikrom man gar pale, te wap pash tumende, har tumer man kharan. Me putchau tumendar kanna, hoi kamenn mandar.”

³⁰ Koi penas o Kornelio: “Glan star diwessa, his trinenge, mangom o Debles an miro kheer an. Koi his ap jek kopo i mursh glan mande tardo. Koleskre koola his bijalo.

³¹ Un job penas ap mande: Kornelio, o Dewel shunas tut, un hoi tu dal kol tchorwelende, dikas o Dewel ninna.

³² Kanna bitche murshen an o foro Joppe, te anenn le o Petres pash tute. Kowa hi an o kheer, kai ko Simon djiwella, kai budrell i viechengri mortsi. Leskro kheer hi pash o baro pani tchiddo.

³³ Un me bitchrom murshen pash tute. Un kowa his mishto, kai tu wal. Kanna ham mer lauter glan o Debleste khetne, te shunas lauter, hoi o Dewel, maro rai, tuke penas.”

O Debleskro Ducho wella ap kolende, kai kek bibolde hi

^34-35 Un o Petro penas: “Kanna haiwau me tchatchepah: O Dewel dikell gar koi pre, hawe menshendar jek wella: te well lo i biboldendar, – te well lo kolendar, kai kek bibolde hi. Job dikell latches ap hakeneste, kai mangell les an, un kai krell o tchatchepen.

³⁶ Job mukas i biboldenge o latcho lab te penell, te hi o Jesus Kristo kowa, kai anell len pash o Debleste. Job hi gar lengro rai kokres, na-a, job hi o rai pral halauter.

³⁷ Tumer djinenna, hoi djas an o them Galilea, un palle an o tselo them Judea pal ko tsiro, har kharas o Johanni i menshen, te mukenn le pen te taufrell.

³⁸ Tumer djinenn, har das o Dewel o Jesuseste dran Nazaret peskro Ducho un peskri soor. Un job djas trujel un kras latcho koowa, un kras lauteren sasto, kai o beng pandas. O Dewel his pash leste.

³⁹ Mer dikam lauter, hoi job an o biboldengro them un an o foro Jerusalem kras. Koles dan le ap o trushel, un maran les.

⁴⁰ Pal triin diwessa kras o Dewel les i mulendar djides. Un o Jesus mukas pes i menshendar te dikell.

⁴¹ Job mukas pes gar i tsele menshendar te dikell. Na-a. Men rodas o Dewel win, te dikas les. Un har job i mulendar djido was, cham un pijam mer leha. Kowa penah i menshenge, un kowa hi tchatcho.

⁴² Job penas menge, te penas mer i tsele menshenge, kai o Dewel rodas les win, te hi lo o tchatchepaskro rai, kai rakrell o tchatchepen win pral i tsele menshende, pral kolende, kai djiwenna, un ninna pral i mulende.

⁴³ Kolestar rakrenn i tsele Debleskre rakepangre an pengre lila. Jon penenn, kai lell o Dewel i doosh hakenestar krik, koon ap o Jesus Kristeste patsella.”

⁴⁴ Har o Petro jaake rakras, peras o Debleskro Ducho ap lauterende, kai les shunan.

⁴⁵ Kol patsle biboldenge, kai o Petreha wan, atchas o rakepen krik, har jon dikan, kai peras o Debleskro Ducho ninna ap kolende, kai kek bibolde hi.

⁴⁶ Jon shunan, har kol menshe an i wawar rakepen rakran, un o Debles sharan. Koi penas o Petro ap lende:

⁴⁷ “Kolla lan o Debleskro Ducho jaake har mer. Nai rikrah mer len pale, te mukenn le pen te taufrell?”

⁴⁸ Un job penas: “Mukenn tumen te taufrell, te sikrenn tumer, kai patsenn ap o Jesus Kristeste!” Pal kowa mangan le o Petres, te atchell lo triin, star diwessa pash lende.