Amos 9 - O Debleskro Drom 2021 (Sinte)

O them Israel djal paash

¹ Me dikom o Debles, maro rajes, tardo pash i chatchepaskri an peskro kheer. Un job penas: De ap o pralstuno kotar kol barrendar, kai hidjrenn miro kheer! De jaake soreles, te trissenn ninna i telstune barra, un o tselo kheer an kotja perella, un muk len te perell ap i sherja kal menshendar. Un hoi lendar pral atchell, kamau te marell o chareha. Kek nai nashell peske. Kek atchell djido.

² Ninna te paskrenn le pen tele pash i mulende, lau len kotar pre. Ninna te djan le pre bis pash o bolepen, anau len tele.

³ Ninna te khatrenn le pen pral ap i berga Karmel, rodau me len un lau len tele. Ninna te khatrenn le pen mandar tele an o baro pani, jaake penau o panjeskro sap, te dandrell lo len.

⁴ Ninna te djan le pandles an i wawar them glan kolende, kai pandan len, mukau len kote o chareha te marell. Me rikrau len an o jak, te krap len tchilatchepen, un kek latchepen.

⁵ O baro Dewel, ko rai pral o bolepen un i phub hi kowa, kai taprell i phub, te trissell li, un hadell pes un djal pale tele har o lengsto pani Nil an Egiptia. Un i menshe rowenn pral kolende, kai meran.

⁶ Job hi kowa, kai krell peskro kheer an o bolepen, un tchiwell peskro bolepaskro kheer pral i phub. Job dell o pani win gole dran o baro pani, un tchorell les ap i phub. Leskro lab hi ‘baro Dewel’.

⁷ O baro Dewel penell: Tumer Israelitarja han mange jaake har i menshe an o them Etiopia. Tumen lom dran o them Egiptia win, i Filistarjen lom dran o them Kreta win, un i Syrarja dran o them Kir. Hoi hi wawartchandes tumentsa?

⁸ Me, o baro Dewel hom o rai, un lau ko tselo tchilatchepen an o jak, hoi i menshe an o them Israel krenn. Doleske thowau les krik i phubjatar. Win lino wenn gar bud menshe, ninna te well gar o tselo kheer Israel maredo. Kowa penau me, o baro Dewel.

⁹ Me rakrau un kowa djal jaake: Jaake har djob an i sieba pal hake rigja witsedo well, un i djoba win perenn, un i barra dren atchenn, jaake krau, te well o kheer Israel pal hake rigja witsedo an kol themma, kai le tradedo wan.

¹⁰ I tsele tchilatche mire menshendar hunte merenn an o kurepen, lauter kolla, kai penenn: Koi bibacht atchell dur mendar un taprell men gar.

¹¹ O baro Dewel penell: Ap ko diwes krau o Davideskro kheer newes, kowa hoi kanna khetne peredo hi. Kote, kai lo paash hi, krau les tseles. Kote, kai barra win phagedo hi, tchiwau len pale pre. Me krau les jaake har lo glan bud tsiro his.

¹² Un jaake lenn i Israelitarja pale dren, hoi pral atchas o themestar Edom un kol wawar themendar, kolendar kai his mange, har o David lengro baro rai his. Kowa penell o baro Dewel, kai krella, te well kowa jaake.

¹³ Shunenn, penell o baro Dewel, o tsiro wella, kai well o djob jaake sik bares, te wenn i tchinepangre khetne kolentsa, kai i phub trujel witsrenn. Un jaake bud drake hi koi, te hi gomme gar i mool kerdo i tsele drakendar, har ko tsiro well, kai newo djob win witsedo well. Dell jaake bud drake, te nashell o mool i bare un tikne berge tele.

¹⁴ Me anau mire menshen Israel pale an lengro them. Un jon krenn i tele-phagede forja pale newes, un djiwenn koi dren, un tchiwenn drakengre ruka an i phub, un pijenn lengri mool, tchiwenn ruka an i phub un chan lengre rukengre.

¹⁵ Me anau mire menshen pale an lengro them, hoi lende dom. Un kek nai tserdell len dran lengro them win. Kowa penell tumaro baro Dewel.