Amos 4 - O Debleskro Drom 2021 (Sinte)

I lab i brawele romjenge an Samaria

¹ Shunenn kau lab, tumer romja i pralstunendar pral o foro Samaria! Tumer han har i thulle grumja ap i berge Bashan. Tumer krenn i tchorwelenge tchilatchepen, rikrenn i tiknen tele, un penenn ap tumare romende: Anenn menge mool, te pijas mer!

² O baro Dewel, maro rai, das pes sowel pash peskro lab: O tsiro wella, kai taprenn le tumen jaake har matche tapedo wenn i ranjentsa. Hakeno tumendar hi har i matcho ap i raan.

³ Jek pal i wawar hunte djan tumer mank i massuri win – kote kai li paash hi. Un jon tradenn tumen kote, kai i berga Hermon hi. Kowa penau me, o baro Dewel.

O Israel shunell gar ap o Debleste

⁴ Tumer djan pash o Debleskro kheer an o foro Betel, un hadenn tumen pral o Debleste! Tumer djan an o Debleskro kheer an o foro Gilgal, un hadenn tumen ninna budeder pral o Debleste! Krenn dureder jaake: Taissarla marenn viechen o Debleske, un o wawar diwes anenn leske o deshto kotar kolestar, hoi dren anan!

⁵ Anenn shutlo maro o Debleske, te parkrenn pen pash leste! Denn win gole, te anenn i menshe pendar tchomone o Debleske! Un palle denn win gole, hoi hakeno anas. Sawo koowa kamenn tumer jaake, tumer Israelitarja! Kowa penell o baro Dewel, maro rai.

⁶ Me hom kowa, kai bitchras i bok an tumare tsele forja. Ninna te his tumen gar doha chapen an o tselo them, wan tumer gar pale pash mande, penell o baro Dewel.

⁷ Triin tchon glan kowa kai anan tumaro djob dren, rikrom o brishin pale. Un me dom brishin ap jek foro un gar ap i wawar. O brishin peras ap jek hachetikri phub, un koi wawar phub, kai kek brishin das, meras tele.

⁸ Un i menshe dran dui, triin forja djan an i wawar foro, te hatsenn le pani. Un kote his gar doha lenge. Ninna palle wan tumer gar pale pash mande, penell o baro Dewel.

⁹ Me bitchrom i tato phurdepen un i nasslepen ap tumaro djob, jaake te meras o djob tele. Ninna chan i stepangre lauter, hoi bares was an tumari baar un an tumaro drakengro them, ap tumare faigetikre ruka un djeteskre ruka. Ninna palle wan tumer gar pale pash mande, penell o baro Dewel.

¹⁰ Me bitchrom sawo pharo nasslepen ap tumende, har bitchrom ap o them Egiptia. Me marom tumare terne murshen an o kurepen, un mukom tumare grajen pandles krik te anell. O khand kol mule lurdendar ap lengri platsa mukom an tumare naka te djal. Ninna palle wan tumer gar pale pash mande, penell o baro Dewel.

¹¹ His sawe forja pash tumende, kai krom jaake paash, har krom i forja Sodom un Gomorra paash. Un tumer hans har i kotar kasht, hoi was win tserdedo dran i jag. Ninna palle wan tumer gar pale pash mande, penell o baro Dewel.

¹² Doleske, tumer menshe an Israel, krau tumentsa pale jaake har krom! Djinenn, me wau tumaro tchatchepaskro rai, kai dell tumen tumari phagi.

¹³ O Dewel hi kowa, kai kras i berge, un mukell o phurdepen pral i phub te djal. Job sikrell i menshende, hoi kamell lo te krell. Job mukell o kham pre un tele te djal. Job hi o rai pral i tseli phub. Leskro lab hi: Baro Dewel, rai pral o bolepen un i phub.