4. Mose 36 - O Debleskro Drom 2021 (Sinte)

I tcha, kai lenn i kotar them, hunte romedinerenn jekes pengre menshendar

¹ Un i pralstune pral i menshende, kai wenn pal o Gilead, wan pash o Moseste. O Gileadeskro dad his o Machir, un leskro papo his o Manasse dran o kheer Josef. Kal pralstune rakran o Moseha un kol wawar pralstunentsa i menshendar Israel,

² un penan: “O baro Dewel penas tuke, maro rajeske, te well ko them i Israelitarjen jaake dino, har i bachtjakre barra sikrenn, te well kowa lenge. Ninna penas lo tuke, te dess ko them, hoi maro phrales, o Zelofhades his, leskre tchende.

³ Te romedinerell jek kol menshendar Israel i tchat o murshestar Zelofhad, well lakro them pash ko them kol menshendar lakro romestar. Un ko them mare phurendar well tikneder.

⁴ Te well kanna ko bersh, kai lell hakeno pale, hoi glan i tsiro leskro his, palle well ko them kol tchendar hako tsireske kol menshenge, kolendar lengre romma hi. Un jaake well ko them mare menshendar tikneder.”

⁵ O Mose penas i Israelenge, hoi o baro Dewel leske an kau koowa penas: Kol menshe dran o kheer Josef rakran o tchatchepen.

⁶ Kawa hi, hoi o baro Dewel rakras pral kol tchende o murshestar Zelofhad, hoi te kras mer. Job penas: Muk len romedinerell, har jon kowa kamenna. Kokres jek koowa hunte rikrenn le dren: Lengre romma hunte wenn kol menshendar lengro dadestar.

⁷ Kek them te perell koi jek bari familjatar ap i wawar familjate. Hako Israelitari rikrell ap peskro kotar them an o them kol menshendar peskro dadestar.

⁸ Un kol tsele tcha, kai lenn i kotar them mashkral kol menshende Israel, hunte romedinerenn jekes kol menshendar lengro dadestar, te rikrell hakeno mashkral kol Israelitarja ko them leskre phurendar.

⁹ Jaake djal kek kotar them kol jek menshendar ap i wawarende. Hakeno kol 12 bare familjendar an Israel hunte rikrell soreles peskro them.

¹⁰ Jaake har o baro Dewel kowa o Moseske penas, kran kol tcha o murshestar Zelofhad:

¹¹ I Machla, i Tirza, i Hogla, i Milka, un i Noa romedineran kol tchawen lengre kakendar.

¹² dran o kheer Manasse, koleskro dad o Josef his. Jaake atchas lengro kotar them pash kol menshende lengro dadestar.

¹³ Kalla hi kol tchatchepaskre laba, kai o baro Dewel o Moseske penas, te rikrenn pen i Israelitarja ap lende. Job penas len lenge an o telstuno them Moab pash o pani Jordan, wergel o foro Jericho.