4. Mose 34 - O Debleskro Drom 2021 (Sinte)

Jaake baro hi o them Kanaan

¹ O baro Dewel rakras o Moseha un penas:

² Pen ap kol Israelitarja: Djan an o them Kanaan! Ko them well tumenge jek rigjatar ap i wawar: Kolla hi i rigja:

³ Ap i tchatchi rig djal tumaro them bis pash o mulo them Zin un bis pash o them Edom. I tchatchi rig djal fun o Londo Baro Pani, kotar, kai o kham pre djal,

⁴ bis pash i berga Akrabbim pre, un kotar dureder an Zin, un pale dureder bis pash Kadesh-Barnea an o Negev un bis Hazar-Addar, un Azmon.

⁵ Fun Azmon djal ko them bis pash koi tala, pal late o them Egiptia hi, un dureder bis pash o Mashkralstuno Baro Pani.

⁶ Kote, kai o kham tele djal, djal tumaro them bis pash o Mashkralstuno Baro Pani.

⁷ Ap koi serwi rig djal tumaro them fun o Mashkralstuno Baro Panjestar bis pash koi berga Hor.

⁸ Un kotar dureder bis kote, kai djal an Hamat, un dureder pash Zedad,

⁹ un dureder bis Sifron un bis Hazar-Enan. Kowa hi i serwi rig tumaro themestar.

¹⁰ Un ap koi rig, kai o kham pre djal, djal tumaro them fun Hazar-Enan bis Shefam.

¹¹ Un dureder tele fun Shefam bis Ribla. Kowa hi ap kai rig o forestar Ajin, kai o kham pre djal. Pal kowa djal tele kol tikne berge pash o pani Kinneret, kote, kai o kham pre djal,

¹² un dureder tele bis pash o pani Jordan un bis pash o Londo Baro Pani. Kowa hi tumaro them peskre rigjentsa koi trujel.

^13-15 Palle penas o Mose ap kol Israelitarja: “Kol menshe dran o kheer Ruben, dran o kheer Gad, un ko paash kol menshendar dran o kheer Manasse lan pengro kotar them ap kai rig o panjestar Jordan, wergel o forestar Jericho, ap koi rig, kai o kham pre djala. Kawa kate hi ko them, kai lenn tumer wawar. Jaake kamell kowa o baro Dewel. Witsrenn bachtjakre barra te hatsenn win, koon hawo kotar lella.”

¹⁶ Un o baro Dewel rakras o Moseha un penas:

¹⁷ Kalla hi kol laba kol murshendar, kai denn hakenes tumendar i kotar them: ko rashai Eleasar un o Josua, koleskro dad o Nun hi.

¹⁸ Koi pashel hunte lenn jek pralstuno dran hako kheer o Jakobeskre tchawendar, te denn le hakenes i kotar them.

^19-28 Un kalla hi kol laba kol murshendar: dran o kheer Juda: Kaleb, koleskro dad hi o Jefunne; dran o kheer Simeon: Shemuel, koleskro dad hi o Ammihud; dran o kheer Benjamin: Elidad, koleskro dad hi o Kislon; dran o kheer Dan: Bukki, koleskro dad hi o Jogli; dran o kheer Manasse: Hannijel, koleskro dad hi o Efod; dran o kheer Efrajim: Kemuel, koleskro dad hi o Shiftan; dran o kheer Sebulon: Elizafan, koleskro dad hi o Parnach; dran o kheer Issachar: Paltijel, koleskro dad hi o Asan; dran o kheer Asser: Ahihud, koleskro dad hi o Shelomi; dran o kheer Naftali: Pedahel, koleskro dad hi o Ammihud.

²⁹ Kal murshenge penas o baro Dewel, te denn le kol Israelitarjen lengro kotar them an ko them Kanaan.