4. Mose 28 - O Debleskro Drom 2021 (Sinte)

O baro Debleske wenn vieche un jarro un mool anlo: a. hako diwes

¹ Un o baro Dewel rakras o Moseha un penas:

² Pen ap i Israelitarja: Tumer hunte denn jak, te anenn an o tchatcho tsiro ko koowa, hoi denn o Debleste, – ko chapen, hoi well leske chatchedo un koleskro sungepen leske shukar sungella.

³ Un pen ap lende: Kalla hi kol vieche, hoi hunte chatchrenn tseles o baro Debleske: hako diwes dui bakre, kai jek bersh phuro un gar nasselo hi.

⁴ Jek bakro taissarlakro, ko wawar ap i rati.

⁵ Koi pashel jaake jek kilogrammi latcho jarro, hoi was khetne dino jek litari djeteha.

⁶ Kowa hi ko chapen, hoi te chatchrenn hako diwes, jaake har anan les o ersto kopo pash koi berga Sinai. Un o latcho sungepen, hoi pre djal, te well kowa halauter chatchedo an i jag, sungell mishto o baro Debleske.

⁷ Koi pashel well jek litari mool win tchoredo o baro Debleske an leskro kheer.

⁸ Ap i rati aness ko wawar terno bakro! Koi pashel o chapen un i mool har taissarlakro. Un o latcho sungepen, hoi pre djal, te well kowa halauter chatchedo an i jag, sungella mishto o baro Debleske.

b. ap o Debleskro diwes

⁹ Ap o Debleskro diwes aness dui bakre, hoi jek bersh phuro hi. Jon hunte wenn gar nasselo. Koi pashel aness dui kilogramme latcho jarro khetne dino djeteha. Ninna tchoress mool win o Debleske.

¹⁰ Kowa well o Debleske hako Debleskro diwes anlo. Koi pashel kowa, hoi well leske hako diwes chatchedo, un koi mool, hoi well leske win tchoredo.

c. hako tchon

¹¹ Ap o ersto diwes an hako tchon hunte chatchrenn tumer o baro Debleske dui terne mursh grumja, jek mursh bakro un efta jek-bershengre bakre, kai gar nasselo hi.

¹² Un pash hako viecho denn o Debleste i chapen dran latcho jarro djeteha: pash i mursh grumni triin kilogramme jarro, pash i mursh bakro dui kilogramme jarro,

¹³ un pash i terno bakro jek kilogrammi jarro. Kawa well chatchedo o baro Debleske. Un o latcho sungepen, hoi djal pre, te well kowa halauter chatchedo an i jag, sungella mishto o baro Debleske.

¹⁴ Un koi pashel tchorenn mool win o Debleske: dui litarja pash haki terni mursh grumni, jek-te-paash litarja pash i mursh bakro, un jek litari pash hako terno bakro. Kawa well chatchedo hako newo tchon.

¹⁵ Koi pashel hunte anenn i mursh busni o baro Debleske, te well tumari doosh krik lino. Kowa halauter well pash kol vieche un ko jarro un koi mool, hoi well hako diwes o Debleske anlo.

d. ap o baro diwes ‘Passa’

¹⁶ Ap o deesh-te-starto diwes an o ersto tchon hi ko diwes, hoi hi o baro Debleske, un hoi kharell Passa.

¹⁷ Un ap o deesh-te-pantchto diwes ninna an ko tchon, hi ko ersto diwes kol efta diwessa, kai hunte chan kek maro dran shutlo jarro.

¹⁸ Ap o ersto diwes hunte wenn khetne glan o baro Debleste. Kek hunte budrell ap ko diwes.

¹⁹ Un hunte chatchrenn o baro Debleske dui terne mursh grumja, jek mursh bakro, un efta jek-bershengre bakre, kai gar nasselo hi.

²⁰ Koi pashel ko chapen dran latcho jarro djeteha: triin kilogramme haki terni mursh grumjake un dui kilogramme hako mursh bakreske,

²¹ un jek kilogrammi hakeneske kol efta terne bakrendar.

²² Koi pashel i mursh busni, te well tumari doosh krik lino un lauter pale mishto, hoi mank tumende un o Debleste tardo his.

^23-24 Un kowa halauter hunte anenn pash kowa pashel, hoi hako diwes chatchrenn o Debleske taissarlakro, un pash koi mool, hoi leske win tchorenn. Jaake hunte krenn hako diwes efta diwessa. Un o latcho sungepen, hoi djal pre, te well kowa halauter chatchedo an i jag, sungella mishto o baro Debleske.

²⁵ Ap o eftato diwes hunte wenn pale khetne, te sharenn o baro Debles. Ap ko diwes hunte krenn kek budi.

e. ap o diwes, kai o newo djob o Debleske anlo well

²⁶ Un ko diwes, kai anenn tumer o baro Debleske ko newo djobestar, hoi dren anlo was, ko diwes well tumenge i baro diwes, kai wenn khetne glan o baro Debleste. Kek budi hunte krenn tumer ap ko diwes.

²⁷ Un hunte chatchrenn o baro Debleske dui terne mursh grumja, jek mursh bakro, un efta jek-bershengre bakre, kai gar nasselo hi. Un o latcho sungepen, hoi djal pre, te well kowa halauter chatchedo an i jag, sungella mishto o baro Debleske.

²⁸ Koi pashel ko chapen dran latcho jarro djeteha: triin kilogramme haki terni mursh grumjake un dui kilogramme hako mursh bakreske,

²⁹ un jek kilogrammi hakeneske kol efta terne bakrendar.

³⁰ Koi pashel anenn i mursh busni, te wenn tumari doosh krik lino.

³¹ Un kowa halauter hunte anenn pash kol vieche un ko jarro un koi mool, hoi well hako diwes o Debleske anlo. Kol vieche, hoi anenn o Debleske, hunte wenn sasto.