4. Mose 12 - O Debleskro Drom 2021 (Sinte)

I Mirjam lell i djungelo nasslepen

^1-2 Koi rakras i Mirjam un o Aron djungeles pral o Moseste un penan: “Kowa hi gar mishto, te las job peske i romjat, kai hi i menshendar Kush. Rakras o baro Dewel kokres ap o Moseste? Rakras lo mentsa gar?” Un o baro Dewel shunas kowa.

³ O Mose his i mensho, kai kras pes gar bares. Kek mensho his ap i phub, kai his jaake har o Mose un hadas pes gar.

⁴ Koi penas o baro Dewel ap o Moseste un ap o Aroneste un ap i Mirjam: “Djan wergel tumer triin pash miro kheer!” Un jon djan hake triin kote.

⁵ Un koi was o baro Dewel tele an i wolka, un djas an ko wudar glan o Debleskro kheer, un kharas o Aron un i Mirjam. Un kol dui djan kote.

⁶ Un job penas: “Shunenn mire laba! Te bitchrau me jekes pash tumende, kai penell tumenge mire laba, sikrau leste tchomone an i dikepen un rakrau leha an sunja.

⁷ O Moseha, koles miro tchatcho wast hi, krau gar jaake. Leste dom miro tselo kheer an o wast.

⁸ Jaake har rakrell i mensho i wawareha, rakrau me leha, an laba, kai lo mishto haiwella un gar an parmisse. Un job dikell man, o baro Debles, har hom. Hoske his tumen kek traash, te rakrenn djungeles pral o Mose, koles miro tchatcho wast hi?”

⁹ Un o baro Debleskri choli was pral lende. Un job djas krik.

¹⁰ Ninna koi wolka pral o Debleskro kheer djas krik. Un ap jek kopo was i Mirjam nasselo ap peskro mass, ko his parno har gib. Un har rissras pes o Aron pash i Mirjam un dikas ko nasslepen ap lakro mass,

¹¹ penas job ap o Moseste: “Miro Rai, muk kai doosh gar ap mende te atchell! Kowa his dinlepen, hoi mer kram, un anam doosh ap mende.

¹² Kre, te well i Mirjam gar jaake har i ternepen, kai was i datar mulo boldo, un koleskro mass paash krik hi!”

¹³ Un o Mose das ap o baro Debleste gole: “Ach Dewel, kre lat sasto!”

¹⁴ O baro Dewel penas ap o Moseste: “Te tchungrals lakro dad lat an o mui, hunte ladjals joi efta diwessa. Mukenn lat kokres efta diwessa win glan koi platsa, kai i plachtene khera hi! Pal kowa lenn lat pale pash tumende!”

¹⁵ Jaake was i Mirjam win anlo glan i platsa, kai i plachtene khera hi, un hunte atchas kote efta diwessa. An ko tsiro djan i menshe gar dureder. Har nai was i Mirjam palpale,

¹⁶ djan le dureder, mukan Hazerot pal pende, un djiwan an o mulo tato them Paran.