3. Mose 3 - O Debleskro Drom 2021 (Sinte)

I viecho, hoi i menshe khetne chan glan o Debleste

¹ Te kamell jek o baro Debleske i grumjat te anell, hoi chan i menshe khetne glan leste, palle nai well ko viecho i mursh grumni har ninna i djuwel grumni. Kau viecho hunte well gar nasselo.

² Job tchiwell peskro wast ap o viecheskro shero un marell les glan o wudar o Debleskro plachteno kherestar. Un i rashaja dran o kheer Aron lenn o rat un tchorenn les trul o Debleskri chatchepaskri ap leskre star rigja.

³ I feteder kotja o viechestar wenn chatchedo o baro Debleske. Kal kotja hi: o thulepen, hoi ap un pral i buke hi,

⁴ kol dui niere un ko thulepen, hoi ap lende hi, ninna ko thullo kotar, hoi ap i lebra hi. Pash i niere hunte well lo tele tchinlo.

⁵ Un i rashaja dran o kheer Aron chatchrenn kowa lauter ap o Debleskri chatchepaskri, ap ko kasht, hoi pral i jag hi. Jon chatchrenn kowa khetne ko wawar viecheha, hoi well o Debleske tseles chatchedo. Un o sungepen, hoi well win, sungell mishto o baro Debleske.

⁶ Te kamell jek o baro Debleske i bakro oder i busni te anell, hoi chan i menshe khetne glan leste, palle nai well ko viecho i murshengro viecho har ninna i djuwjengro viecho. Kau viecho hunte well sasto.

⁷ Te kamell lo i bakro te anell glan o baro Debleste,

⁸ palle tchiwell job peskro wast ap leskro shero un marell les glan o Debleskro plachteno kheer. Un i rashaja lenn o rat un tchorenn les trul o Debleskri chatchepaskri win.

⁹ I feteder kotja o viechestar wenn chatchedo o baro Debleske. Kal kotja hi: o thulepen, i thulli pori, tele tchinlo pash o palstuno kokalo, ninna ko thulepen ap un pral i buke,

¹⁰ kol dui niere, un ko thulepen, hoi ap lende hi, ninna ko thullo kotar ap i lebra. Pash i niere hunte well lo tele tchinlo.

¹¹ Un o rashai chatchrell kowa lauter ap o Debleskri chatchepaskri. Kolla hi kol kotja o viechestar, hoi o baro Debleske hi.

¹² Te kamell lo i busni te anell glan o baro Debleste,

¹³ palle tchiwell job peskro wast ap lakro shero un marell lat glan o Debleskro plachteno kheer. Un i rashaja lenn o rat un tchorenn les trul o Debleskri chatchepaskri ap leskre star rigja.

¹⁴ I feteder kotja o viechestar wenn chatchedo o baro Debleske. Kal kotja hi: o thulepen, hoi ap un pral i buke hi,

¹⁵ kol dui niere, un ko thulepen, hoi ap lende hi, ninna ko thullo kotar ap i lebra. Pash i niere hunte well lo tele tchinlo.

¹⁶ Un o rashai chatchrell kowa lauter ap o Debleskri chatchepaskri. Kolla hi kol kotja o viechestar, hoi o baro Debleske hi. Un o sungepen, hoi well win, sungell leske mishto. O tselo thulepen hi o baro Debleske.

¹⁷ Kek tumendar hunte chal o thulepen un o rat. Ap kowa hunte rikrenn tumen un tumare tchawe kanna un hako tsiro, kai tumer ninna djiwenna.