3. Mose 24 - O Debleskro Drom 2021 (Sinte)

I momlia un mare o baro Debleske

¹ O baro Dewel penas ap o Mose:

^2-3 Pen ap i Israelitarja, te anenn le tuke o latcheder olivtikro djet, te nai chatchenn le haki rat i tikne momlia ap i momelengri an o Debleskro plachteno kheer. Kai momelengri well tardo win glan ko kutch kotar than, hoi glan ko mochton pandlo hi, kai o Debleskre deesh laba dren hi. Kote dell o Aron jak, te chatchell i momelengri i tseli rat. Kawa te well jaake kerdo hako tsireske pash i Israelitarja un lengre tchawende, kai pal lende wenna.

⁴ O Aron hunte dell jak ap i momlia ap i sonakaskri momelengri, te chatchenn le hako tsiro glan o baro Debleste.

⁵ Muk deesh-te-dui mare te pekell dran latcho jarro, hako maro dran dui-te-paash kilogramme jarro!

⁶ Un tchip len dui kope shob kotja khetne ap koi sonakaskri chapaskri glan o baro Debleste.

⁷ Tchip latcho sungepaskro koowa ap kal mare. Ko sungepaskro koowa well chatchedo o baro Debleske, un jaake well siklo, te hi kal mare o baro Debleske.

⁸ Hako kurko ap o Debleskro diwes tchiwell o Aron newe mare glan o baro Debleste. Jaake hunte krenn i Israelitarja hako tsiro, hoi wella.

⁹ Kal mare hi o Aroneske un leskre mursh tchawenge. Un jon hunte chan len ap i Debleskri platsa. Kal mare hi lengro kotar kolestar, hoi o baro Debleske chatchedo well, un hi kokres i rashajenge. Jaake hunte well kowa kerdo hako tsireske.

I phagi koleske, kai bari doosh ap peste anas

^10-11 Mank i Israelitarja his i mursh, koleskri dai i Israeltikri djuwel his un leskro dad i Egiptari. Leskri dai kharas Shelomit. Lakro dad hi o Dibri dran o kheer Dan. Ko mursh tchingras pes i mursheha dran Israel. An kau tchingepen tchingras lo ap o baro Debleste djungele labentsa. Koi anan le les pash o Moseste,

¹² un stilan les, bis te penas lenge o baro Dewel, hoi te krenn le leha.

¹³ O baro Dewel penas ap o Mose:

¹⁴ An ko murshes win glan koi platsa, kai i menshe hi! Hakeno, kai shunas, hoi lo penas, kowa tchiwell peskre wasta ap leskro shero. Palle witsrenn i tsele menshe les mulo i barrentsa.

¹⁵ Ap i Israelitarja peness: Koon praassell peskro Debles, hunte hidjrell peskri phagi.

¹⁶ Kowa, kai tchingrell ap o baro Debleste djungele labentsa, hunte well mulo dino. I tsele menshe hunte witsrenn les i barrentsa mules. Hi jek, te hi lo i Israelitari oder i wi-themari.

¹⁷ Koon i menshes mulo dell, hunte well mulo dino.

¹⁸ Koon i vieches mulo dell, kowa hunte dell sau viecho pale: I djipen i djipaske.

¹⁹ Koon i wawares dukrell, koleske well kerdo, hoi job kras:

²⁰ Te phagas lo jekeske i kokalo, hunte well leske i kokalo phagedo. Te das lo leske i jak oder i dand win, hunte well leske i jak oder i dand win dino. Jaake har jek o wawareske kras, jaake well leske pale dino.

²¹ Koon i vieches mulo dell, hunte dell sau vieches pale. Koon i menshes mulo dell, hunte merell.

²² Tumenge un kolenge dran i wi-them, kai pash tumende djiwenna, hunte well jek tchatchepen, pal kowa lauter win kerdo well. Me, o baro Dewel, hom tumaro Dewel.

²³ O Mose penas kowa i Israelenge. Un jon kran jaake, har penas o baro Dewel ap o Moseste, un anan ko murshes, kai o baro Debles praassas, win glan koi platsa, kai i Israelitarja his, un witsran les i barrentsa mulo.