3. Mose 17 - O Debleskro Drom 2021 (Sinte)

Koi platsa, kai i vieche maredo wenn

¹ O baro Dewel penas ap o Mose:

² Pen ap o Aron un leskre mursh tchawende un ap i tsele Israelitarja: Kawa hi, hoi o baro Dewel tumenge penell:

^3-4 Hako mursh dran o kheer Israel, kai kamell i gurum, i bakro oder i busni te marell, hunte krell kowa glan o wudar o Debleskro plachteno kherestar, te well ko viecho o baro Debleske dino. Job hunte krell kowa gar ap i platsa, kai i menshe djiwenn, witar gar glan koi platsa. Te rikrell lo pes gar ap kowa, anell lo rat ap peste har jek, kai i menshes marell. Sawo mensho well pale-tchiddo un nai djiwell buder gar mank peskre menshende.

⁵ Bis kanna maran i Israelitarja pengre viechen win ap o them. Kanna hunte anenn le len o baro Debleske glan o wudar leskro plachteno kherestar pash o rashajeste. Un kote wenn le maredo, te chan le len khetne glan o baro Debleste.

⁶ O rashai lell ko rat un witsrell tchomone lestar ap o baro Debleskri chatchepaskri, hoi glan o wudar leskro plachteno kherestar tardo hi. Un chatchrell o thulepen ko viechestar koi pre. Un o latcho sungepen, hoi well win, sungell mishto o baro Debleste.

⁷ I Israelitarja hunte marenn buder kek viechen i bengenge, kolenge jon kanna gomme palla nashenn. Ap kowa hunte rikrenn le pen, ninna lengre tchawenge un kolengre tchawenge un jaake dureder hako tsireske.

⁸ Tu peness lenge: Hako mursh dran o kheer Israel, ninna hako wi-themari, kai mank tumende djiwell, kai kamell i vieches o baro Debleske te marell, sau viecho, koleskro tselo mass chatchedo well, oder sau viecho, hoi chan le khetne glan o baro Debleste,

⁹ kowa hunte anell les glan o wudar o Debleskro plachteno kherestar, te well lo kote o baro Debleske maredo. Koon kowa gar krell, well pale-tchiddo un nai djiwell buder gar mank peskre menshende.

Ma chan rat!

¹⁰ Hako Israelitari, ninna hako wi-themari, kai mank tumende djiwell, kai rat chal, hawo ninna hi, koleske sikrau miro dumo, un krau, te djiwell lo buder gar mank mire menshende.

¹¹ An o rat hi o djipen. Un me kamau, te well lo ap i chatchepaskri anlo, te well i doosh un o pale-tchiddo koowa tumendar krik lino. An o rat hi o djipen. Doleske lau leha i doosh un o pale-tchiddo krik.

¹² Doleske penom me ap i Israelitarja: Kek tumendar chal rat. Witar kek wi-themari, kai mank tumende djiwell, chal rat.

¹³ Hako Israelitari un hako wi-themari, kai taprell penge i diwjo viecho oder i tchirklo, hoi jek nai chal, hunte mukell leskro rat win nashell ap i phub un tchakrell tchik koi pre.

¹⁴ An o rat hi o djipen. Doleske penom me ap i Israelitarja: Ma chan rat! Koon les chal, well pale-tchiddo un nai djiwell buder gar mank peskre menshende!

¹⁵ Hakeno, kai chal i viecho, hoi meras oder mulo dandedo was, kowa hunte thowell pes un peskre koola, un atchell pale-tchiddo, bis te well rati. Koi pal hi lo pale erligo. Hi jek, te hi kowa i Israelitari oder i wi-themari.

¹⁶ Te thowell lo pes gar, witar gar peskre koola, hunte hidjrell lo peskri phagi.