3. Mose 12 - O Debleskro Drom 2021 (Sinte)

Kawa hunte krell i djuwel, kai i tchawes ap i phub anas

¹ O baro Dewel penas ap o Mose:

² Pen ap i Israelitarja: Te anell i djuwel i mursh tchawes ap i phub, palle well li efta diwessa pale-tchiddo, har an kol diwessa, kai lat i djuwjakro koowa hi.

³ Ap o ochtato diwes well ko ternepen ap leskro mass tchinlo.

⁴ Un joi atchell 33 (trijanda-te-triin) diwessa gomme khere, bis te well li pale erligo. An kau tsiro taprell li tchi an, hoi o Debleske hi. Un an o Debleskro kheer well li gar, bis te kal diwessa trujel hi.

⁵ Te well lake i tchai boldo, palle well li dui kurke pale-tchiddo, har te wals lat peskri djuwjakro koowa. Un 66 (shob-deesh-te-shob) diwessa atchell li khere, bis te well li pale erligo.

⁶ Pal kal diwessa, kai his li pale-tchiddo, anell li o rashajeske i bakro, hoi jek bersh hi glan o wudar o Debleskro kherestar. Ninna anell li leske i terni tauba oder i diwji tauba. O bakro well maredo un leskro tselo mass well chatchedo o baro Debleske. Un i tauba well maredo, te well o pale-tchiddo koowa krik lino.

⁷ O rashai chatchrell kol vieche glan o baro Debleste, te well koi djuwel pale erligo. Jaake well o pale-tchiddo koowa krik lino, hoi ap koi djuwjate his. Jaake hunte krenn i djuwja, kai anan i mursh tchawes oder i tchai ap i phub.

⁸ Te hi li jaake tchorwelo, te nai anell li kek bakro, palle anell li dui diwje taube oder dui terne taube, jek, hoi o baro Debleske chatchedo well, un jek, hoi maredo well, te well o pale-tchiddo koowa latar krik lino. Jaake krell o rashai, te well li pale erligo.