3. Mose 1 - O Debleskro Drom 2021 (Sinte)

I viecho, hoi well tseles o Debleske chatchedo

¹ Un o baro Dewel das o Moses gole, un rakras dran o Debleskro plachteno kheer win un penas:

² Rake i Israelentsa un pen lenge: Te kamell i mensho tumendar i vieches o baro Debleske te anell, palle lell lo jekes peskre grumjendar, peskre bakrendar oder peskre busjendar.

³ Te kamell lo leske i grumni te anell, te well li leske tseles chatchedo, palle hunte lell lo i murshkani grumni, hoi gar nasselo hi. Un job anell lat glan o wudar o Debleskro plachteno kherestar, te dikell o baro Dewel latches ap leste.

⁴ Un o mursh tchiwell peskro wast ap o shero ko viechestar, te dikell o Dewel latches ap leste un lell leskri doosh, hoi lo ap peste las, krik.

⁵ Palle marell lo kai grumni glan o baro Debleskro kheer. Un kol rashaja dran o kheer Aron lenn o rat un tchorenn les trul o Debleskri chatchepaskri ap leskre star rigja. Kai chatchepaskri hi tardo glan o wudar o plachteno kherestar.

⁶ Un ko mursh, kai anas ko vieches, tserdell leske i hauta tele un tchinell les an kotja.

⁷ Un i rashaja dran o kheer Aron krenn i jag ap i chatchepaskri un tchiwenn kasht ap koi jag,

⁸ palle tchiwenn le kol kotja mass ap kau kasht, ninna o shero un o thulepen.

⁹ I buke un i herja hunte wan thodo. Kowa krell ko mursh, kai anas ko vieches. Un o rashai mukell halauter ap i chatchepaskri pre te chatchrell. Jaake hunte well i viecho anlo glan o Debleste, hoi well leske tseles chatchedo. Un o latcho sungepen, hoi well win, sungell mishto o baro Debleske.

¹⁰ Te kamell jek i bakro oder i busni o baro Debleske te anell, te well ko viecho tseles leske chatchedo, palle anell lo i murshkano viecho, hoi gar nasselo hi.

¹¹ Un job marell les glan o baro Debleste pash koi chatchepaskri, ap koi rig, kai norden hi. Un i rashaja dran o kheer Aron lenn o rat un tchorenn les trul o Debleskri chatchepaskri ap leskre star rigja.

^12-13 Un ko mursh tchinell les an kotja, thowell i buke un i herja o panjeha. Un o rashai tchiwell kol kotja mass, ninna o shero un o thulepen ap o kasht pral koi jag, hoi ap i chatchepaskri hi. Un mukell halauter pre te chatchrell. Jaake hunte well i viecho anlo glan o Debleste, hoi well leske tseles chatchedo. Un o latcho sungepen, hoi well win, sungell mishto o baro Debleske.

¹⁴ Te kamell jek i tchirklo o baro Debleske te anell, te well ko tchirklo tseles leske chatchedo, palle anell lo i diwji tauba oder i wawar tauba.

¹⁵ Un o rashai anell koi tauba pash i chatchepaskri un phagell lake o shero tele, chatchrell o shero ap i chatchepaskri, un mukell o tchirkleskro rat win ratell ap i rig fun i chatchepaskri.

¹⁶ Leskri meen un kowa, hoi an late hi, witsrell lo win ap i jagakri tchik, hoi pash o chatchepaskri tchiddo hi ap koi rig, kai o kham pre djal.

¹⁷ Palle taprell o rashai o tchirkleskre mussja un tserdell o tchirkles pre, un chatchrell les ap i kasht pral i jag, hoi ap i chatchepaskri hi. Jaake hunte well i tchirklo anlo glan o Debleste, hoi well leske tseles chatchedo. Un o latcho sungepen, hoi well win, sungell mishto o baro Debleske.