3. Johanni 1 - O Debleskro Drom 2021 (Sinte)

Latcho Gajo

¹ Me, i phureder mank i patslende, tchinau tuke, latcho Gajo, kau liil. Me kamau tut o tselo djijestar.

² Latcho phraal, me mangau o Debles, te djal tuke mishto, un te wess sasto jaake, har sasto hal an tiro patsepen.

³ Bachtelo homs, har mare phrala wan un mange penan, har tu ap o tchatcho drom djah, un pal o tchatchepen djiweh.

⁴ Pral kek wawar koowa hom jaake bachtelo, har te shunap, kai mire tchawe ap o tchatcho drom djana.

Lenn i phrala pre, kai wenn pash tumende!

⁵ Latcho phraal, tu kreh i latchi budi tire phralenge, ninna te prindjreh len gar.

⁶ Jon penan tutar glan i patslende, kai kate khetne wenna, hawo baro kamlepen tut hi. Jon te djan ap pengro drom dureder, de len chapen un pipen peha, jaake har kowa glan o Debleskre jaka mishto hi.

⁷ Jon kran pen ap o drom, te penenn le i menshenge o Jesus Kristestar. Un jon lenn tchi kolendar, kai les gar prindjrenna.

⁸ Doleske hunte das mer sawe phralen kowa, hoi len hunte well djipaske. Jaake budrah mer lentsa, te well o Debleskro tchatchepen i menshenge penlo.

⁹ Me tchinom i tikno liil ap i patslende, kai kote khetne wenna, kai hal. Jek lendar hi o Diotrefes. Kowa kamell o pralstuno mashkral lende te well, un shunell gar ap mande.

¹⁰ Te wau me pash tumende, penau me leske, hoi job lauter kras. Job anell o chochepen pral mende pre. Un kowa hi leske gar doha. Job lell gar i patsle phralen pre, kai wenna pash leste. Un kolla, kai kamenn len pash pende pre te lell, kolenge penell lo, te krenn le kowa gar, un witsrell len dran i kangri win.

¹¹ Latcho phraal, ma kre o tchilatchepen palla! Kre o latchepen! Kowa, kai krell latcho koowa, well o Deblestar. Kowa, kai o tchilatchepen krella, kowa prindjrell o Debles gar.

¹² O Demetrio krell o latchepen. Lauter rakrenn mishto pral leste. Un leskro djipen sikrella, te hi lo an o tchatchepen tardo. Mer ninna penah, kai kowa, hoi job krella, mishto hi. Un tu djineh, kai kowa, hoi mer penah, tchatcho hi.

¹³ Me hunte penoms tuke jaake bud. Kowa kamau gar lauter an i liil te tchinell.

¹⁴ Wals mishto, te dikams men jaake sik, har djala. Koi rakrams nai pral lauter.

¹⁵ O Debleskri bacht tuke! Kol mala pash mande penenn tuke “Atch maro Debleha!” Pen latche laba mandar mire malenge, kai pash tute hi, pen kowa hakeneske peskro labeha!