2. Timoteo 4 - O Debleskro Drom 2021 (Sinte)

Pen i menshenge o Debleskro lab!

¹ Kowa, hoi kanna penau tuke, penau glan o Debleste un glan o Jesus Kristeste, kai krell o tchatchepen win pral i djidende un i mulende. Job, kai well pale, te well lo baro rai pral i tsele menshende, kowa shunell, hoi tuke penau:

² Pen i menshenge o Debleskro lab! Kre kowa un muk gar tele, ninna te kamenn i menshe kowa gar te shunell! Sike len lengri doosh! De len trad, te mukenn le o tchilatchepen! Kre lengre djia soreles an o patsepen! Un ab gar khino, te sikress len o tchatcho drom!

³ Well i tsiro, kai kamenn le o Debleskro tchatchepen buder gar te shunell. Jon djiwenna, har jon kamenna, un rodenn penge sawe sikepangre, kai kowa len sikrenna, hoi jon kamenn te shunell.

⁴ Palle shunenn jon buder gar ap o tchatchepen. Jon shunenn ap chochene parmisse.

⁵ Tu, Timoteo, de jak har tu djiweh! Rike win, ninna te krenn le tuke o djipen phares! Pen i menshenge o latcho lab o Jesus Kristestar! Koi budi das tut o Dewel. Kre koi budi mishto!

⁶ Miro djipen hi har i pipen, hoi well win tchoredo o Debleske. O tsiro was, kai hunte merap.

⁷ Me budrom phares o Jesuseske un dom miro patsepen gar pre. Me nashom jaake ap o Jesuseskro drom, har te woms i naashepaskro, kai nashell i rah drom. Kanna nashom o tselo drom.

⁸ Kowa, hoi kanna glan mande hi, hi ko shukar koowa, hoi kolla lenna, kai kran, hoi o Dewel kamella. Un kowa dell man maro rai Jesus. Job hi ko tchatchepaskro rai, kai djal pal o tchatchepen. Ko shukar koowa dell lo man ap ko diwes, kai job o tchatchepen wi-rakrell pral i tsele menshende. Ko shukar koowa dell job gar mande kokres. Job dell kowa lauterende, kai dikenn o tselo djijestar ap ko diwes, kai well lo pale.

Ab sik pash mande!

⁹ Ab jaake sik har djala pash mande!

¹⁰ O Demas mukas man, un djas an o foro Tessalonika. Job kamell o djipen ap kai phub. O Kreskens djas an o them Galatia, un o Tito an o them Dalmatia.

¹¹ O Luka atchas kokres pash mande. Te weh tu pash mande, an o Markes tuha! Job nai budrell mange.

¹² O Tichikes bitchrom an o foro Efesus.

¹³ Te weh tu, an mange miri plaashka, kai mukom an o foro Troas pash o mursheste, kai kharella Karpus. An ninna kol lila un kol ledertikre patria tuha, kai jaake bud moldo hi.

¹⁴ O Alexandro, kowa, kai budrell i sasteha, kras mange bud tchilatchepen. O rai Jesus rakrell i phagi pral leste win pal kowa, hoi job kras.

¹⁵ Tu ninna, de tut garda glan leste! Lauter, hoi mer penam, his leske gar mishto.

¹⁶ Har homs o glanstuno kopo glan i tchatchepangre tardo, his kek ap miri rig tardo. Lauter mukan man kokres. Me mangau o Debles, te lell lo koi doosh lendar.

¹⁷ O rai Jesus his ap miri rig, un das man i soor, te nai penap kote o tselo latcho lab lestar, jaake te shunan les ninna kolla, kai hi kek bibolde. Un job las man jaake dran lengre wasta win, har te woms dran i leweskro mui win lino.

¹⁸ Ninna an ko tsiro, hoi wella, lell man o Dewel dran o tselo tchilatchepen win, un lell man pash peste an o bolepen, kai job o rai hi. Les sharas mer kanna un hako tsiro. Amen!

¹⁹ Pen latche laba mandar ap i Priska un o Akwila! Pen ninna latche laba mandar ap i menshende an o Onesiforeskro kheer!

²⁰ O Erasto atchas an o foro Korint, un o Trofimes hunte mukom nasselo an o foro Milet.

²¹ Trade tut, te wess glan o wend kai. O Eubulo un o Pudens, o Linus, i Klaudia, un i tsele wawar patsle penenn tuke: “Atch o Debleha!”

²² Maro rai Jesus hi tuha! Leskro latchepen djal tumentsa!