2. Timoteo 3 - O Debleskro Drom 2021 (Sinte)

I menshe wenna tchilatcheder an ko tsiro, hoi wella

¹ Kowa hunte djiness tu: Glan ko tsiro, kai i phub tele djala, well i pharo tsiro ap i menshende.

² An ko pharo tsiro dikenn i menshe ap pende, te djal lenge kokres mishto. Jon hi pal i lowe. Jon krenn pen bares. Jon dikenn tele ap i wawarende. Jon rakrenn djungeles pral o Debleste. Jon shunenn gar ap pengro dadeste un ap pengri date. Jon parkrenn pen gar ko latchepaske, hoi i wawar lenge kras. Jon djiwenn jaake, har te dals kek Dewel.

³ Len hi kek dji i wawarenge. Jon wenn gar pale latches pal o tchingepen. Jon rakrenn chochepen pral o wawareste. Jon hi bipandlo un dukrenn i wawaren. Jon kamenn kek latchepen.

⁴ Jon hi phukepangre. Jon wenn sik chojedo. Jon phurdenn pen pre. Jon kamenn budeder pengro khelepen har o Debles.

⁵ Kolla krenn jaake, har te wans le patslo. Jon prindjrenn gar koi soor, hoi well dran o tchatcho patsepen. Rike tut sawe menshendar pale!

⁶ Mashkral lende hi menshe, kai djan an i khera, te taprenn le sawe djuwjen, kai ladjenn pen glan tchi, un ap lende bud doosh hi.

⁷ Kalla djuwja kamenn hako tsiro newo koowa te shunell un haiwenn gar, hoi o tchatchepen hi.

⁸ Glan rah tsiro shunan o Jannes un o Jambres gar ap o Moseste. Jaake shunenn kol menshe witar gar ap o tchatchepen. Jon hi nasselo an o shero, un lengro patsepen hi tchi moldo.

⁹ An i tikno tsiro dikella hakeno, kai kowa dinlepen hi, hoi jon krenna, har kowa ninna pash kolla dui murshende was.

Tumer wenna palla lino

¹⁰ Me sikrom tut, har te djas ap o Debleskro drom, un tu atchal ap leskro drom, un djiwal jaake, har me tuke glan djiwom. Tu kameh kowa, hoi me ninna kamau. Tu dikal, har me patsau ap o Jesus Kristeste. Un tu djineh, har rikrom ap o patsepen. Tu djineh ninna, har kamom i wawaren o djijestar, un har rikrom lauter win.

¹¹ Tu djineh, har lan le man palla an i forja Antiochia, Ikonion un Listra. Un tu djineh, hawe duka jon mange kran. Un kowa lauter rikrom win. Un dran lauter kowa las man o rai Jesus win.

¹² Djiness, lauter kolla, kai patsenn ap o Jesus Kristeste un kamenn te krenn, hoi job kamella, wenn palla lino.

¹³ Kol tchilatche menshe un kol chochene, kai krenn jaake, har te wans le patslo, kolentsa well djungleder un djungleder. Jon peran o Debleskro dromestar tele, un tserdenn ninna wawaren o Debleskro dromestar tele.

O Debleskro lab

¹⁴ Tu, Timoteo, atch pash kowa, hoi tuke penlo was, un hoi tu patseh! Tu djineh, koon tuke kowa lauter penas.

¹⁵ Tu prindjreh o Debleskro lab fun tiknes pre. Un ko lab das tut o goswepen, te hatsal o drom pash o Jesus Kristeste un haiwal, tu hunte patsess ap o Jesus Kristeste, te less ko djipen, hoi gar pre-herella.

¹⁶ Lauter, hoi an o Debleskro lab tchinlo hi, tchiwas o Dewel an i menshengre djia, te tchinenn le kowa pre. Men hunte well o Debleskro lab, te sikras i menshende leskro drom, te sikras len lengri doosh, un hoi te krenn le feteder, un har te djiwenn le i djipen, hoi o Dewel kamella.

¹⁷ I mensho, kai kamell o Debleske koi te well, hatsell an o Debleskro lab lauter, hoi les hunte well, te nai krell lo lauter jaake, har o Dewel kamella.