2. Timoteo 2 - O Debleskro Drom 2021 (Sinte)

Rike win, te wenn duka o Jesuseske ap tute!

¹ Tu, miro tchawo Timoteo, wess soreles an o patsepen! O Jesus Kristo dell tut koi soor.

² Tu hals pashel, har penom bud menshen o Debleskro lab. Kowa, hoi shunal mandar, sike kanna wawar patslen, kai krenn, hoi tu lenge peneh, un kolendar tu djineh, te haiwenn le mishto o Debleskro lab te penell!

³ Jaake har i latcho kurepaskro duka ap peste lella, jaake le ninna duka o Jesus Kristeske ap tute!

⁴ Kowa, kai an o kurepen djala, krell kek wawar budi. Job kamell, te dikell peskro pralstuno latches ap leste.

⁵ Jek, kai kurell pes, un kurell pes gar jaake, har leske penlo was, kowa well gar o latcheder.

⁶ O hacho, kai phares budrella, hi o glanstuno, kai chal kolestar, hoi dran i phub was.

⁷ Muk an tiro shero trujel te djal, hoi penom tuke! Un o rai Jesus dell tut o goswepen, te haiwess kowa lauter.

⁸ Rike an tiro shero o Jesus Kristes! Koles las o Dewel dran i mulende win, un kras les djido. Job his o Davideskre menshendar. Jaake penau kowa i menshenge.

⁹ Koleske lau duka ap mande. Jon pandan man an o stilepen, har te woms i marepaskro. Ninna te pandan le man an o stilepen, nai pandenn jon gar o Debleskro lab.

¹⁰ Me lau kowa lauter ap mande kol menshenge, kolen o Dewel win rodas, te lenn jon o djipen un o railepen, hoi gar pre-herella. Kowa dell len o Jesus Kristo.

¹¹ Kau lab hi tchatcho: Te merah o Jesus Kristeha, djiwah mer ninna leha.

¹² Te rikrah win an o patsepen, wah mer raja leha an o bolepen. Te dah mer les buchoste, dell job men ninna buchoste.

¹³ Te rikrah men gar pash leste, job rikrell pash mende. Un job atchell jaake har job hi.

I chochene sikepangre

¹⁴ Pen lenge kowa pale te pale! De len trad glan o Debleste, te tchingrenn jon pen gar pral laba! Ko tchingepen hi tchi moldo, un krell o patsepen kolendar paash, kai kowa lauter shunenna.

¹⁵ Kre lauter, te wess i latcho budepaskro o Debleske, un hunte ladjess tut gar koleske, hoi tu kreh! Pen o Debleskro lab jaake, har tchatcho hi!

¹⁶ Ma shun ap dinelo rakepen, hoi well i menshendar un gar o Deblestar! Kowa hi tchi moldo un anell i menshen o Deblestar krik!

¹⁷ Ko rakepen hi har i tchilatcho nasslepen, kai chal trul peste. Mashkral lende, kai dineles rakrenna, hi o Himeneo un o Fileto.

¹⁸ Jon mukan o tchatcho drom, un penenn chochepen, te penenn le: “Ko tsiro his koi, kai o Dewel i mulen djido kras.” Hi patsle koi, kolenge krell kau rakepen pengro patsepen paash.

¹⁹ Ninna te hi sawe menshe koi, kai rakrenn chochepen, djinah mer: Kowa, hoi o Dewel kras, nashte krell kek paash. Kowa hi har i bar, hoi soreles tardo hi. Kek nai witsrell les trujel. Ap leste hi tchinlo: O rai prindjrella kolen, kai leskre hi. Un ninna hi tchinlo: Koon o rajes an-mangella, hunte mukell o tchilatcho drom.

²⁰ An i baro kheer dell bud tchare un pirja: kolla dran sonakai un rup, ninna wawar dran kasht un chatchedi tchik. Kol kutch tchare un pirja wenn ap i chapaskri tchiddo, un an kol wawar well djungelo koowa dren tchiddo.

²¹ Jaake hi kowa ninna i patslentsa: Kowa, kai tchiwas ko tselo tchilatchepen dran peskro djipen win, kowa hi har i kutch tcharo o rajeske pral o kheer. Job hi kokres peskro rajeske koi, un hi leske bud moldo. Leskro rai nai dell leske haki latchi budi.

²² Tu, Timoteo, ma kre ko tchilatcho koowa, hoi i terne murshenge an o shero trujel djala! Kre lauter, te djiwess an o tchatchepen! Atch an o patsepen! Ab kamlo ap i wawarende! Djib latches lentsa khetne! Kre kowa lauter khetne kol phralentsa, kai o Debles an-gole denna i djudjo djijeha!

²³ Te tchingrenn i menshe pral i laba, ma muk tut an ko dinelo rakepen dren tserdell, hoi tchi molella! Tu djineh, kowa anell tchingepen.

²⁴ Kowa, kai budrell o Debleske, hunte tchingrell pes gar. Na-a, job hi kamlo ap hakeneste, un haiwell mishto i menshende o Debleskro drom te sikrell. Job well gar chojedo ap lende,

²⁵ ninna te kamenn le gar ap leste te shunell. Job rakrell latches lentsa, te anell lo len ap o tchatcho drom! O Dewel nai dell len o dji, te mukenn le pengro tchilatcho drom, un te haiwenn le, hoi o tchatchepen hi.

²⁶ Jaake wenn jon pale dran o bengeskre wasta win, kai jon pandlo his. O beng tapras len, te kran le kowa, hoi job kamella.