2. Samuel 18 - O Debleskro Drom 2021 (Sinte)

O Absalom merell

¹ Un o David dikas pal, kitse lurde pash leste hi, un tchiwas pralstunen pral lende, pral hako sero un pral hako sheel murshende.

² Pral kolla lauter tchiwas job triin lurdengre rajen, hakenes pral i triinto kotar kol lurdendar. Kolla triin his: o Joab, leskro phraal o Abishai, koleskri dai i Zeruja hi, un o Itai dran Gat. Un o baro rai penas ap i lurdende: “Me kamau tumentsa an o kurepen te djal.”

³ Kol lurde penan: “Tu djas gar mentsa an o kurepen. Mer te nashah un i paash mendar merenna, hom mer tchi moldo an lengre jaka. Tu moleh jaake bud har deesh-serja mendar. Wals feteder, te wals menge dran o foro ap i rig.”

⁴ O baro rai penas ap lende: “Mishto, me krau, hoi an tumare jaka tchatcho hi.” Un o baro rai djas pash ko baro wudar, un kol tsele lurde djan win glan leste wergel, hake kopo sheel lurde khetne. Pal jek sero was i wawar sero, un jaake dureder.

⁵ Un o baro rai penas ap o Joab, ap o Abishai, un ap o Itai: “Awenn kamlo miro tchaweha o Absalom.” Un kol tsele lurde shunan, har o baro rai kowa ap kol pralstune lurdende penas.

⁶ Un o Davideskre lurde djan win, un wan pash o Israeleskre lurdende. Un jon kuran pen an o weesh Efrajim.

⁷ Un o kurepen his sorelo. Un o Davideskre lurde dan o Israeleskre lurden. Un lendar meran ap ko diwes biish-serja lurde.

⁸ Un jon kuran pen an ko tselo them koi. Un o weesh chas ap ko diwes budeder menshen har o charo chas.

⁹ O Absalom was gar dur o Davideskre lurdendar. Un job klissas ap i maultikri burika. Un har koi burika tel i baro ruk bud kashtentsa was, atchas lo peskre ballentsa an ko ruk bladedo. Un job his mashkral i phub un o bolepen bladedo, un leskri burika djas mashkral leskre herja krik.

¹⁰ Un jek mursh dikas kowa. Un job penas kowa o Joabeske un penas: “Shun, me dikom o Absalomes ap i baro ruk bladedo.”

¹¹ Penas o Joab ap ko mursheste: “Te dikal tu kowa, hoske dal les tu gar, te perell job ap i phub? Koi doms me tut deesh rupene beme, un i pereskri dori.”

¹² Penas ko mursh: “Ninna te tchiwals tu i sero rupene lowe an miro wast, hadoms me miro wast gar ap o baro rajeskro tchaweste. O baro rai penas tuke un ap o Abishai, un ap o Itai, glan mare kanda: ‘Denn garda ap miro tchaweste Absalom!’

¹³ Un te doms les mulo, un o baro rai shunals kowa – leske atchell tchi khatedo, – palle rikrals tu gar pash mande.”

¹⁴ “Kamau gar te nashrap miro tsiro tuha!” das o Joab gole, un las triin lengste sane tchurja an peskro wast, un das len o Absalomeske an o dji, har job gomme djido ap o ruk bladedo his.

¹⁵ Deesh terne mursha, kai hidjran o Joabeskre chare, wan trul leste, un dan les mulo.

¹⁶ Koi phurdas o Joab i phurdepaskri, te djal o kurepen buder gar dureder. Un o Davideskre lurde mukan tele, te lenn le i Israelitarjen palla.

¹⁷ Un jon lan o Absalomes un witsran les an o weesh an i bari cheb, un tchiwan bud barra ap leste. Un o Absalomeskre lurde nashan penge, hakeno an peskro kheer.

¹⁸ Har o Absalom djiwas, penas lo: “Man hi kek tchawo, kai rikrell miro lab djido, te merell miro lab gar win.” Doleske tchiwas lo peske i baro bar pre un das ko bar peskro lab. Un jaake kharell ko bar bis kai diwes ‘O Absalomeskro bar’. Kowa hi ap o baro rajeskro them tardo.

O David shunell, kai o Absalom mulo hi

¹⁹ O Ahimaaz, koleskro dad o Zadok hi, penas ap o Joab: “Muk man te nashell, te penap o baro rajeske o latcho lab, kai las les o baro Dewel win dran i wasta kolendar, kai leskro merepen kaman.”

²⁰ “Na-a”, penas o Joab: “O baro rajeskro tchawo hi mulo. Tu nai peneh leske kai diwes kek latcho koowa. I wawar diwes nai peneh leske latcho koowa, kai diwes gar.”

²¹ Ap ko mursheste dran o them Etiopia, kai leskro budepaskro hi, penas o Joab: “Dja pash o baro rajeste, un pen leske, hoi tu dikal!” Un ko budepaskro parkras pes pash o Joab un nashas koi.

²² O Ahimaaz, koleskro dad o Zadok hi, penas pale ap o Joab: “Mu well, hoi wella. Me kamau ninna nashell ko mursheste dran Etiopia palla.” Penas o Joab: “Hoske kameh tu nashell, mo tchawo? Tu aneh leske kek latcho lab.”

²³ “Mu well, hoi wella”, penas o Ahimaaz. “Me nashau.” “Palle naash”, penas o Joab. Koi nashas o Ahimaaz ap ko drom, kai djal an koi tala Jordan, un was glan ko budepaskreste koi.

²⁴ O David his mashkral kol dui bare wudja beshdo. Un ko mursh, kai das garda, djas pral ap ko baro wudar an o foreskri massuri, dikas pes trujel, un dikas koi i murshes, kai nashell kokres.

²⁵ Job das tele gole, te penell lo kowa o baro rajeske. Koi penas o baro rai: “Te hi job kokres, penell job menge latcho koowa.” Un har ko mursh pash o foro was,

²⁶ dikas kowa, kai das garda, i duito murshes nashell, un das tele an ko baro wudar gole: “Koi well pale i mursh kokres!” Koi penas o baro rai: “Ninna kowa penell menge latcho koowa.”

²⁷ Kowa, kai das garda, penas: “Ko glanstuno nashell har o Ahimaaz, koleskro dad o Zadok hi.” Un o baro rai penas: “Kowa hi i latcho mursh un penell menge i latcho koowa.”

²⁸ O Ahimaaz das gole: “Lauter hi mishto!” Un job witsras pes glan o baro rajeste tele ap i phub ap peskro mui, un penas: “Sharedo well o baro Dewel, kai tiro Dewel hi, un das kolen an tiro wast, kai hadan pengro wast ap tute, miro baro rajeste.”

²⁹ Koi putchas o baro rai: “Djal miro tchaweske, o Absalomeske, mishto?” Penas o Ahimaaz: “Me dikom i baro tchingepen, har bitchras o Joab o baro rajeskro budepaskro un man, tiro budepaskro. Me djinau gar, hoi koi his.”

³⁰ O baro rai penas: “Dja ap i rig un atch koi tardo!” Un job djas ap i rig un atchas koi tardo.

³¹ Koi was ko mursh dran Etiopia un penas: “Ake, anau tuke i latcho lab, miro baro rai. O baro Dewel kras, te less tu kai diwes tiro tchatchepen. Job las tut win dran i wasta lauterendar, kai hadan pen ap tute.”

³² Penas o baro rai ap ko mursheste: “Djal miro tchaweske o Absalomeske ninna mishto?” Penas ko mursh: “Miro baro rai, mu djal kolenge, kai kamenn tiro merepen, jaake har djas ko terno mursheske, ninna lauterenge, kai tchilatchepah ap tute djan.”