2. Rajengro liil 24 - O Debleskro Drom 2021 (Sinte)

¹ An ko tsiro, har o Jojakim o baro rai his, djas o baro rai dran o them Babilonia peskre lurdentsa pre ap o them Juda. Leskro lab his Nebukadnezar. Un o Jojakim hunte witsras pes tel leste un hunte plaissras leske bud lowe. Pal triin bersha phagas lo leha un kras buder gar, hoi kowa kamas.

² Un o baro Dewel mukas bud lurden pral leste te well, kai trujel djan un randan an o them Juda. Kolla wan dran i themma Babilonia, Syria, Moab, un Ammon, un kran o them paash. Kowa was jaake, har o baro Dewel rakras ap peskre rakepangre, kai leske koi his, un har jon kowa i menshenge dureder penan.

³ Tchatchepah koi bibacht was jaake pral i menshende an o them Juda, har o baro Dewel penas, te tchiwell lo len pestar krik ko bud tchilatchepaske, hoi o Manasse kras. Kowa anas i menshen o Debleskro dromestar tele,

⁴ un maras bud sawen, kai kek tchilatchepen kran, un anas lengro rat pral peste. Un o tselo foro Jerusalem his pherdo rat. Kau koowa kamas o baro Dewel gar te bistrell.

⁵ Kowa, hoi budeder penepaske hi pral o Jojakim, un halauter, hoi lo kras, kowa hi tchinlo an i familjakro liil i bare rajendar pral o them Juda.

⁶ Un o Jojakim meras un was paskedo pash peskre phurende. Un leskro tchawo, o Jojachin, was baro rai pal leste.

⁷ Un o baro rai pral o them Egiptia djas buder gar dran peskro them win. O baro rai pral o them Babilonia las leske halauter krik, hoi lo peske dren las: o tselo them mank o them Egiptia un o pani Eufrat.

O Jojachin well baro rai pral Juda

⁸ Deesh-te-ochta bersh his o Jojachin, har lo baro rai was. Un job his baro rai triin tchonna, un djiwas an ko tsiro an o foro Jerusalem. Leskri dai kharas Nehushta. Lakro dad his o Elnatan dran o foro Jerusalem.

⁹ Un o Jojachin kras, hoi djungeles his an o baro Debleskre jaka, jaake har leskro dad ninna kras.

¹⁰ An ko tsiro bitchras ko rai pral o them Babilonia, o Nebukadnezar, peskre lurden pash o foro Jerusalem. Un jon tchiwan pen trul ko tselo foro, te nai nashell kek dran o foro win te dren.

¹¹ Un o Nebukadnezar was pash ko foro, har leskre lurde ninna koi tardo his, un mukan kekes dren te win.

¹² Un o Jojachin, ko rai pral o them Juda, das pes an i wasta ko rajestar dran o them Babilonia, un djas win pash leste: job un leskri dai un leskre pralstune budepangre un bare lurde, ninna kol raja, kai an leskro kheer his. Un o Nebukadnezar, ko baro rai dran o them Babilonia, tchiwas les stildes. An ko tsiro his o Nebukadnezar an o ochtato bersh baro rai.

¹³ Un job las peske o tselo brawlepen, hoi his an o baro Debleskro kheer un an o rajeskro kheer. Un kol tsele sonakangre koola, hoi mukas o Israeleskro rai, o Salomo, te krell o baro Debleskro khereske, kowa mukas o Nebukadnezar khetne te dell. Lauter was jaake, har o baro Dewel les penas.

Menshe dran Juda wenn o ersto kopo krik anlo an o them Babilonia

¹⁴ Un o Nebukadnezar anas i tsele menshen dran o foro Jerusalem an peskro them Babilonia, i pralstune, i bare lurde, un i tsele budepangre, kai nai budran mishto o kashteha un o sasteha. Kolla lauter his 10.000 (deesh serja) pandle. Kek atchas pale, kokres i tchorwele an o them.

¹⁵ Un job mukas an o them Babilonia te anell: o Jojachin un leskri dai un leskre romja; kol raja, kai an leskro kheer his; ninna pandas lo an o foro Jerusalem i pralstunen pral o them Juda, un anas len an o them Babilonia;

¹⁶ koi pashel 7.000 kol feteder murshendar; un 1.000 mursha kolendar, kai nai budran mishto o kashteha un o sasteha; un i tsele kurepangre. Kolen lauteren anas lo an o pandepen an o them Babilonia.

¹⁷ Un o baro rai pral o them Babilonia las o Jojachineskro kak, – leskro lab his Mattanja – un kras, te well lo o baro rai pal o Jojachin pral o them Juda, un das les i wawar lab, un kharas les Zedekja.

O Zedekja well baro rai pral Juda

¹⁸ Biish-te-jek bersh his o Zedekja, har lo baro rai was; un deesh-te-jek bersha his lo baro rai an o foro Jerusalem. Leskri dai kharas Hamutal. Lakro dad his o Jirmeja dran Libna.

¹⁹ Un o Zedekja kras, hoi djungeles his glan o baro Debleskre jaka, jaake har o Jojakim ninna kras.

²⁰ Kowa halauter kras o baro Debles jaake chojedo pral o foro Jerusalem un o them Juda, te tradas lo len pestar krik. Un o Zedekja phagas o baro rajeha pral o them Babilonia, un kras buder gar, hoi kowa kamas.