2. Mose 40 - O Debleskro Drom 2021 (Sinte)

O Debleskro plachteno kheer well pre tardo

¹ O baro Dewel rakras o Moseha un penas:

² Tchip o Debleskro plachteno kheer pre ap o ersto diwes an o ersto tchon.

³ Un tchip ko mochton dren, kai o Debleskre deesh laba dren hi. Glan o mochton pande ko kutch kotar than pre!

⁴ An ninna koi chapaskri dren un tchip i Debleskre mare pre! Ninna koi momelengri tchip an o kheer, un tchip i momlia pre.

⁵ Glan o mochton, kai o Debleskre deesh laba dren hi, tchip o sonakaskro bob, kai sungepaskro koowa chatchedo wella! Un an o wudar pande koi bari plachta pre!

⁶ Glan o Debleskro plachteno kheer tchip i sasterni chatchepaskri, kai i vieche o Debleske chatchedo wenna.

⁷ Mank o kheer un i sasterni chatchepaskri tchip o thopaskro tcharo un tchore pani dren!

⁸ Trul i platsa glan o kheer tchip i pesse kashta pre, un pande kol laintikre kotja mank lende! Un an o wudar glan i platsa pande koi bari plachta pre!

⁹ Le ko makepaskro djet un mak leha o kheer un lauter, hoi koi dren hi, te well lo o Debleske!

¹⁰ Mak ninna i sasterni chatchepaskri un lakre tsele koola, te well li o Debleske un leske kokres!

¹¹ Mak ninna o thopaskro tcharo un kol herja, ap kolende o tcharo tardo hi, te well lauter o Debleske.

¹² Pen o Aroneske un leskre tchawenge, te wenn le glan o Debleskro plachteno kheer, un thob len!

¹³ Rib o Aroneske o rashajeskre ripja an, mak les o djeteha, te well lo miro rashai.

¹⁴ An ninna leskre tchawe koi un rib lenge i rashajengre gada an!

¹⁵ Un mak len o djeteha jaake har makal lengro dad, te wenn le mire rashaja. Jon un lengre tchawe pal lende te wenn le maklo o djeteha, te wenn le mire rashaja hako tsireske.

¹⁶ O Mose kras lauter har o baro Dewel leske penas.

¹⁷ Jaake was o Debleskro kheer pre tardo an o duito bersh ap o ersto diwes an o ersto tchon.

¹⁸ O Mose tchiwas i tchinle kashta ap herja un pandas len i pandepangre kashtentsa khetne. Palle wan i pesse kashta pre tardo.

¹⁹ Un koi pral tchiwas lo kol dui ledertikre plachte, hoi tchakrenn o kheer. Lauter kras lo jaake har o baro Dewel leske penas.

²⁰ Un job las i barra, kai o Debleskre deesh laba dren tchinlo hi, un tchiwas len an o sonakaskro mochton, un tchiwas i hidjepaskre kashta an i gustria ap o mochton. Un pral ap o sonakaskro mochton tchiwas lo o pralstuno kotar, hoi sikrella, kai o baro Dewel peskre menshenge latcho hi.

²¹ Un job anas o mochton an o kheer un pandas ko kutch kotar than glan o mochton, te well lo gar diklo. Job kras kowa jaake, har o baro Dewel leske penas.

²² Un job anas i chapaskri an o kheer un tchiwas lat glan o kutch kotar than ap i serwi rig,

²³ un tchiwas o Debleskre mare pre glan o baro Debleste. Job kras kowa jaake har o baro Dewel leske penas.

²⁴ Ap i tchatchi rig an o kheer, wergel i chapaskri, tchiwas lo i momelengri,

²⁵ un tchiwas i momlia pre jaake har o baro Dewel leske penas.

²⁶ Glan o kutch kotar than tchiwas lo o sonakaskro bob,

²⁷ un chatchras ap leste kutch sungepaskro koowa. Job kras les jaake har o baro Dewel leske penas.

²⁸ An o khereskro wudar pandas lo koi bari plachta.

²⁹ Win glan o khereskro wudar tchiwas lo i sasterni chatchepaskri, un ap leste chatchras lo viechen un chapen o baro Debleske, jaake har job leske penas.

³⁰ Mank o kheer un i sasterni chatchepaskri tchiwas lo o thopaskro tcharo un tchoras pani dren thopaske.

³¹ Un o Mose, o Aron un leskre tchawe thowan pengre wasta un herja koi dren.

³² Jon hunte thowenn pen hako kopo, kai djan le an o Debleskro plachteno kheer un pash i sasterni chatchepaskri. Jaake penas kowa o baro Dewel o Moseske.

³³ Un trul o kheer un i sasterni chatchepaskri tchiwas lo i pesse kashta pre un pandas kol laintikre kotja mank lende, te was i platsa. Un an o wudar glan i platsa tchiwas lo koi bari plachta. Jaake kras o Mose koi tseli budi.

O baro Dewel well an peskro kheer

³⁴ Koi was i wolka ap o Debleskro plachteno kheer. Un o kheer was pherdo railepen o baro Deblestar.

³⁵ Un har i wolka pral o kheer atchas un o kheer pherdo railepen o baro Deblestar his, nai djas o Mose gar dren.

³⁶ Hako kopo, kai hadas pes i wolka, djan i Israelitarja dureder jaake rah, har his le ap pengro drom an o mulo tato them.

³⁷ Te atchas i wolka pral o Debleskro kheer, atchan le kote un djan gar dureder jaake rah bis te hadas li pes.

³⁸ Un i tsele Israelitarja dikan koi wolka. Ap o diwes his li pral o Debleskro kheer, ap i rat his li pherdi jag jaake rah har i Israelitarja ap o drom his.