2. Mose 37 - O Debleskro Drom 2021 (Sinte)

O sonakaskro mochton

¹ Un o Bezalel kras ko mochton dran akatstikro kasht, 125 (sheel-te-biish-te-pantch) centimetarja lengsto, un 75 (efta-desha-te-pantch) centimetarja buchlo un ninna jaake pral.

² Dren un win tchiwas lo latcho sonakai pre, un kras i sonakaskro pandepen trujel.

³ Un job kras star sonakangre gustria un tchiwas len ap hake star herja, dui ap haki rig.

⁴ Ninna kras lo lengste kashta dran akatstikro kasht, tchiwas sonakai trul lende,

⁵ un tchiwas len an kol gustria, jaake te nai hidjrenn le ko mochton trujel.

⁶ Un job kras o pralstuno kotar, hoi tchakrell o mochton dran latcho sonakai. Kowa his 125 (sheel-te-biish-te-pantch) centimetarja lengsto un 75 (efta-desha-te-pantch) centimetarja buchlo.

^7-8 Un job kras dui bolepangre, hakenes dran jek kotar sonakai, un tchiwas ko jekes glan ap o pralstuno kotar un ko wawares palla ap o pralstuno kotar.

⁹ Un kol bolepangre hadan pengre mussja pre un tchakran lentsa o pralstuno kotar. Un lengre shere dikan pen an. Un lengre jaka dikan tella ap o pralstuno kotar.

O Debleskri chapaskri

¹⁰ Un job kras koi chapaskri dran akatstikro kasht, jek metari lengsto, i paash metari buchlo un 75 (efta-desha-te-pantch) centimetarja pral,

¹¹ un tchiwas latcho sonakai trul late. Ninna tchiwas lo i sonakaskro pandepen trul late.

¹² Trul i chapaskri tchiwas lo i tikno kasht ap haki rig, hoi i wast buchlo hi. Un trul ko tikno kasht was ninna i sonakaskro pandepen.

¹³ Un job kras star sonakangre gustria un pandas len ap kol star herja,

¹⁴ tel ko tikno kasht, hoi djal trul i chapaskri, jaake te nai tchiwan le lengste kashta dren, te hidjrenn le koi chapaskri.

¹⁵ Un job tchinas kol lengste kashta dran akatstikro kasht, te nai hidjrenn le koi chapaskri, un tchiwas sonakai trul lende.

¹⁶ Un job kras ninna ko tselo koowa, hoi ap i chapaskri well, dran latcho sonakai: tchare un khore, an kolende i mool o Debleske dren anlo well.

I momelengri

¹⁷ Un job kras koi momelengri dran jek kotar latcho sonakai: Lakro piro un ko mashkralstuno kotar un kol tchare. Ap kolende hi blume, sawe, hoi pandlo hi un sawe, hoi pre hi.

¹⁸ Shob mussja djan dran i momelengri win, triin ap jek rig un triin ap i wawar rig.

¹⁹ Ap haki mussi hi triin tchare, hoi win dikenn har blume, sawe, hoi pandlo hi un sawe, hoi pre hi.

²⁰ Ap ko mashkralstuno kotar hi star tchare, hoi win dikenn har i blume, sawe, hoi hi pandlo, un sawe, hoi hi pre.

²¹ Hako kopo hi jek bluma, hoi pandlo hi, tel dui kol shob mussjendar, hoi dran o mashkralstuno kotar win djan.

²² Un kol blume un i mussja hi leha khetne kerdo dran jek kotar latcho sonakai.

²³ Un ninna dran latcho sonakai kras lo kol efta momlia, lengre tchinepangre, kolentsa i dorja an i momlia tele tchinlo wenna, un i tchare, kai i momelengri tchik dren wella.

²⁴ Les hunte was jek zentnari latcho sonakai, te krell lo kai momelengri un lakro tselo koowa.

O sonakaskro bob

²⁵ Job kras ninna i bob dran akatstikro kasht. Koi pre well sungepaskro koowa chatchedo. Ko bob his i paash metari lengsto un ninna jaake buchlo un jek metari pral. Ap hake star rigja, kote, kai le khetne wenna, was i kotar win, hoi win dikella har i shing.

²⁶ Job tchiwas latcho sonakai trul o bob, pral pre un ninna ap i star rigja un ap i shinga. Un tchiwas i sonakaskro pandepen trul o bob.

²⁷ Ap i dui rigja tchiwas lo dui sonakangre gustria tel o sonakaskro pandepen, te nai tchiwenn le lengste kashta dren un jaake te hidjrenn le les.

²⁸ Un kol lengste kashta kras lo dran akatstikro kasht, un tchiwas sonakai trul lende.

²⁹ Un job kras o makepaskro djet, koleha jon o Debleskro koowa dren makenn. Ninna kras lo ko kutch sungepaskro koowa, hoi chatchedo well. Kowa lauter kras job jaake har kolla, kai kowa mishto haiwenna.