2. Mose 17 - O Debleskro Drom 2021 (Sinte)

O baro Dewel dell len pani te pijell

¹ Un i tsele Israelitarja djan win dran o mulo tato them, hoi kharella Sin, un djan dureder hako kopo har o baro Dewel les lenge penas. Un jon wan ap i platsa, hoi kharella Refidim. Kote his kek pani te pijell.

² Un jon tchingran ap o Moseste un penan: “De men pani te pijell!” Un o Mose penas: “Hoske tchingrenn tumer ap mande? Hoske patsenn gar, te hi o baro Dewel pash mende un dell men kowa, hoi men hunte wals?”

³ Un lengri trush was jaake baro, te penan le i choljatar ap leste: “Hoske lal tu men dran o them Egiptia win? Kameh, te meras mer kate i trushatar, mer un mare tchawe un mare vieche?”

⁴ Kote das o Mose ap o baro Debleste gole: “Hoi krap me kal menshentsa? An i tikno tsiro witsrenn le man i barrentsa mules.”

⁵ Un o baro Dewel penas ap leste: “Le murshen kol phurendar tuha un dja lentsa glan i Israelitarja! Le ninna ko kasht an tiro wast, hoi dal ap o pani Nil!

⁶ Un me tchiwau man glan tute tardo ap o baro bar pash i berga Horeb. Un palle dess tu ap o baro bar, un dran leste nashella pani, jaake te well len te pijell.” Un o Mose kras kowa jaake glan i jaka kol phurendar.

⁷ Koi platsa, kai i menshe tchingran ap leste un kai jon gar patsan, te hi o baro Dewel pash lende un dell len kowa, hoi len hunte well, koi platsa das o Mose i laba ‘Massa’ un ‘Meriba’.

I Israelitarja hi sorleder har i Amalekarja

⁸ Har i Israelitarja an Refidim his, peran i Amalekarja pral lende.

⁹ Un o Mose penas ap o Josua: “Rode menge mursha win un dja lentsa an o kurepen un denn i Amalekarja! Taissar kamau me man ap koi berga tardo te tchiwell, o Debleskro kasht an miro wast.”

¹⁰ Un o Josua kras, hoi o Mose leske penas, un anas i Israelitarja an o kurepen. Un jon kuran pen kol menshentsa Amalek. Un o Mose djas pre ap i berga. Khetne leha djan o Aron un o Hur.

¹¹ Un jaake djas, te hidjrell o Mose peskre mussja pre, palle his o Israel sorleder har o Amalek. Te mukell lo i mussja tele, palle his o Amalek sorleder.

¹² Har o Moseskre mussja leske phares wan, lan kol dui wawar i bar, te beshell lo pes. Un jek tchiwas pes tchatches un jek serwes pash leste tardo, un jon rikran leskre mussja pre. Jaake kran le bis te o kham tele djas.

¹³ Un o Josua das i Amalekarja temerl.

¹⁴ Palle penas o baro Dewel ap o Moseste: “Tchin kawa pre, te bistrenn le kowa gar! Un rake les o Josua an o dji, te bistrell lo kau kurepen gar. Un pen leske ninna, te kamau me te marap i tsele Amalekarja jaake, te wenn le hakenestar bistedo ap kai phub.”

¹⁵ Un o Mose kras i chatchepaskri o Debleske, te wenn kote vieche chatchedo o Debleske, un das koi chatchepaskri o lab ‘O baro Dewel krell man soreles an o kurepen’.

¹⁶ Un o Mose penas: “Kowa was, har hadom mire wasta pre ap o baro Debleste. An ko tsiro, hoi wella, dell o baro Dewel i Amalekarja pale te pale.”