2. Mose 11 - O Debleskro Drom 2021 (Sinte)

I deeshti phagi: I phureder mursh tchawe un vieche merenna

¹ Palle penas o baro Dewel ap o Mose: “Jek wawar bibacht kamau me pral o Farao un pral o tselo them Egiptia te anell. Pal koja mukell lo tumen te djal. Un kowa hi gar doha: job tradell tumen win.

² Jaake pen kanna ap i Israelitarja, te mangell hako rom peske rup un sonakai ko egiptikro murshestar, kai langs leste djiwella. Ninna haki romni mangell kowa koi egiptikri djuwjatar, kai langs late djiwella.”

³ Un o baro Dewel kras, te wenn i Egiptarja latches ap lende. Ninna his o Mose bud an-diklo an o them Egiptia an i jaka kol pralstunendar an o Faraeskro kheer un ninna pash i tsele Egiptarja.

⁴ Har his o Mose gomme pash o Farao, penas lo leske: “Kawa penell o baro Dewel: Mashkral an i rat kamau me mank o them Egiptia te djal.

⁵ Palle merenna i tsele mursh tchawe an o them Egiptia, kai hi i phureder tchawe pengre dajendar: o Faraeskro phureder tchawo, kai ap o rajeskri beshepaskri beshdo hi, un ninna o phureder tchawo kol djuwjatar, kai dran o djob jarro krella. Un ninna kol mursh vieche, kai hi i phureder tchawe pengre dajendar hunte merenn.

⁶ Un palle well i baro ropen an o tselo them Egiptia, jaake har his gomme kek ropen un well buder kek ropen.

⁷ Hi wawartchandes pash i Israelitarja. Kote dell kek djuklo gole, gar ap i mensheste, witar gar ap i viecheste. Jaake te dikenn un haiwenn tumer, te djinell o baro Dewel, koon Egiptari hi un koon Israelitari hi.

⁸ Palle wenna tire pralstune lauter pash mande un witsrenn pen glan mire pire tele un mangenn man an un penenn: ‘Djan tumenge, tu un tire tsele menshe, djan!’ Un palle djah mer menge.” Un mulo chojedo djas o Mose peske dran o Faraeskro kheer win.

⁹ Jaake was kowa tchatcho, hoi o baro Dewel penas ap o Mose: “O Farao shunella gar ap tumende, jaake te krau bud un baro koowa, un sikrau miri soor an o tselo them Egiptia.”

¹⁰ Un o Mose un o Aron kran ko tselo baro koowa an o Debleskri soor glan o Farao. Un o baro Dewel pandas leskro dji, te mukas lo i Israelitarjen gar dran peskro them te djal.