1. Timoteo 3 - O Debleskro Drom 2021 (Sinte)

I phureder mank i patslende

¹ Kowa, hoi kanna penau, hi tchatcho. Te kamell jek i phureder te well mank i patslende, kowa kamell i latchi budi.

² I phureder hunte djiwell jaake, te hatsell kek i doosh ap leste. Les well gar budeder har jek romni. Job rakrell kek dinelo koowa, un dell pes jak, hoi job rakrell un krell. Job mukell pes gar an djungelo koowa te tserdell. Job lell i wawaren latches an peskro kheer dren. Job sikrell mishto o Debleskro drom.

³ Job hi kek pipaskro. Job hi kek marepaskro. Les hi i baro dji i wawarenge. Job hi kek tchingepaskro. Job hi gar pal i lowe.

⁴ Job hi i latcho rai pral peskro kheer. Leskre tchawe shunenn ap leste.

⁵ Hi kau mursh kek latcho rai pral peskro kheer, nai well lo witar gar i latcho rai pral i patslende, kai wenn khetne an o Debleskro lab.

⁶ I phureder mank i patslende hunte well gar newes an o patsepen, te nai phurdell lo pes gar pre. Te phurdas pes lo pre, nai tserdell les o beng o Debleskro dromestar tele.

⁷ I phureder hunte well jek, pral koleste ninna kol menshe, kai gar patslo hi, mishto rakrenna. Jaake hunte ladjell lo pes gar, un perell gar an o bengeskro wast.

I budepangre an o Debleskro kheer

⁸ Jaake har i phureder mank i patslende hunte djiwenn latches glan i menshengre jaka, jaake hunte djiwenn kolla ninna, kai budrenn i patslenge an o Debleskro kheer. Jon te rakrenn gar dui tchipjentsa. Jon te wenn kek pipangre. Jon te nashenn gar pal i lowe.

⁹ Jon hunte rikrenn soreles ap o tchatchepen, hoi o Dewel sikras. Lengro patsepen hunte well dran i djudjo dji.

¹⁰ Lenn tumen i tsiro, te dikenn tumer, har jon djiwenna. Te nashte rakrell kek pral lende djungelo koowa, palle nai budrenn le i patslenge an o Debleskro kheer.

¹¹ I djuwja, kai hi i patslenge koi, hunte djiwenn ninna latches glan i menshengre jaka. Jon rakrenn kek chocheno koowa pral i wawarende. Jon rakrenn kek dinelo koowa. Jon krenn pengri tseli budi mishto.

¹² I mursh, kai budrella i patslenge an o Debleskro kheer, les well gar budeder har jek romni. Job hunte well i latcho dad peskre tchawenge, un i latcho rai pral peskro kheer.

¹³ Kol budepangre, kai pengri budi mishto krenna, kolla wenn an-diklo pash i patslende, un pash o Debleste. Un len hi kek daar, te rakrenn le pral pengro patsepen ap o Jesus Kristeste.

Baro hi o Debleskro tchatchepen

^14-15 Me kamau te wap sik pash tute. Te nai wau gar jaake sik, djineh tu kanna, har te krenn le lauter an o Debleskro kheer. Doleske tchinom tuke kau liil. I patsle hi o kheer o djido Deblestar. Jon rikrenn pen soreles ap o Debleskro tchatchepen. Jon hi har kol telstune barra, hoi o kheer khetne rikrenna.

¹⁶ Tchatchepah, an maro patsepen hi i baro tchatchepen: O Debleskro tchawo was i mensho. Hoi job kras, hi tchatcho. Ko sikras men o Debleskro Ducho. I bolepangre dikan ap leste. An i tsele themma rakran le lestar. Ap i tseli phub patsan le ap leste. An o bolepen las les o Dewel pash peste.