1. Samuel 7 - O Debleskro Drom 2021 (Sinte)

¹ Un kol mursha dran Kirjat-Jearim wan un lan o mochton o baro Deblestar. Un jon anan les an o kheer i murshestar, kai kharas Abinadab. Kowa djiwas ap i tikni berga. Un leskro tchawes, o Eleasar, rodan le win, te dell lo jak ap o mochton.

O Samuel well tchatchepaskro rai pral o Israel

² Ko mochton, kai o baro Debleskre deesh laba dren hi, atchas i rah tsiro an Kirjat-Jearim, jaake biish bersha. An ko tsiro putchan i Israelitarja pale pal o baro Debleste.

³ Kote penas o Samuel ap lende: “Te kamenn tumer tumaro tselo djijeha pale ap o baro Debleskro drom te djal, palle tchiwenn i chochene deblen tumendar krik, ninna i debletsa Astarte! Patsenn ap o baro Debleste, un mangenn les kokres an un kek wawares! Palle lell job tumen win dran i wasta i Filistarendar.”

⁴ Un i Israelitarja tchiwan i chochene deblen krik, kai kharenn Baal un Astarte, un mangan kokres o baro Debles an.

⁵ Un o Samuel das i tsele murshen an Israel khetne gole an Mizpa, te mangas lo lenge o baro Deblestar.

⁶ Un jon wan khetne an Mizpa. Kote lan le pani, un tchoran les glan o baro Debleste win. Un ap ko diwes chan le tchi, te dikell o baro Dewel ap lende. Un jon penan: “Mer anam doosh ap mende glan o baro Debleste.” Un kote an Mizpa was o Samuel lengro tchatchepaskro rai.

⁷ Har i Filistarja shunan, te wan i Israelitarja khetne an Mizpa, djan lengre raja pengre lurdentsa win, te kurenn le pen i Israelentsa. Har i Israelitarja kowa shunan, tapras len i bari daar.

⁸ Un jon penan ap o Samuel: “Muk gar tele, te mangess menge maro baro Deblestar, te lell lo men win dran i wasta kol Filistarendar.”

⁹ Un o Samuel las i terno bakro, hoi gomme thud pijas, un maras les un chatchras les tseles o baro Debleske. Un job das ap o baro Debleste gole, un mangas les o Israeleske. Un o baro Dewel shunas ap leste.

¹⁰ Un har job gomme o bakres chatchras, wan i Filistarja te kurenn le pen i Israelentsa. Un o baro Dewel mukas o bolepen bari gole te dell pral lende ap ko diwes, jaake te tapras kol Filistarjen i bari daar, un jon nashan penge glan i Israelitarja.

¹¹ Un i Israelitarja djan win dran Mizpa, un lan len palla jaake dur har Bet-Kar, un dan len mulo ap o drom.

¹² Un o Samuel las i bar un tchiwas les pre mashkral Mizpa un Shen, un das les o lab Eben-Eser, un penas: O tselo drom his o baro Dewel ap mari rig.

¹³ Jaake peras i ladj ap i Filistarja. Un jon wan buder gar an o Israeleskro them. Un o wast o baro Deblestar his phares tchiddo ap lende, jaake rah har o Samuel djiwas.

¹⁴ Un o Israel las peske kol forja pale, kolen i Filistarja lendar krik lan an o them mank Ekron un Gat. Kal forja las o Israel win dran i wasta i Filistarendar. Un ninna mank i Israelitarja un i Amorarja his buder kek kurepen.

¹⁵ Un jaake rah har o Samuel djiwas, his job o tchatchepaskro rai pral o Israel.

¹⁶ Un hako bersh djas lo an Betel un Gilgal un Mizpa un rakras kote o tchatchepen win pral i menshende.

¹⁷ Palle djas lo pale an Rama, kai lo khere hi, un rakras kote o tchatchepen win pral i Israelitarja. Ninna kote kras lo i chatchepaskri, kai tchomone chatchedo well o baro Debleske.