1. Samuel 18 - O Debleskro Drom 2021 (Sinte)

O Sauleskro tchawo Jonatan well o Davideskro maal

¹ Un pal kol laba, hoi o David o Sauleha rakras, las o Jonatan i kamlepen o Davideske an o dji, un job kamas les peskro tselo djijeha har peskro djipen.

² Un o Saul las les ap ko diwes an peskro kheer, un mukas les buder gar pale an peskro dadeskro kheer te djal.

³ Un o Jonatan un o David dan pen sowel, te hi le mala. O Jonatan kamas les budeder har peskro djipen,

⁴ un riwas peskri baja win un das lat o Davideste, ninna peskre kurepaskre koola, peskro charo, peskro bogo un peskri pereskri dori.

O Saul silwerell ap o Davideste

⁵ Un o David djas o Sauleske an o marepen, un lauter, hoi job an o wast las, djas leske mishto. Un o Saul hadas les pral i lurden, te well lo lengro pralstuno. Un i tsele Israelitarja kaman les. Un ninna bare mursha an o Sauleskro kheer kaman les.

⁶ Ap ko diwes, kai i lurde pale wan, un o David o Filistares mulo das, koi nashan i djuwja win dran i tsele forja an o them Israel, te wenn le pash o baro rajeste Saul. Un jon giwan un khelan, dan gole i bachtjatar, un dan ap pengre tikne pauke, un bashran ap pengre bashepangre.

⁷ Un an lengri gili penan le: “O Saul das i sero murshen mulo un o David deesh-serja.”

⁸ Kote tapras o Saules i bari choli, un kau gili his gar shukar an leskre jaka. Un job penas: “Jon dan o Davides deesh-serja, un man dan le kokres jek sero. Kowa hoi les kanna gomme gar hi, hi o rajeskri beshepaskri.”

⁹ Pal ko diwes un an ko tsiro, hoi was, dikas job tchilatche jakentsa ap o Davideste.

¹⁰ O wawar diwes mukas o Dewel o tchilatcho duches pral o Sauleste te well. Un job was diwjes an peskro kheer. I harfa an o wast bashras o David o Sauleske, jaake har job hako diwes kras. Un o Saules his i witsepaskro tchuri an o wast.

¹¹ Un hadas peskro wast un penas peske: “Me kamau o Davides an i wanta tchurje te dell.” O David stas dui kope ap i rig, un o Saul nai tapras les gar.

¹² O baro Dewel his o Davideha un buder gar o Sauleha. Doleske daras o Saul o Davidestar.

¹³ Un bitchras les krik pestar, un tchiwas les pral jek sero lurdende, te well lo lengro pralstuno. Un o David djas glan kol lurdende an o kurepen.

¹⁴ Un leske djas halauter mishto, un o baro Dewel his ap leskri rig.

¹⁵ Un har o Saul kowa dikas, daras lo gomme budeder lestar.

¹⁶ O tselo Israel un o tselo Juda kaman les, har dikan le, hawo latcho kurepaskro job hi.

O David romedinerell o Sauleskri tchat

¹⁷ Un o Saul penas peske: “Miro wasteha kamau gar o Davides te marell. I Filistarja mu denn les mulo.” Doleske penas lo ap o David: “Me kamau tut miri phureder tchat, i Merab, te dell, te romedineress lat. Tu, ab i tchatcho mursh un kure tut mishto an o baro Debleskro kurepen.”

¹⁸ Un o David penas ap o Saul: “Koon hom me? Un koon hi mire menshe un miro dadeskro kheer an Israel, te wap me o baro rajeskri tchakro rom?”

¹⁹ Un an ko tsiro, kai o Sauleskri tchai, i Merab, hunte wals o Davides dino, koi dan le lat o murshes Adrijel dran Mehola.

²⁰ I Michal, i wawar tchai o Saulestar, kamas o Davides. Har shunas o Saul kowa, his leske kowa mishto jaake.

²¹ Un o Saul penas: “Me kamau lat leste te dell. Palle hi man tchomone an o wast, koleha nai tradau les an i wasta i Filistarendar.” Un o Saul penas ap o Davideste: “Kau diwes wess tu o duito kopo miri tchakro rom.”

²² Ap leskre pralstune budepangre penas lo: “Rakrenn tchorchanes o Davideha un penenn leske: ‘Tu djineh, te hal shukar an o baro rajeskre jaka, un leskre tsele pralstune budepangre kamenn tut. Jaake ab, te wess leskri tchakro rom.’”

²³ Un i pralstune budepangre o Saulestar rakran kol laba ap o Davideste. Un o David penas: “Hi tumenge kowa i tikno koowa te well jek o baro rajeskri tchakro rom? Me hom i tchorwelo mursh un gar an-diklo.”

²⁴ Un i pralstune budepangre o Saulestar djan pash leste un penan leske, hoi o David penas.

²⁵ Un o Saul penas: Jaake penenn ap o David: “O baro rai kamell tchi wawares, hoi hunte dess leskro tchake, har o murshkano mass sheel mule Filistarendar. Job kamell lenge o tchilatchepen pale te dell, hoi le ap leste kran.” Tchatchepah kamas o Saul te perell o David an o wast i Filistarendar, un jon te denn les mulo.

²⁶ Un leskre pralstune budepangre penan kowa jaake o Davideske. Un o Davideske his shukar, te nai well lo o baro rajeskri tchakro rom. Un ko tsiro his gomme gar trujel, hoi le leste dan,

²⁷ koi kras lo pes ap o drom un djas peskre lurdentsa an o kurepen, un das dui-sheel Filistarjen mulo. Un o David las kol tsele dui sheel mulendar lengro murshkano mass tele, un anas les o baro rajeske, te well lo leskri tchakro rom. Un o Saul das les peskri tchat Michal, te well li leskri romni.

²⁸ Un o Saul dikas un haiwas te hi o baro Dewel o Davideha, un ninna, te kamell leskri tchai Michal les o tselo djijeha.

²⁹ Koi daras o Saul o Davidestar gomme budeder, un peskro tselo djipen kamas lo leske tchilatchepen te krell.

³⁰ Un bud kope an o marepen i Filistarentsa his o David sorleder har hako wawar o Sauleskre pralstune lurdendar. Un o Davideskro lab was sharedo un hadedo.