1. Samuel 1 - O Debleskro Drom 2021 (Sinte)

I Hanna mangell o baro Deblestar i tchawes

¹ His i mursh i menshendar Efrajim. Kowa djiwas an o foro Ramatajim-Zofim an o pralstuno them Efrajim. Leskro lab his Elkana. Koleskro dad his o Jeroham, koleskro dad his o Elihu, koleskro dad his o Tohu, un koleskro dad his o Zuf.

² O Elkana, les his dui romja; koi jek kharas Hanna un koi wawar Peninna. Un kolat his tchawe. I Hannat his kek tchawe.

³ Un ko mursh djas hako bersh win dran peskro foro, te mangell lo an o foro Shilo o baro Debles an, ko rajes pral o bolepen un i phub, un te anell lo leske i vieches, hoi well leske maredo. Kote his dui phrala o baro Debleskre rashaja: o Hofni un o Pinhas. Kolengro dad his o Eli.

⁴ Te was ko diwes, kai anas o Elkana i vieches o Debleske, das job peskri romjat Peninna un lakre mursh tchawen un tchen, hakeneste jek kotar mass.

⁵ I Hannat das job dui kotja. Job kamas lat o djijestar, ninna te kras o baro Dewel lah jaake, te nai las li kek tchawe.

⁶ Un i Peninna, koi wawar romni, rodas, har te dukrell li lat, un kras lat i labentsa tele, doleske, kai nashte lell li kek tchawe.

⁷ Un jaake djas kowa hako bersh: Te djan le pre pash o baro Debleskro kheer, dukras i Peninna lat jaake. Palle rowas i Hanna un chas tchi.

⁸ O Elkana, lakro rom, penas ap late: “Hanna, hoske roweh tu? Un hoske chah tu tchi? Un hoske hi tiro dji jaake phares? Hom me tuke gar budeder moldo har deesh mursh tchawe?”

⁹ Har jon an Shilo his, stas i Hanna pre pal o chapen un o pipen, un djas an o baro Debleskro kheer. Kote his o rashai Eli beshdo glan o wudar.

¹⁰ Un lakro dji rowas, un joi mangas o baro Debles un rowas soreles ap leste,

¹¹ un das pes sowel un penas: “Tu, baro Dewel un rai pral o bolepen un i phub, tu te dikeh kanna tiri tchorweli budepaskretsa an, un bistreh lat gar, un deh tiri budepaskretsat i mursh tchawes, palle dau me les tute o tselo tsiro, hoi job djiwella. Un kek tchuri well ap leskre balla, hoi tchinals len tele.”

¹² Un har joi i rah tsiro o baro Debleha rakras, das o Eli jak ap lakro mui.

¹³ I Hanna rakras peske kokres an peskro dji. Ninna te djas lakro mui, har te rakrals li, nai shunas kek lakre laba. Kote patsas o Eli, te hi li mati.

¹⁴ Un o Eli penas ap late: “Har rah kameh tu gomme mati kate te atchell? Dja khere un sob tiro matepen win, te wess pale pash tute!”

¹⁵ I Hanna penas: “Ma rikrenn man mateske, miro rai! Mool pijom me gar un tchi wawar, hoi jekes mato krell. Me hom tchi wawar har i djuwel, kai lat i pharo dji hi. Un kowa tchorom win glan o baro Debleste.

¹⁶ Rike tiri budepaskretsat gar i djuwjake, kai tchi moldo hi. Miro dji hi phagedo un phares, doleske rakrom me kate jaake rah.”

¹⁷ Kote penas o Eli ap late: “Dja o Debleha! O Israeleskro Dewel dell tut kowa, hoi tu lestar mangal.”

¹⁸ Un joi penas: “Mu dikenn tire jaka kamles ap mande!” Un koi djuwel djas peskro drom, un chas, un dikas buder gar jaake phagedo win har glan kowa.

¹⁹ Un sik o wawar diwes stan le pre. Un har sharan le o baro Debles, djan le khere an Rama. Un o Elkana djas rati pash i Hannate dren. Un o baro Dewel bistras i Hannat gar un kras,

²⁰ te was li wawartchandes. Un har lakro tsiro was, las li i mursh tchawes, un das les o lab Samuel. Joi penas: “O baro Deblestar mangom les mange.”

I Hanna dell peskro tchawes o Debleste

²¹ O wawar bersh, har djas o Elkana pale pre peskri tseli familjah har hako bersh, te anell lo o baro Debleske i vieches, hoi well leske chatchedo, ninna jekes, te rikrell lo peskri sowel, hoi job das,

²² koi djas i Hanna gar lentsa. Joi penas ap peskro romeste: “Te pijell o tchawo buder gar ap o betch, kamau me les pre te anell glan o baro Debleste. Un job atchell palle koi, jaake rah job djiwella.”

²³ Un lakro rom Elkana penas ap late: “Kre jaake har tu kameh, atch kai, bis te job phuro doha hi. Mu rikrell o baro Dewel lauter, hoi job pral kau tchaweste penas!” Jaake atchas koi romni khere un das o tchawes o betch, jaake rah bis te job phuro doha his.

²⁴ Un har job phuro doha his, las li les peha, un djas leha pre an o foro Shilo. Un las koi pashel jek triin-bershengro gurum un deesh kilogramme jarro un jek ledertikro gono pherdi mool, un anas kowa pash o baro Debleskro kheer. O tchawo his gomme terno.

²⁵ Un jon maran o gurum, un anan o tchawes pash o Eli.

²⁶ Un joi penas ap o Eli: “Ach, miro rai, jaake har tchatcho hi, kai tu djiweh: Me hom koi djuwel, kai kate tardo his un o baro Deblestar mangas.

²⁷ Kau tchawes mangom mange o baro Deblestar. Un job shunas man un das les mande.

²⁸ Doleske dau les me kanna ninna o baro Debleste pale, te well lo leskro, jaake rah har job djiwella.” Un jon mangan kote o baro Debles an.