1. Mose 9 - O Debleskro Drom 2021 (Sinte)

O baro Dewel dell peskro lab, kai bitchrell job buder gar sawo baro pani pral i phub

¹ Un o Dewel rakras latche laba pral o Noah un pral leskre tchawende win un penas: “Anenn bud tchawen ap i phub, te well i phub tumendar pherdo!

² I tsele vieche ap i phub un i tsele tchirkle an o bolepen hunte darenn un trashenn tumendar. Halauter, hoi djiwella ap i phub, un i tsele matche an o baro pani, dau an tumare wasta.

³ Halauter, hoi djiwella, dau me tumende, te chan kowa nashte. Me dau les tumen te chal, jaake har dom tumen o senlepen.

⁴ Kokres o mass, kai hi gomme rat dren, kowa hunte chan gar; an o rat hi o djipen.

⁵ Kek hunte lell tumaro djipen. Hakeno koon lell tumaro djipen, kolestar lau me ninna leskro djipen: hako viechestar un hako menshestar.

⁶ O Dewel kras o menshes, jaake har job hi. Doleske hunte well kowa mulo dino i menshestar, kai i menshes mulo das.

⁷ Anenn tchawen ap i phub, – bud tchawen, te well i phub tumendar pherdo!”

⁸ Un o Dewel penas ap o Noah un ap leskre tchawende:

⁹ “Shunenn, me dau tumen miro lab un dau miro wast koi pre. Ko lab hi tumenge un tumare tchawenge, kai pal tumende wenna,

¹⁰ un lauterenge pash tumende, hoi djido hi, – lauterenge, kai djan win dran o panjeskro kheer: hake tchirkle un hake vieche ap i phub, kolla, kai diwje hi un kolla, kai gar diwje hi.

¹¹ Kowa hi ko lab, kai dau miro wast koi pre: Me anau buder gar sawo baro pani pral i phub, te tassell hako djipen ap i phub. Sawo baro pani well buder gar pral i phub.”

¹² Un o Dewel penas: “Me dau tumen i sikepen, te djinenn tumer, ko lab, hoi dom me tumende un hake viechende pash tumende, ninna lauterende, kai wenna pal tumende, ko lab atchella hako tsireske:

¹³ Me tchiwom miro brishineskro bogo an o bolepen. Te dikenn les, djinenn tumer, kai well buder gar sawo baro pani pral i phub.

¹⁴ Hako kopo, kai dau brishin pral i phub un ko brishineskro bogo tardo hi an o bolepen,

¹⁵ well ko lab an miro shero, hoi me dom tumen un lauteren, kai djiwenna: ‘Me mukau kek pani buder te well, hoi jaake baro well, te tassell o tselo djipen.’

¹⁶ Te hi miro brishineskro bogo an o bolepen tardo, dikau les, un ko lab, hoi dom, well an miro shero. Ko lab atchell tardo hako tsiro mange un hakeneske, kai djiwella ap i phub.”

¹⁷ Un o Dewel penas ap o Noah: “Ko brishineskro bogo hi ko sikepen, te rikrau miro lab, hoi me dom hakeneske, hoi ap i phub djiwella.”

O Noah well mato

¹⁸ Un o Noaheskre tchawe, kai djan dran o panjeskro kheer, his o Sem, o Ham un o Jafet. (O Ham hi kowa, kolestar o Kanaan well.)

¹⁹ Kolla triin hi i tchawe o Noahestar. Lendar wenna i tsele menshe ap i phub.

²⁰ Un o Noah his i hacho un tchiwas drakengre ruka an i phub.

²¹ Dran i drake kras job mool, was lo mato, riwas peskre koola win un his nanges an peskri plachteno kheer tchiddo.

²² Un o Ham, koleskro tchawo o Kanaan hi, dikas peskro dades nanges, un djas win un penas kowa peskre dui phralenge.

²³ Koi lan o Sem un o Jafet i ripen un tchiwan les pral pengre phika un djan pengro dumo glan-wi pash pengro dadeste, jaake kai dikan les jon nashte gar. Un jon tchakran les.

²⁴ Har o Noah djangelo was dran peskro matepen un shunas, hoi leskro terneder tchawo kras, penas job:

²⁵ “Bibacht ap o Kanaan! Job wella o telstuno budepaskro peskre phralenge!”

²⁶ Palle penas job: “Me sharau o baro Debles, ko Debles kones o Sem an-mangella. Un o Kanaan well peskro phraleskro budepaskro!

²⁷ Mu krell o Dewel o Jafeteskro them jaake buchlo, te djiwenn leskre menshe mashkral i menshende, kai wenna pal o Sem. Un o Kanaan well leskro budepaskro!”

²⁸ O Noah djiwas 350 (triin-sheel-te-paash-sheel) bersha pal o baro pani, hoi was pral i phub.

²⁹ Leskro tselo djipen his 950 (enja-sheel-te-paash-sheel) bersha. Un job meras.