1. Mose 8 - O Debleskro Drom 2021 (Sinte)

O pani djal tele

¹ O Dewel bistras o Noah gar, witar gar i viechen, kai pash leste an o panjeskro kheer his: kol diwje vieche un kolla, kai gar diwje hi. Un o Dewel mukas i baro ducho pral i phub te phurdell. Koi djas o pani tele.

² Kek sorelo pani was buder dran i phub. Un o bolepen rikras o baro brishin pale.

³ Pal 150 (sheel-te-paash-sheel) diwessa djas o pani pale.

⁴ Ap o deesh-te-eftato diwes, an o eftato tchon atchas o panjeskro kheer ap kol berge Ararat tardo.

⁵ Un o pani djas dureder pale bis an o deshto tchon. Ap o ersto diwes an o deshto tchon wan i berge dran o pani win – lengre pralstune kotja.

⁶ Pal 40 (star-deesh) diwessa kras o Noah koi wochni an leskro panjeskro kheer pre,

⁷ un mukas i korako win. Kowa djas peske, un was pale pale, jaake rah bis te his i phub buder gar sapeno.

⁸ Un job mukas i tauba win, te dikell lo, te his o pani tele naashedo.

⁹ I tauba hatsas kek platsa, kai nashte beshas pes li tele. His jaake bud pani ap i phub. Doleske was joi an o panjeskro kheer pale. Un o Noah las koi tauba o wasteha an o panjeskro kheer dren.

¹⁰ Pal efta diwessa mukas job pale i tauba dran o panjeskro kheer win.

¹¹ Un i tauba was pale ap i rati. Un an lakro mui his i newi patri i djeteskro rukestar. Kanna djinas o Noah, te his buder gar bud pani ap i phub.

¹² Pal wawar efta diwessa bitchras job i tauba pale win. Un i tauba was buder gar pale.

¹³ Un ap o ersto diwes an o ersto tchon ko bershestar, kai o Noah 601 (shob-sheel-te-jek) bersh phuro was, his buder kek pani ap i phub tardo. Un o Noah las i kotar dran i dacha tele un dikas, kai i phub buder gar sapeno his.

¹⁴ Ap o biish-te-eftato diwes an o duito tchon his i tseli phub truk.

¹⁵ Un o Dewel penas ap o Noah:

¹⁶ “Kanna dja win dran o panjeskro kheer, tu un tiri romni un tire tchawe un lengre romja.

¹⁷ Kol tsele vieche, kai pash tute hi, muk len win te djal: i tchirkle, i bare vieche, un i tikne vieche, kai djan pral i phub. Kamau, te lenn le tchawe, jaake te well lendar i phub pherdo.”

¹⁸ Koi djas o Noah peskre tchawentsa un peskri romjah un peskre tchawengre romjentsa dran o panjeskro kheer win.

¹⁹ I tsele vieche, i bare un i tikne, un i tsele tchirkle, halauter, hoi djiwell ap i phub, djas ninna dran o panjeskro kheer. Hako kopo djan kolla khetne, kai his i emlige viechendar.

O Noah parkrell pes pash o baro Debleste

²⁰ Un o Noah kras i chatchepaskri platsa un las hake viechendar, kai gar pale-tchiddo hi un hake tchirklendar, kai gar pale-tchiddo hi. Un das len mulo un chatchras len ap koi platsa, te parkrell lo pes pash o baro Debleste.

²¹ Un o baro Dewel sungas ko latcho sungepen un penas ap peste: “Me dau man sowel, te anau buder gar hawi bari bibacht pral i phub doleske, hoi i menshe krenna. Djinau, o mensheskro dji hi tchilatcho fun tiknes pre. Me kamau buder gar o tselo djipen ap i phub te marell, jaake har krom.

²² Jaake rah, har i phub koi hi, witsrenn le djob ap i phub un anenn le pale newo djob dren. Jaake rah, har i phub koi hi, atchenna shilapen un tatepen, nijal un wend, diwes un rati.”