1. Mose 7 - O Debleskro Drom 2021 (Sinte)

O baro pani wella

¹ Un o baro Dewel penas ap o Noah: “Dja an ko panjeskro kheer: tu un tiri tseli familja. I tsele menshendar ap i phub hal tu kokres latcho un tchatcho glan mande.

² Le viechen tuha an o panjeskro kheer: Hake viechendar, kai hi gar pale-tchiddo, le efta murshen pengre djuwjentsa! Un hake pale-tchidde viechendar le jek murshes un peskri djuwel.

³ I tchirklendar le ninna efta murshen un efta djuwjen! Kre kowa, te lenn le tchawe un merenn gar win ap i phub.

⁴ An efta diwessa mukau me brishin tele te well ap i phub: star-desha diwessa un star-desha rati, jaake te merell ap i phub o tselo djipen, hoi krom.”

⁵ Un o Noah kras halauter jaake, har o baro Dewel leske penas.

⁶ Un o Noah his 600 (shob-sheel) bersha phuro, har was o baro pani pral i phub.

⁷ Un o Noah djas an o panjeskro kheer. Khetne leha djan leskre tchawe, leskri romni un leskre tchawengre romja, te tassenn le gar.

^8-9 Ninna i vieche wan pash o Noah an o panjeskro kheer, hakenestar dui: o mursh un peskri djuwel: i viechendar, kai gar pale-tchiddo hi un kolendar, kai pale-tchiddo hi, ninna i tchirklendar un i tsele tikne viechendar ap i phub, jaake har o Dewel leske penas.

¹⁰ Un pal efta diwessa was o baro pani pral i phub.

¹¹ Har o Noah 600 (shob-sheel) bersha phuro his, an o duito tchon an ko bersh, ap o deesh-te-eftato diwes was o pani, hoi an i phub hi, i sorjah win.

¹² Un dran o bolepen was baro sorelo brishin ap i phub: star-desha diwessa un star-desha rati.

¹³ Ap ko diwes djas o Noah peskri romjah un peskre tchawentsa, o Sem, o Ham un o Jafet, un kolengre romja an o panjeskro kheer.

¹⁴ Khetne lentsa djan ninna hake viechendar – kolendar, kai diwjo hi un kolendar, kai gar diwjo hi, ninna hake tikne viechendar, hoi djan pral i phub, un hake tchirklendar.

¹⁵ Jon djan pash o Noah an o panjeskro kheer dui hakenestar, hoi djiwella: jek mursh un peskri djuwel,

¹⁶ jaake har o Dewel leske penas, te krell lo kowa. Un o baro Dewel kras o wudar pandlo pal lende.

¹⁷ Un o baro pani was pral i phub 40 (star-desha) diwessa, un djas pre un hadas o panjeskro kheer pre un hidjras les.

¹⁸ Un o pani was bud un budeder pral i phub. Un o panjeskro kheer rikras pes pral o pani.

¹⁹ Un o pani was jaake baro ap i phub, kai his i tsele bare berge tel o pani.

²⁰ O pani atchas tardo efta metarja pral i berge, jaake kai i tsele berge tel o pani his.

²¹ Un koi meras halauter ap i phub, hoi djido his: i tchirkle un i vieche, – kolla, kai diwjo hi un kolla, kai gar diwjo hi, ninna i tikne vieche, hoi djan pral i phub, un i tsele menshe.

²² Halauter meras, hoi ap i phub djiwas.

²³ Jaake was o tselo djipen ap i phub tassedo: i menshe, i vieche, i bare un i tikne, ninna i tchirkle. Halauter was tassedo. O Noah kokres atchas djido un kolla, kai djan khetne leha an o panjeskro kheer.

²⁴ O pani his tardo ap i phub 150 (sheel-te-paash-sheel) diwessa.