1. Mose 5 - O Debleskro Drom 2021 (Sinte)

I laba kol menshendar, kai wan pal o Adam

¹ Kowa hi ko liil, kai i laba tchinlo hi kol menshendar, kai wan pal o Adam. Ap ko diwes, har o Dewel o menshes kras, kras les lo jaake har job hi.

² Job kras o murshes un i djuwjat un tchiwas peskri soor ap lende un das len ko lab ‘mensho’.

³ Har o Adam 130 (sheel-te-triin-deesh) bersha phuro his, was job o dad i tchawestar, kai win dikas har job. Un das les ko lab Set.

⁴ Koi pal, har o Set boldo was, djiwas o Adam 800 (ochta-sheel) bersha. Un lestar wan bud tchawe un tcha bolde.

⁵ Leskro tselo djipen his 930 (enja-sheel-te-triin-deesh) bersha. Un job meras.

⁶ Har o Set 105 (sheel-te-pantch) bersha phuro his, was lestar o Enosh boldo.

⁷ Koi pal, har o Enosh boldo was, djiwas o Set 807 (ochta-sheel-te-efta) bersha. Un lestar wan bud tchawe un tcha bolde.

⁸ Leskro tselo djipen his 912 (enja-sheel-te-deesh-te-dui) bersha, un job meras.

⁹ Har o Enosh 90 (enja-deesh) bersha phuro his, was lestar o Kenan boldo.

¹⁰ Koi pal, har o Kenan boldo was, djiwas o Enosh 815 (ochta-sheel-te-deesh-te-pantch) bersha. Un lestar wan bud tchawe un tcha bolde.

¹¹ Leskro tselo djipen his 905 (enja-sheel-te-pantch) bersha. Un job meras.

¹² Har o Kenan 70 (efta-deesh) bersha phuro his, was lestar o Mahalalel boldo.

¹³ Pal kowa, har o Mahalalel boldo was, djiwas o Kenan 840 (ochta-sheel-te-star-deesh) bersha. Un lestar wan bud tchawe un tcha bolde.

¹⁴ Leskro tselo djipen his 910 (enja-sheel-te-deesh) bersha. Un job meras.

¹⁵ Har o Mahalalel 65 (shob-deesh-te-pantch) bersha phuro his, was lestar o Jered boldo.

¹⁶ Koi pal, har o Jered boldo was, djiwas o Mahalalel 830 (ochta-sheel-te-triin-deesh) bersha. Un lestar wan bud tchawe un tcha bolde.

¹⁷ Un leskro tselo djipen his 895 (ochta-sheel-te-enja-deesh-te-pantch) bersha. Un job meras.

¹⁸ Har o Jered 162 (sheel-te-shob-deesh-te-dui) bersha phuro his, was lestar o Henoch boldo.

¹⁹ Koi pal, har o Henoch boldo was, djiwas o Jered 800 (ochta-sheel) bersha. Un lestar wan bud tchawe un tcha bolde.

²⁰ Leskro tselo djipen his 962 (enja-sheel-te-shob-deesh-te-dui) bersha. Un job meras.

²¹ Har o Henoch 65 (shob-deesh-te-pantch) bersha phuro his, was lestar o Metuselach boldo.

²² Koi pal, har o Metuselach boldo was, djiwas o Henoch 300 (triin-sheel) bersha o Debleha. Un lestar wan bud tchawe un tcha bolde.

²³ Leskro tselo djipen his 365 (triin-sheel-te-shob-deesh-te-pantch) bersha.

²⁴ Un o Henoch djiwas o Debleha. Palle his job buder gar koi. O Dewel las les krik.

²⁵ Har o Metuselach 187 (sheel-te-ochta-deesh-te-efta) bersha phuro his, was lestar o Lamech boldo.

²⁶ Koi pal, har o Lamech boldo was, djiwas o Metuselach 782 (efta-sheel-te-ochta-deesh-te-dui) bersha. Un lestar wan bud tchawe un tcha bolde.

²⁷ Leskro tselo djipen his 969 (enja-sheel-te-shob-deesh-te-enja) bersha. Un job meras.

²⁸ Har o Lamech 182 (jek-sheel-te-ochta-deesh-te-dui) bersha phuro his, was lestar jek tchawo boldo.

²⁹ Un job das les ko lab Noah un penas: “Mari budi hi pharo ap i hachetikri phub, kai tchiwas o baro Dewel i bibacht pre. O Noah dell mare djia newi soor.”

³⁰ Koi pal, har o Noah boldo was, djiwas o Lamech 585 (pantch-sheel-te-enja-deesh-te-pantch) bersha. Un lestar wan bud tchawe un tcha bolde.

³¹ Leskro tselo djipen his 777 (efta-sheel-te-efta-deesh-te-efta) bersha. Un job meras.

³² O Noah his 500 (pantch-sheel) bersha phuro un lestar wan o Sem, o Ham un o Jafet boldo.