1. Mose 16 - O Debleskro Drom 2021 (Sinte)

I Hagar nashell peske

¹ O Abrameskri romni, i Sarai, anas leske kek tchawen ap i phub. Pash late budras i budepaskretsa dran o them Egiptia. Lakro lab his Hagar.

² Un i Sarai penas ap o Abrameste: “Tu dikeh, o baro Dewel das man kek tchawe. Le miri budepaskretsa, un dja lah khetne! Jaake nai well man latar i tchawo.” Un o Abram shunas ap peskri romjate.

³ Un o Abrameskri romni, i Sarai, las peskri budepaskretsa, i Hagar, kai dran o them Egiptia his, un das lat peskro romes Abram, te well li leskri romni. An ko tsiro djiwas o Abram deesh bersha an o them Kanaan.

⁴ Un o Abram djas lah khetne. Un i Hagar was lestar an wawar koowa. Har i Hagar haiwas, kai well li dai, molas lakri rani an lakre jaka tchi buder.

⁵ Koi penas i Sarai ap o Abram: “Kai bibacht, hoi man hi, hi tiri doosh. Me dom tut miri budepaskretsa, te well li tiri romni. Kanna, kai joi haiwella, kai well li dai, hom me buder tchi moldo an lakre jaka. O baro Dewel mu well miro tchatchepaskro rai.”

⁶ Koi penas o Abram ap i Sarai: “Tiri budepaskretsa hi an tiro wast. Kre tu lah, hoi an tire jaka mishto hi!” Un i Sarai his tchilatcho ap late. Un i Hagar nashas peske latar.

⁷ Un o baro Debleskro bolepaskro hatsas lat pash i pani, hoi wella dran i phub. Ko pani his an o mulo tato them pash o drom, hoi djala an Shur.

⁸ Un o bolepaskro putchas latar: “Hagar, tu i Sarajakri budepaskretsa, kai weh tu un kai djah tu?” Penas joi: “Me nashom mange miri ranjatar Sarai.”

⁹ Penas o bolepaskro ap late: “Dja pale pash tiri rani! Un shun ap late!”

¹⁰ Palle penas o baro Debleskro bolepaskro ap late: “Me kamau tire tchawen, kai pal tute wenna, jaake bud te krell, kai nai djinell kek mensho, har bud jon hi.

¹¹ Tu hal an wawar koowa. Tu leh i mursh tchawo. Koles dess tu o lab Ismael. O baro Dewel shunas, har dal gole i bibachtjatar.

¹² Tiro tchawo wella i mensho har i diwji burika. Job kurell pes hakeneha. Un hakeno kurell pes leha. Job lell peske i kotar them gar dur peskre phralendar, te choirell lo len.”

¹³ Koi putchas i Hagar pestar: “Dikom me tchatchepah o Debles, kai man dikell?” Un joi das o baro Debles, kai lah rakras, ko lab ‘Tu hal i Dewel, kai man dikell’.

¹⁴ Doleske kharell ko pani, kai joi his Beer-Lachai-Roi. Kowa hi tchiddo mank kol forja Kadesh un Bered.

¹⁵ Un i Hagar anas o Abrameske i tchawes ap i phub. Un o Abram das peskro tchawes o lab Ismael.

¹⁶ Har o Ismael boldo was, his o Abram 86 (ochta-deesh-te-shob) bersha phuro.