1. Mose 13 - O Debleskro Drom 2021 (Sinte)

O Abram un o Lot

¹ O Abram djas dran o them Egiptia: job un leskri romni un halauter hoi les his, un leskro phraleskro tchawo Lot. Un jon djan an o them Negev.

² O Abram his brawelo: Les his bud vieche, rup un sonakai.

³ Un ko themestar Negev djas job dureder fun jek platsa ap i wawar. Un was pash o foro Betel ap koi platsa mank Betel un Ai, kai leskro plachteno kheer o ersto kopo tardo his.

⁴ Kote his koi platsa, kai job i Debleskri chatchepaskri kras. Un kote kharas job pale o baro Debles an.

⁵ O Lot, kai djal o Abrameha, koles his ninna bakre, grumja un plachtene khera.

⁶ O Abrameskro brawlepen un o Loteskro brawlepen his jaake baro, kai nashte djiwan jon buder gar khetne. Lengre vieche hatsan gar doha te chal.

⁷ Jaake tchingran pen o Abrameskre budepangre un o Loteskre budepangre, kai dan garda ap lengre viechende. An ko tsiro djiwan ninna i Kanaanitarja un i Perisarja an ko them.

⁸ Koi penas o Abram ap o Lot: “Me kamau kek tchingepen mank mende, witar gar mank tire budepangre un mire budepangre. Mer ham phrala.

⁹ Rode tuke win, hawo them tu kameh. Un dja tuke mandar! Kameh tu serwes te djal, djau me tchatches. Un te kameh tu tchatches te djal, djau me serwes.”

¹⁰ O Lot dikas ap o tselo them pash o pani Jordan. Kowa his halauter sapeno. Bis pash o foro Zoar his ko them har o baro Debleskri baar un har o them Egiptia. Kowa his glan ko tsiro, kai kol forja Sodom un Gomorra chatchedo wan.

¹¹ Un o Lot rodas peske o tselo them pash o pani Jordan win. Un djas kote, kai o kham pre djala. Un hakeno djas i wawar drom:

¹² O Abram djiwas an o them Kanaan. Un o Lot djiwas an kol forja pash o pani Jordan, un tchiwas peskre plachtene khera pre bis pash o foro Sodom.

¹³ Kol menshe an Sodom his tchilatcho un djiwan an baro tchilatchepen glan o baro Debleste.

O baro Dewel penell o Abrameske, te dell lo les bud tchawen un i them

¹⁴ Har o Lot peske djas, penas o baro Dewel ap o Abrameste: “Dik tut trujel un dik kote, kai tardo hal, ap haki rig: serwes, tchatches, glan tute un pal tute!

¹⁵ Ko tselo them, hoi dikeh, kowa dau tut un tire tchawen, kai pal tute wenna. Ko them hi tumaro hako tsiro.

¹⁶ Un me dau tut bud tchawen, kai pal tute wenna, – jaake bud har i tchik ap i phub. Kek mensho nai djinell, har bud tchik ap i phub hi. Jaake djinell nai kek, kitse menshe tutar wenna.

¹⁷ Dja trujel an o tselo them! Tut dau ko tselo them.”

¹⁸ Un o Abram djas peskre plachtene kherentsa trujel, un was pash o foro Hebron un atchas tel i bare ruka ko murshestar Mamre. Un kote kras job i chatchepaskri o baro Debleske, kai wenn vieche leske chatchedo.