Markus 8 - O Evangelio Jezus Kristusester pala Markus 1912 (Sinte)

OCHTO KAPITLO.

¹ An kola divese kai has kome but čel ketene ta len has či ta chal, khardeslo lesker sikermangerende ketene ta phendeslo ape lenge:

² Man kaiela o čeles; dikhena, trin divese rikeren pen paša mande vri, ta hi len či ta chal.

³ Ta mekau len ta džan penge bokheles pali khereste, pala merena api drom; buteder lenge vejenes duralester.

⁴ Lesker sikermangerende rakerden lehe: Kater našte ta vel jekes ani fulelo them maro ta chan penle?

⁵ Ta job phučjes lenge: Keci maro hi tume? — Jon phendena: Efta.

⁶ Ta job phendes api čeleske, ta bašen pen len api phub tele: Pala andeslo kala efta marenge, parkerdes, phagerdesla, ta dejesla lesker sikermangerende ta čiden les glan, ta jon čiden o čeleske glan.

⁷ Len his nina jekender mačenge, ta job bachtelo nina kala ta mekjes ta čidenle len glan.

⁸ Ta jon chanden džin ta has len čalo; ta jon haderden i marenger koter pre, efta korčnica perdo.

⁹ Kola kai chanden has štarmerdeššal; ta job mekjes len.

¹⁰ Pala gejeslo lesker sikermangerende ani bero drin, ta vejes ani them o Dalmanutester.

¹¹ O Farizearia vejen pen ta čingerden len peske. Jon kamena ta dikhena i boto o bolopeneste lester, ta jon midžerden les.

¹² Job ta haderdes pes ani šero ta phendes: Hoske kamela kaua čel i boto? Čačo me phenau tumen, kava čel vel gar kenk boto.

¹³ Ta job mekjen len, štejes kome ani bero drin ta gejes prala verkel.

¹⁴ Ta jon bisterden ta lejen pen maro, len has ger buteder her jek maro paša lende ani bero.

¹⁵ Ta job rakerdes lenge ta phendes: Dikhene ta rakene tume glane šutesker‐biblo o Herodeseske.

¹⁶ Pala biche jon ta phenden vaverkend: Kava hi, kai hi men kenk maro.

¹⁷ Her hajerdes Jezus kava, phendeslo ape lende: Kaidene tume, vel ta hi tumen kenk maro? Hajvene les tume kome gar?

¹⁸ Hi tume kome džiskerdo? Tume hi jaka ta dikhena či? Tume hi kan, ta hunena či, ta hi tumen gar hajerdo,

¹⁹ kai phagjomes kola panč marenge i pančšalester, keci korčnica pherdo koter haderden tume pre? Jon phenden apa leste: Dešedui.

²⁰ Ta phagerdomes kola efta marenge i štaršalender, keci but korčnica pherdo koter haderden tume pre? Jon phendena apo leste: etta.

²¹ Ta job phendes ape lende: Hajveneles tume kome gar?

²² Ta jon vejena pale Betsaida. Pale vela i kašiko paša leske andlo, ta mangden pen les, ta taperelo les.

²³ Ta job andes o kašikeskero vast, ta gejes lehe glano gab vri, čungerdes api leskre jaka, čides leskre vast apo leste ta phučes les: eka dikhelo čomoni.

²⁴ Ta job dikjes pre ta phendes: Me dikhaua o dženenge ta našen penge her i rukia.

²⁵ Pale čideslo leskre vast komoli api leskre jaka: ta job dikjes zorelo, les has kome sasto ta dikhes nina duralester lauter mišto.

²⁶ Ta job bičerdes les pala khereste ta phendes: Ta vehas ani gab drin, pala phene les kenkes.

²⁷ Jezus ta gejes lesker sikermangerender nikli an i gabende o Cezarea Filipi. Api drom phučeslo lesker sikermangerende ta phendes ape lenge: Ho phenena o gadžende, kon hom me?

²⁸ Jon rakerden ta phenden: Johanes o boldomaskero, ta vaver: Elias; ta kome vaver: Jekes i profetenge.

²⁹ Pala phendeslo ape lenge: Ho phenen tume, kones hom me? Petrus rakerdes ta phendes apo leste: Tu hal Christus.

³⁰ Job preterdes len ta phenena kenkes či lester.

³¹ Ta job sikerden len pralduno, ta hunte štelo o dženenger čavo but vri o phuriender, baro rašaiender, livrosikermangerender, velo praserdo, vela merdo, ta hunte štejeslo pala trin dives papele pre.

³² Ta job rakerdes kava lab piro. Pala andes les Petrus api rik, ta mangdeslo les, ta rakerelo gar keake.

³³ Job ta riserdes pes drumo leste, dikhes ape lesker sikermangerende, preterdes o Petruses ta phendes: Dža pala mande, satan! Tu hajeve kava gar ho Devleske hi, foni kava kai hi o dženenge.

³⁴ Pala khardeslo o čeles ta lesker sikermangerende ketene ta phendes ape lende: Kon kames ta našes mange pale, kova phučes či paleste, ta ane lesker trušul apo leste, ta našes mange pale.

³⁵ Kones kai kamela lesker džiben, kava našerelo les, kava ta našerela lesker džiben vaške mange ta o evangeliester, kova rikervela pes les.

³⁶ Ho hi pala, ta vel o dženo o celo phub, ta lesker mulo hi dukhedo (nikli)?

³⁷ Ho našte del o dženo, ta mekelo lesker mulo papele drin?

³⁸ Kova kai ladželo pes mander ta mire labenge glano kava luvakanenger ta došadiko čeles, koles ta ladželo pes nina o dženenger čavo, ta velalo ani baro kovmaster lesker dadeske ta i dulo englenca.

³⁹ Ta job phendes ape lenge: Čačo me phenau tumenge, dela jekte tela kalen kai hi kate tarde, ta sungena o merapen gar, džin ta dikhena ta velo o Devlesker them ani leskr zorelopen.