Markus 7 - O Evangelio Jezus Kristusester pala Markus 1912 (Sinte)

EFTO KAPITLO.

¹ Ta o Farizeare ta o livrenger sikermangerende his len paša leste ketene, kola kai vejen o Jeruzalemester.

² Her ta dikhene ta anena jekte lesker sikermangerende chaben i čikelo vastenca, čingerden len kolenge.

³ Ta o Farizeare ta hake bibolde chane či, her ta thodenpen sikerder buteder kopo lenger vastenge, jon rikerdenpenle i pralabičerpeneste o phuriender.

⁴ Nina chana len či, ta vejena api nikeleste, ta thodenpen len sikerder. Ta keake dela kome buteder vaver pedenge ta rikerenlen, kava ho muraden pen o phuriende drin: o thodopen i korenge i čarenge ta i čivenenge.

⁵ Doleske phučenpen lester o Farizeare ta i livrenger‐sikermangere: Hoske našena tiri sikermangere i pralabičerpen o phuriender, ta chanena lenger chaben i čikelo vastenca?

⁶ Job ta rakerdes ta phendes ape lenge: Čačo phendes Izaias tume chochepangerende her hi čindo: Kava čel patinle man o vustenca, ta lengr dzi hi duro mander.

⁷ Lenger butikaben hi čičeske, vel ta sikerenle dženenger sikerpen ta dženenger rakerpen.

⁸ Tume mekjena o Devlester rakerpen, ta rikerena i pralabičerpen o dženenge, i thodopen o korienge ta but vaverčandes kerene tume.

⁹ Ta job phendes ape lenge: Šuker hadena tume o Devlesker lab pre, ta rikervena tume tumaro pralabičerpenester.

¹⁰ Ta Mozes phendeslo: Mo ta pates tiro dadeste ta tiri daiake! ta: kones ta košela o dadeste ta i daiake mo ta merelo pes lo.

¹¹ Tume ta phenena: Te phenelo jekes i dadester ta i daiake: Korban! (kava hi: delapen) kai vela mander hi tuke mišto,

¹² keake mekene tume ta kerelo les či buter lesker dadeste ta lesker daiake.

¹³ Ta hadene o Devlesker lab drucha tumare pralabičerpen pre, ta dejenes tume; ta keake kerena tume kome but.

¹⁴ Ta job khardes komoli o čel paša leste ta phendes api lenge: Hunen mange hake ta hajvena mišto.

¹⁵ Či dela ta džalo čomoni ani dženo drin, kai velo čikeles, kova kai veles drani dženes vri, kava dženes hi čikeles.

¹⁶ Kova ta hi kanenge, kava hune!

¹⁷ Her ta gejeslo o čelester nikli ani kher phučenpen lesker sikermangerenge prala kava parnisepenester.

¹⁸ Ta job phendes api lenge: Han tume nina keake dinales? Hajven tume gar? Lauter ta velo ani dženeste drin kerel les gar čikeles.

¹⁹ Vel ta džala gar ano leskr dzi kai velo ani trupo drin, ta gejes pes džungalo vri kai džalo hako chaben vri.

²⁰ Kova — phendeslo — kai vela drana dženes vri, kava kerele o dženo čikeles.

²¹ Ta maškeral drani dzi o dženender vejena i midžike panderpen, biabesker phagerpen, luvakanengerende,

²² merapen, čorepen, bokholepen, godsverepen, chochepen, ladžmerdunopen, nakbele jakenge, čingerpen, givezipen, dinelepen.

²³ Kava lauter midžiko vela drani vri ta kerelo čikelo dženes.

²⁴ Ta job kerelo peslo pre ta gejeslo ani them o Tirusester. Ta job gejes ani kher, ta kamieleslo ta veleslo gar hajerdo; job našte ta garaveleslo les gar.

²⁵ Her ta hundes i romni, lester lakr čai has i čikelo mulo, vejesli sik ta pejesli les api pirenca.

²⁶ Kava romni has i vaver themester, drana Zirofenicia khereduno. Ta joi mangdesli les, ta tradelo job o benges drani lakr čai nikli.

²⁷ Ta job phendes api late: Mek sikeder ta vena o čavende čalo, ta hi gar mišto, ta anena o maro i čavende ta vicerenas o džuklenge glan.

²⁸ Joi ta rakerdes ta phendesli apa leste: Aua rai! Ta nina i džuklenge chane tele chamaskero o čavenger mareste.

²⁹ Ta job phendes api late: Vaške kava labeste kamaues; dža koi! O beng hi nikli tiri čater.

³⁰ Her ta vejesli ani lakr kher, hacjes lakr čai ap o čiven bašlo, ta o beng has later nikli.

³¹ Ta job gejes kome nikli i themender o Tirusester ta vejeslo drucho Sidon i galileo baro paneste maškeral ani themes o deš foriender.

³² Jon andena i koralo laleskero paša leste ta mangjen les, job ta mekelo leskr vast apo leske pašlo.

³³ Ta job andes les i čelender api rik, špildes lesker gušt beli drani leskr kanenge drin, ta taperdes lesker čib i čungerpeneste,

³⁴ dikhes api bolapen pre, ta phendes apo leste: Efata! kava hi: Ker tuke pre!

³⁵ Ta lesker kan has len sik piro, ta o dori leskr čibester has nikli, ta job rakerdes mišto.

³⁶ Ta job phendes lenge, mo ta phenen len les kenkes. Her buteder phendes job lenge les, her buteder rakerden len les vri.

³⁷ Ta her buteder kerden pen bare jaka ta phenden: Job kerela lauter lačo! Job kerelo ta hunen o korelenge ta rakerden o lalerende.