Markus 4 - O Evangelio Jezus Kristusester pala Markus 1912 (Sinte)

ŠTARTO KAPITLO.

¹ Ta job sikerdes papele langs o baro paneste. Ta vejene i baro hufka lehe ketene, keake ta štejeslo ani bero ta bešjeslo api baro pani; o celo čel has api them langs o baro paneste.

² Ta job sikerden len but drucha parnisende, ta phendes lenge ani leskr sikerpen: Šunena:

³ Dike, gejes i hacho vrin, ta vicerdeslo lesker gib vri.

⁴ Ta vejes, her job vicerdes lesker gib, pejes čomoni api drom, pale vejene o čirkle o bolepenester ta chanene les pre.

⁵ Čomoni pejes api barester kunč, kai his ger but phub; gejes sik pre, vel ta has o phub ger chor.

⁶ Her ta gejes o baro kham pre, has len mule, vel ta has len kenk drab.

⁷ Čomoni pejes tele boriate, ta kole boria vejene bares, ta has len mule, keake ta dejes kenk gib.

⁸ Čomoni pejes api lačo phub, ta andes gib, vel ta gejes la pre, ta vejes la bares, keake ta hidžerdes čomoni trianda, čomoni šobvardeš, čomoni šel kopo.

⁹ Ta job phendes: Kova, koles ta hi kan, kova šune.

¹⁰ Ta haslo kokeres, phučen les o dešedui, kai haslen paše leste, prala kava parniseste.

¹¹ Ta job phenela ape lende: Tume našte (sei) džanene o čorochanepen o Devlesker themester; kolen ta hin vri, vela hako ani parnisepen rakerdo,

¹² ta dikhenele o jakenca, ta dikhenele či; ta šunen lengr kanenca, ta hajvenele či, ta riserden pen ger, ta lengr došia vel lenge ger meklo.

¹³ Ta job phendes lenge: Hajeven tume kava parnise ger, her našte ta hajvene tume hake vaver parnisepen?

¹⁴ O chacho vicerelo o lab.

¹⁵ Kola kai hin langs o drom: kai hi o lab vicerdo, ta šundene, pala vela sik o beng, ta anela o lab nikli, ta has drane lengr dzi vicerdo.

¹⁶ Keake hin nina kale, kai hi apo baresker kunč vicerdo; ta šunden kale kova lab,

¹⁷ anenelen les sik i dziviate pre, ta ane lenge hi kenk drab, jon rikerene ger vri, ta vel pala i midžiko ciro, ta i bibanderpen i labeste, pala hi len sik chojemen.

¹⁸ Vaver hi, kai velen tele boria vicerdo: kava hi kole, ta šunene o lab,

¹⁹ ta kova phubienger traš, o chochepen o bravalepenester, ta o kamapen o vaver pedenca vejene čorochanes drin, ta pucene o lab, keake ta ačene kenk gibester.

²⁰ Kole kai hi api lačo phub vicerdo, kale hi kolen, her ta hunen o lab, ta anene les pre, ta andene gib, jekto trianda, jekto šobvardeš, ta jekto šelkopo.

²¹ Ta job phendes lenge: Vele pale i momeli, ta kerene les tele i koršnica ta tele i čiven? Ger doleske. Ger ta vele api momelipaskero tardo?

²² Či hi gardo, mo ta hi ger hajerdo, ta či džala čorochanes, ta vela ger ana dives.

²³ Kova koles kai hi kan, kova šune.

²⁴ Ta job phendes ape lenge: Dejene jak, ho šunene tume! Keake but ta dejene tume, keake but vejene pale, ta tume vel kome buteder pašal.

²⁵ Kava ta hi, koves vejes buteder, ta kova ta hi či, koveste vela kava ho hislo, čordo.

²⁶ Job phendes nina: Keake hi o Devlesker themeske, her te vicerdo o dženo gib api phub.

²⁷ Job kamela ta sovelo ta štejeslo paši dives ta paši rati, o gib vele vri ta vele bares, ta job džanele les ger.

²⁸ Ta o phub hidžerela an peske gib, sikeder i zenelo, pale i sungeli, pale i pherdo gib ani sungelo.

²⁹ Ta vejes o gib vri, pala bičervele job sik i činepaskeri, vel ta has o činemasker ciri kai.

³⁰ Ta job phenele: Her mo te rakerahas o Devlesker themeste, ta hovester parnisepen mo ta sikerahas les?

³¹ Keake hi har i pepurester tikno gib, kova kai vela ani phub vicerdo, ta hi tikneder telo hakeni gib,

³² kai hin api phub, ta hi kome vicerdo, džala les pre, ta vele bareder her hakeni drabenge, ta kerela keake bare patria, ta ačene o čirikle o bolepenester tele les.

³³ Ta but keake parnisenca rakerdeslo o lab, keake kai naštene ta hunena.

³⁴ Ta job rakerdes lenge foni ani parnisende, ta hi len kokeres, sikerdes job leskre sikermangerende lauter.

³⁵ Ta job phenela kova diveste, ta vejes brevul: Mek men ta džas menge api vaver rik.

³⁶ Ta jon mekjene o čel, ta andenle les paše lende, keake ta haslo ano bero, ta has nina vaver bere pašal.

³⁷ Pala vejes i baro braval, ta vejes o pani ano bero drin, keake te vejes les phardo pani.

³⁸ Job ta sodeslo palduno i bereste api pernica. Jon kerene pen les džanglo ta phenden leske: Sikerpasker‐rai, hi tuke jek, ta marahas?

³⁹ Ta job štejes pre, preterdes o braval ta phendes o baro paneste: Ač pokoni ta lalerehe! Ta o braval bašeslo pes, ta vejes celo pokoni.

⁴⁰ Ta job phendes lenca: Hoske darene tume keake? Hi tumen kenk pacepen?

⁴¹ Jon trašen pen ta phenden vaverkend: Kon hi kava, ta kandelo les o braval ta o baro pani?