Markus 10 - O Evangelio Jezus Kristusester pala Markus 1912 (Sinte)

DEŠTO KAPITLO.

¹ Ta job kerdes peslo kater vri, ta vejes ani them o Judester i vaver rik o Jordaneste. Ta o čel vejes papele paša leste ketene, ta job sikerdes len komoli, her his lo sikelo.

² Pala vejena o Farizearia kate, ta phučen pen les: Hi i romes proserdo, ta mekelo lesker romni?

³ Job rakerdes ta phendes apo lenge: Ho phendes tumen Mozes?

⁴ Jon phenden: Mozes proserdes, ta vel i mekesker‐lil čindo, ta i romni vela meklo.

⁵ Jezus rakerdes lender ta phendes: Vaška o džiskerpen tumaro dzienge čindeslo tumen kava rakerpen.

⁶ Sikeder o kerepenester kerdes o devel rom ta romni.

⁷ Doleske mekele o rom lesker dad ta lesker dai, ta ačelo paša lesker romni.

⁸ Pala vena kala dui jek mas. Len hi gar kome dui, foni jek mas.

⁹ Ho dejes o Devel ketene, mo ta kerela o dženo gar drana vaverkend.

¹⁰ Ta i khereste phučenpen les komoli lesker sikermangerende prala kova.

¹¹ Ta job phendes apa lende: Kones kai mekela lesker romni ta leles i vaveraha, kava phagela lake i biab.

¹² Ta mekela i romni laker rom, ta lela i vaveres, pala phagela joi i biab.

¹³ Ta jon andene čaven paša leske, ta taperelo len. O sikermangerenge preterden kolen kai anden len.

¹⁴ Her ta dikhes les Jezus vejeslo chojemen ta phendes apa lende: Mekena ta vena o čavenge manca, ta čingeren tume gar lenca, ta kolenge hi o Devlesker them.

¹⁵ Čačo me phenau tumenge: kones, kai lejela o Devlesker them gar pre, her i čavo, kava vela čačepaha gar drin.

¹⁶ Ta job lejes len ani leskr musia, čides lenge o vast pre ta priserdeslo prala lende.

¹⁷ Her ta gejeslo apo drom vri, vejes jekes, kai pejes glan leste tele, ta phučes peslo: Kamlo sikermaskerrai, ho mo ta kerau me, ta vel man o hamasker džiben.

¹⁸ Jezus ta phendes apo leste: Hoske khare tu man „lačo“? Kenkes hi lačo her o Devel kokeres.

¹⁹ Tu džane o rakerpen: Tu mo ta phage o biab gar, tu mo ta merehas kenkes, tu mo ta čorehas gar, tu mo ta chocherehas gar, tu mo ta patehas tiro dad ta tiri dai.

²⁰ Job ta rakerdes ta phendes apo leste: Sikermaskerrai, kava lauter rikerdomes me i ternopenester an.

²¹ Jezus ta dikhes apo leste, kamjeslo les, ta phendes apo leste: Jek felela tuke; dža koi, bikere lauterho hi tut, ta de len o čorele, pala vei tu i barbalopen ani bolepen; pala vehe, ta dža mange pale.

²² Job has dukhedo prala gova lab, ta gejes kajemen kater nikli; ta les has but kova.

²³ Ta Jezus dikheslo trujal ta phendes apa lesker sikermangerende: Her pharo vena kolen, kai hi len but love ani Devlesker them!

²⁴ O sikermangerenge kerdena bare jake prala lesker labenge. Jezus rakerdes komoli ta phendes apa lenge: Čave, her pharo vena kolen kai rikerenle an lenger love ani Devlesker them!

²⁵ Hi les lakoder, ta džala i divio grai druchi sibeskri‐cheb, her ta vela i bravalo ani Devlesker them!

²⁶ Jon ta šreken kome buteder ta phenden tela vaverkend: Kones našte ta vela dulo?

²⁷ Jezus dikhes len un ta phendes: Paši dženenge našte džala gar, ta paši Devleste hi lauter kerdo.

²⁸ Petrus ta phendes: Dikhehe, me mekjames lauter ta našames tuke pale.

²⁹ Jezus rakerdes ta phendes: Čačo, phenau tume, hi kenkes, ta mekelo o kher, ta o phrala, ta o phea, ta o dad, ta i dai, ta o čavenge, ta o phub vaške mange ta o sastobičerpeneste (evangelieste),

³⁰ kai vela peske gar šelkopo, kana an kava ciro kherenge ta phralenge ta phenenge, ta daienge ta čavenge ta phubenge tela čingerpenester, ta ana velociro phub (šveto) o hamaster džiben.

³¹ But o erstender vena o paldunender ta but o paldunender vena i erstenender.

³² Jon gejene api drom pre pale Jeruzalem; Jezus gejes glane lende, jon ta našen pen les trašerdo pale, ta kerden bare jaka. Ta job andes papele kola dešdujenge paša leste, ta phendeslo lenge ho vela prala leste.

³³ Dikhehe me džahas pre pala Jeruzalem, ta o dženenger čavo vel kola barerašaiende, ta livrosikermangerende, ta phuriende praldeto; jon marenpenles ta delpen les o biboldenge (gadženge).

³⁴ Ta kola prasenpen les ta čungeren les an, ta kuren les ta maren les; ano trinto dives velo papele preštardo.

³⁵ Pala štakerena Jakobus ta Johanes, čave o Zebedeusester, paše leste ta phenden: Sikerpaskerrai, me kamahas tu kere men, ho mangahas men tuter.

³⁶ Job ta phendes apo lenge: Ho kamena tume, ta me keraues tume?

³⁷ „De men, ta bešahas jekes tiro čačo rikeste, ta jekes tiro zerbo rikeste ani tiro railapen.“

³⁸ Jezus ta phendes apo lenge: Tume džanena gar, ho mangenes tume. Našte piahas tume o khoro kai piau me? ta vel tume kola boldopeneste boldo kai vel me boldo?

³⁹ Jon ta phenden apo leste: Men našte les. Jezus ta phendes apo lenge: Tume piahas kova khoro kai piau me, ta kola boldopeneste vel tume boldo, kai vel me boldo.

⁴⁰ Ta o bešapen miri čačeske ta miri zerbeske, štela gar paša mande ta daues tume, foni kolen kai hi les kerlo.

⁴¹ Her ta hunden kava kola deš, vejenle chojemen prala Jakobus ta Johanes,

⁴² Jezus ta khardes len paša leste ta phendes apo lenge! Tume džanena, ta kolen kai vena her raien o čelenge andikhamen, ta kerden pen le bares prala lende, ta lenger bare kerden lenger rušapen (oder zor) prala lende vri.

⁴³ Gar hi keake tela tumende, foni kon ta kamel ta vela bares tela tumende, vela tumaro valeto,

⁴⁴ ta kon kamel ersto tela tumende, velo hakenender valeto.

⁴⁵ Ta nina o dženenger‐čavo vejes gar ta butikeren pen les, foni ta butikerelo job ta delo lesker džiben i mekapeneske o butender.

⁴⁶ Ta jon vejena pale Jericho. Her ta cerdeslo lesker sikermangerende ta i baro hufka čeleske i Jerichester vri, bešes o čavo o Timester, Bartimeus, o kašiko apo drom ta mangjeslo.

⁴⁷ Her ta hundeslo, Jezus ta hi, o Nazarenaro (Nazareteskero) dejeslo godlo ta phendeslo: Jezu tu čavo o Davidester, hi mange lačo!

⁴⁸ Ta but preterden les, ta mo hilo pokoni. Job ta dejes kome buteder godlo: Tu čavo Davidester, hi mange lačo.

⁴⁹ Jezus ačes tardo ta phendes: Kharen les kai. Ta jon khardena kova kašikeske ta phenden apo leste: Hal džiskero, šte pre, job kharela tut!

⁵⁰ Pala vicerdeslo lesker ripen nikli, štejes pre, vejes pašo leste.

⁵¹ Ta Jezus rakerdes pašo leste: Ho kamehe, ta mo kerau me tuke? O kašiko ta phendes apo leste: Rabuni ta veles ta dikhau me!

⁵² Ta Jezus phendes apo leste: Dža tuke, tiro pacepen hilderdes tuke! Ta sik dikheslo, ta našes peske pale api drom.