Markus 1 - O Evangelio Jezus Kristusester pala Markus 1912 (Sinte)

JEKTO KAPITLO.

¹ O glanapen o Evangeliester Jezus Kristusester o Devlester čaveste.

² Her hi čindo ani profeteske Jzajas: Dikehe, me bičevaua miro našepaskeres glane tute, ta kerela tuke o drom šuker.

³ I rakermasker‐bašo ani fulelo phub: Kerene o Devlesker drom, kerene šuker lesker tikne droma!

⁴ Johanes boldes ani fulelo phub ta rakerdeslo mišto vaške o mekepen lenger došienge.

⁵ Ta o celo them Judea, ta hake džene Jeruzalemester gejen pen lehe vri, ta mekenele ta boldeslo len ani pani Jordan, ta phukerdenle lenger došia.

⁶ Johanes has kole e balenca ta i morceno girtlo drana lesker trupo, ta chaslo haišreki ta gvin.

⁷ Job rakerdes ta phendeslo: Kana vela jek pala mande, kova hi zoreleder her me. Me hom ger kučo ta peraua tele ta bandava leskr kirichenger padi.

⁸ Me boldedom tumen o panester, job bolderela tume o boldo mulester (dulo duchester).

⁹ Keake vela, ta vejes o Jezus ana kova ciro drana Nazaret ani Galilea, ta vejeslo boldo i Johanesester ani pani Jordan.

¹⁰ Ta štejeslo drani pani pre, dikheslo o bolepen piro, ta vejes i boldo mulo (dulo ducho) her i ponisteri tele, ta ačeli prale leste.

¹¹ Ta i bašo dejes godlo i bolepenester: Tu hal mer kam'o čavo, tu feltel mange.

¹² Ta o mulo (ducho) trades les vri ani fulelo phub (kokero them).

¹³ Ta job has ani fulelo phub štarmerdeš dives ta štarmerdeš rati, ta o beng kamele midžiko kova lehe. Job has paš i divje pedenge (Tieren) ta i engle kanden pen les.

¹⁴ Ta has Johanes štildo, vejes Jezus pale Galilea, rakerdeslo o evangelio e Devlesker themeste, ta phendes:

¹⁵ O ciro hi pherdo, ta vejes o Devlesker them; vele tume vaverčandes ta pačena o evangelieske.

¹⁶ Ta gejeslo langs o baro paneste, dikheslo o Simon ta o Andreas, leskr phral ta mačerden le ani baro pani, jon hin mačepangere.

¹⁷ Jezus phendes lenge: Kandene man pale, keake kamaua me, ta hi tume dženengere mačengere.

¹⁸ Ta kanderdenlen les pale, te mekenle lauter.

¹⁹ Ta gejeslo kater i bresle dureder, dikheslo o Jakobuses o Zebedeus lesker čavo, ta Johanes, lesker phrales, kole kerdene lenger kova paše pani.

²⁰ Job dejes lenge sik godlo. Jon mekene leskr dad Zebedeus i but kermangerenca ta kandenele les pale.

²¹ Jon gejene pala Kapernaum, ta job gejes sik ano kurko ani kangeri ta sikerdes len.

²² Jon kerena bare jaka, ta job sikerela har jek kai hi zorelo, ger her i livrenger‐sikermangere.

²³ Has i dženo an lenger kangeri, kova has i midžiko mu'o an leste.

²⁴ Kova dejes godlo. Ta phenelo: Ho kame mender, men hi či ta butikerahas tuke, Jezus o Nazareno? Vejel tu, ta marehas man? Me džanaua her hal: O boldo Devleskero.

²⁵ Jezus preterdes les ta phendes: Hal pokoni, ta džahas lester vri.

²⁶ Ta o čikelo mulo krotltes les, dejes godlo leskr zorelo bašeske ta gejes lester nikli.

²⁷ Jon šunena lauter keake, ta phučenele ta phenden: Ho hi kava i nevo sikerpen? Ta o čikele mule phendeslo len, ta jon kanderden les.

²⁸ Ta lesker bravolo has sik hajerdo ano celo them Galilea.

²⁹ Her ta gejene drani kangeri vri, vejene len i Jakobuseste ta Johaneseste ani kher o Simoneste ta Andreaseste.

³⁰ O Simonester romniaker dai has naseli, ta sik rakerdenle lehe later.

³¹ Pala gejeslo paše late, andeslo la paše laker vast, ta haderdeslo la pre, ta sik gejes lakr naslepen nikli, ta kerdesli lenge lakr kova mišto.

³² Ta vejes pale brevul, ta gejes o baro kham tele, andenle les hakene nasele ta kolen hin i midžike mule celo pherde.

³³ Ta i celo foro has ketene glano vuder.

³⁴ Ta job kerdes but sasto, kones hin buteder naslepen, ta trades buteder beng vri, ta mekeslo len ger ta rakerdenle, vel ta prinšerden les.

³⁵ Taisarla štejeslo sik pre, gejes vri, ta gejes ani fulelo gunč, ta priserdeslo kote.

³⁶ Simon ta hakene ta hin paše leste gejen les pale.

³⁷ Ta hacerdenlen les, phendenlen: Hakene rodene tuke!

³⁸ Job ta phendes lenge: Meken men ta džahas ani vaver gab ta foria, ta rakeraha nina kote, doske vejom.

³⁹ Ta job rakerdes an lengr kangerenge ani celo Galilea ta trades i bengen vri.

⁴⁰ Ta vejes i gerelo leste, mangdeslo, pejes tele lesker čang ta phendeslo les: Ta kame tu, keake našte (sei) ta vaua sasto.

⁴¹ O Jezus kaideslo lester, štakerdes lesker vast vri, taperdes les ta phendes les: Me kamaua: Hal sasto!

⁴² Her ta rakerdes gejes o ger sik drana leste, ta job has sasto.

⁴³ Job bičerdes les sik nikli, preterdes les ta phendes:

⁴⁴ Dike, ta phene kaimeneste čomoni, dža tuke, ta sikere tuke o rašaieste, ta ane, her ta vejes sasto, her o Mozes phendes, lengr i bodeske.

⁴⁵ Her te gejeslo vri rakerdeslo o kova vri, ta rakerdeslo o labeste, keake ta našti džala o Jezus kome gar ani foro drin, ta vejeslo ger haierdo, job ačes ano kokero gunč; ta jon vejene leste o lauter rikender.