Zefanja 1 - O Debleskro Lab 2024 (Sinte-Manouche)

Ko dives, kay o Debleskri rholi vella

¹ Har o Yosia, koleskro dad o Amon hi, o baro ray pral o them Youda his, an ko tsiro rakras o baro Devel ap o Sefanya. Koleskro dad his o Koushi. Koleskro dad his o Gedalya. Koleskro dad his o Amarya. Koleskro dad o Hiskiya. Kava hi ko lab, hoy o baro Devel penas:

² Me moukau halauter, hoy ap i phoub djido hi, te merell:

³ i menshen, i firhen, i čirklen oun i mače. Me lau i čilačen krik i phoubyatar, oun khetne lentsa lauter, hoy kras, te peran le mandar tele. Ava, kek mensho ačell djido ap kay phoub. Kova penell o baro Devel.

⁴ Me hadau miro vast pral o them Youda, oun pral halauterende, kay an o foro Yerusalem djivenn, te dap len lengri phagi. Oun krau lauter paash, hoy kote o rhorheno deblestar Baal pral ačas. Ninna leskre rashaya venn bistedo, oun kol vavar rashaya, kay moukan o baro Debles.

⁵ Me marau lauteren, kay pral ap pengre khera i bolepangre momlia an-mangenn. Ninna kolen marau, kay vitsrenn pen tele glan mande, oun denn pen sovel ap mande, oun ap i vavar rig denn le pen sovel ap ko moulo debleste, kay kharell Milkom.

⁶ Marau ninna kolen, kay perenn mandar tele, oun kolen, kay poučenn gar pal mande, oun kamenn či mandar te djinell.

⁷ Ma rakrenn či, te venn glan o baro Debleste, maro rayeste! Ko dives vell sik, kay vell o baro Debleskri rholi pral i menshende. Kava dives hi har i marepaskro dives, kay firhen maredo venn o Debleske oun i rhapen kerdo vell. O baro Devel kras ko rhapen oun das menshen khetne gole, te venn le pash o rhapen.

⁸ O baro Devel penell: Ap ko marepaskro dives, dau me i pralstunen oun o baro rayeskre čaven pengri phagi, ninna halauter kolen, kay mangenn vavar deblen an.

⁹ Ninna dau kolen i phagi, kay stenn an o voudar dren, te stakrenn le gar ap o kasht tel o voudar. Ninna kolen dau i phagi, kay anenn an pengro rayeskro kheer savo koova, hoy lan le rhorhepah oun čorepah.

¹⁰ Ap ko dives vell i bari gole shounlo, hoy vell kotar, kay o Mačengro Voudar hi. Oun i ropen vell shounlo, hoy vell dran o Nevo Foro. Oun i kourepaskri gole vell i tikne bergendar. Kova penell o baro Devel.

¹¹ Rovenn, t'mer parepangre, kay djivenn an o telstouno kotar o forestar! Kol tsele bikepangre, kay kote pengre love krenn, hounte merenna.

¹² An ko tsiro vella yaake, kay lau i momeli oun rodau an o foro Yerusalem lauter kolen, kay djivenn i shoukar djipen oun djinenn kek daar, oun kay penenn an pengre djia: O baro Devel krell menge či, kek lačepen, vitar kek čilačepen.

¹³ Lengro bravlepen vell randedo, oun lengre khera khetne dino. Yon krenn penge khera oun djivenn gar koy dren, oun čivenn drakengre rouka an i phoub, oun piyenn kek mool kolendar.

¹⁴ O baro dives o baro Deblestar hi gar dour, sik vell lo oun hi glan o voudar tardo. Kova hi sau čilačo dives! Shounenn, har ninna i zorele bari gole denna!

¹⁵ Kava dives hi i dives, kay o Debleskri rholi pral i menshende vell, i dives pherdi daar oun traash, i dives, kay lauter paash dino oun tele phagedo vell, i dives, kay tamlo vell, oun kali rati vell, i dives, kay kale volke i phoub čakrenna,

¹⁶ i dives, kay i kourepaskri gole shounlo vell, oun an i phourdepangre phourdedo vell, te djan i lourde an o kourepen, oun phagenn tele kol zorele forya oun bare massurya.

¹⁷ I menshe kran čilačepen ap mande. Doleske krau len darenes, te nashenn le trouyel har korele menshe. Lengro rat te nashell ap i phoub har čik, hoy krik vitsedo vell. Oun lengre bouke venn krik vitsedo har te vans le foul.

¹⁸ Lengro roup oun sonakay nay lell len gar vin dran koy bibarht ap ko dives, kay o baro Debleskri rholi pral lende vella. Leskri bari rholi vell har i yag pral o tselo them oun krell halauter paash. Sik vell o merepen pral halauter, kay kote djivenn.