Zakarie 8 - O Debleskro Lab 2024 (Sinte-Manouche)

O foreske Yerusalem vell bari barht

¹ Oun o baro Devel, ko ray pral o bolepen oun i phoub penas:

² Kova penell o baro Devel, ko ray pral o bolepen oun i phoub: “Me hom pherdo baro kamlepen o foreske Sion. Miro dji nashell, te vell lo kava foreske ap i rig. Oun miri rholi vell ap kolende, kay kamenn leskre menshen gar.

³ Me vau pale ap i berga Sion oun djivau mashkral an o foro Yerusalem. Palle kharell pes Yerusalem foro, kay rikrenn pen i menshe ap o baro Debleste. Oun i berga Sion, kay djivau me, o baro Devel, ko ray pral o bolepen oun i phoub, kay berga kharell Debleskri berga.”

⁴ O baro Devel, ko ray pral o bolepen oun i phoub, penell: “I tsiro vella, kay beshenn pale phoure menshe ap i platse an o foro. Yon hi yaake phouro, te djan le i kashteha.

⁵ Oun ap i dromma o forestar khelenn boud čave oun ča.”

⁶ O baro Devel, ko ray pral o bolepen oun i phoub, penell: “Ninna te patsenn kolla i Israelendar, kay palle pral ačan: Kova nay vell gar, krau me, te vell kova yaake. Kova penell o baro Devel, ko ray pral o bolepen oun i phoub.”

⁷ Kova penell o baro Devel, ko ray pral o bolepen oun i phoub: “Ava, me lau mire menshen vin dran o them, kay o kham pre djala, ninna dran o them, kay o kham tele djal.

⁸ Me anau len khere oun moukau len an o foro Yerusalem te djivell. Yon te venn mire menshe. Oun me vau lengro Devel: Me moukau len gar, oun yon djivenn mantsa an o čačepen.”

⁹ Kova penell o baro Devel, ko ray pral o bolepen oun i phoub: “Krenn t'mare vasta zoreles, t'mer, kay kanna shounenn kal emlige laba, hoy mire rakepangre penan an ko tsiro, kay i telstoune barra pre-čiddo van miro nevo khereske!

¹⁰ Bis kanna his kek love koy, te playsrenn le morshen pengre firhentsa lengri boudjake. Oun kolla, kay djan vin oun dren an o foro, hounte daran pengro djipaske. Hakeno djas ap o vavareste pre.

¹¹ Kanna kamau bouder gar yaake te krell kolentsa, kay pral ačan kal menshendar, har an kol phoure divessa.

¹² Na-a, kanna nay vitsrenn le djob an i phoub kek daryah. I drakengre rouka hidjrenn drake, i phoub anell zenlepen vin, oun o bolepen dell brishin. Oun kolenge, kay pral ačan kal menshendar, dau kova lauter, te ačell kova lenge.

¹³ T'mer menshe dran o them Youda oun dran o them Israel, hans i menshenge an vavar themma har menshe, ap kolende i bibarht čiddo hi. Kanna krau t'mentsa yaake, te dikenn le miri barht ap t'mende. Doleske ma darenn! Krenn t'mare vasta zoreles!”

¹⁴ Kova penell o baro Devel, ko ray pral o bolepen oun i phoub: “Har kran man t'mare phoure rhoyedo, kamom i bibarht pral lende te anell, oun či rikras man kolestar pale.

¹⁵ Kanna kamau lačepen te krell ap o foro Yerusalem oun ap o kheer Youda. Doleske ma darenn!

¹⁶ Kova hi, hoy hounte krenn t'mer: Rakrenn o čačepen yek o vavareha. Denn hakeneste peskro čačepen, te vell o čingepen krik lino.

¹⁷ Kek te lell pes čilačepen glan, te anell lo ap o vavareste. Ma denn t'men i rhorheni sovel! Kova lauter hi djoungeles an mire yaka”, penell o baro Devel.

¹⁸ Oun o baro Devel, ko ray pral o bolepen oun i phoub, penas ap mande:

¹⁹ Kova penell o baro Devel, ko ray pral o bolepen oun i phoub: “Kol divessa an o starto, pančto, eftato oun deshto čon, kay i menshe či rhan, te rodenn le man, kal divessa venn i barhtelo tsiro o khereske Youda. An kal divessa givenn oun khelenn le i barhtyatar. T'menge penau, rodenn o čačepen! Oun denn yak, te vell kek čingepen mank t'mende!”

Koy bari barht hi ninna i vavar menshenge

²⁰ Kova penell o baro Devel, ko ray pral o bolepen oun i phoub: “O tsiro vella, kay venn boud menshe dran vavar themma oun forya an Yerusalem.

²¹ Kolla dran yek foro penenn ap kolende dran i vavar foro: Mer djah te mangas o baro Debles an, ko rayes pral o bolepen oun i phoub, te dikell lo lačes ap mende. Avenn mentsa!

²² Palle venn boud menshe dran vavar themma an o foro Yerusalem, te mangenn le o baro Debles an, ko rayes pral o bolepen oun i phoub, te dikell lo lačes ap lende.”

²³ Kova penell o baro Devel, ko ray pral o bolepen oun i phoub: “An ko tsiro venn deesh vi-themarya pash yek biboldo, taprenn les ap leskri baya, mangenn lestar oun penenn: Mer shounam, o Devel hi t'mentsa. Doleske mouk men t'mentsa te djal!”