Zakarie 7 - O Debleskro Lab 2024 (Sinte-Manouche)

O Devel kamell o čačepen oun o lačepen

¹ An o starto bersh har o Darius o baro ray his, ap o starto dives an o enyato čon – ko čon kharell Kislev – rakras o baro Devel ap o Zakarie.

^2-3 Glan kava tsiro bičran i menshe an o foro Betel morshen pash o kheer o baro Deblestar, kay hi o ray pral o bolepen oun i phoub, te mangenn le lestar leskro lačepen. Kal morsha his o Sharezer oun o Regem-Melek peskre morshentsa. Yon te poučenn kote ninna i rashayendar oun o Debleskre rakepangrendar: “Hounte kras mer doureder, te rhas či o Debleske oun rovas an o pančto čon har kram yaake boud bersha?”

⁴ Koy penas o baro Devel, ko ray pral o bolepen oun i phoub, ap mande:

⁵ “Pen i tsele menshenge an o them oun kol rashayenge: Har rhan t'mer či oun dan gole ropah an o pančto čon oun an o eftato čon an kal efta-deesh bersha, kran t'mer kova mange? Na-a!

⁶ Oun ninna har rhan oun piyan, kran t'mer kova t'menge oun gar mange!”

⁷ Kava hi kova, hoy o baro Devel moukas te penell dran o mouy leskre rakepangre, kay glan mande koy his, har o foro Yerusalem bravelo his, oun boud menshe kote djivan, ninna an i forya trouyel oun an ko moulo them, hoy kharell Negev, oun an o telstouno them.

⁸ Kava lab penas o baro Devel ap o Zakarie:

⁹ Me, o baro Devel, ko ray pral o bolepen oun i phoub, penom glan boud bersha mire menshenge: “T'mer hounte denn yak, te vell o čačepen kerdo. Oun hakeno hounte krell peskro dji pre peskro phraleske oun vell leske lačes.

¹⁰ Ma krenn čilačepen kol romyenge, kolengro rom meras, oun kol čavenge, kolen kek dad bouder hi, vitar gar kolenge, kay vi-themarya hi oun kol čorvelenge! Ma lenn t'menge glan an t'mare djia, te doukrenn t'maro phrales!”

¹¹ Mire menshe kaman gar yak te dell ap mire laba, oun rissran mange pengro doumo, oun pandan pengre kanda, te shounenn le gar, hoy me lenge penom.

¹² Lengre djia kran le har bar, te shounenn le gar ap mire laba, hoy sikrenn har te djan le miro drom. Kal laba penan lenge mire rakepangre, kay djivan glan boud bersha. Doleske vas miri bari rholi ap lende.

¹³ Oun djas yaake: Yon shounan gar, hoy lenge penlo vas. Doleske kamom vitar gar te shounell, har yon gole dan, penas o baro Devel, ko ray pral o bolepen oun i phoub.

¹⁴ Doleske tradom len an vavar themma, hoy prindjran le gar. Oun lengro them vas mouklo. Kek boudras oun djivas bouder gar koy. Yaake kran le dran kava lačo them i moulo them.