Zakarie 6 - O Debleskro Lab 2024 (Sinte-Manouche)

O orhtato dikepen: Star vourdya

¹ Oun me dikom pale pre oun dikom star vourdya. Kolla van mank douy berge vin. Kol berge his dran lolo saster.

² Glan o ersto vourdin his lole graya, glan o douyto kale graya,

³ glan o triinto parne graya oun glan o starto vourdin his kalo-parne graya. Yon halauter his zorelo.

⁴ Oun me penom ap o bolepaskro, kay mantsa rakrell: “Miro ray, koon hi kalla?”

⁵ Oun o bolepaskro penas: “Kolla hi kol star dourhe tel o bolepen, kolla his tardo glan o rayeste pral i tseli phoub, oun venn kanna vin.”

⁶ I kale graya djan ap i servi rig, i parne graya djan ap i rig, kay o kham tele djal, oun i kalo-parne graya djan ap i čači rig.

⁷ Kol zorele graya van sik vin, te djan le an i themma trouyel. Oun o bolepaskro penas lenge: “Djan koy oun dikenn t'men trouyel ap i phoub!” Oun yon djan an i themma trouyel.

⁸ Palle das o bolepaskro gole ap mande: “Kol graya, kay djan ap o servo drom, hoy djal an o them Babilonia, kolla kran, hoy o baro Devel kote kamas te krell.”

I stadi dran roup oun sonakay i baro rashayeske Yeshoua

⁹ O baro Devel penas mange:

^10-11 “Kol morsha, o Helday, o Tobiya oun o Yedaya, van khere dran o them Babilonia. Le lendar roup oun sonakay, oun dja kava dives an o kheer o morshestar Yosia, koleskro dad o Sefanya hi. Oun kre i stadi dran o roup oun o sonakay oun čip kova ap o shero o baro rashayestar Yeshoua, koleskro dad o Yozadak hi.

¹² Oun pen leske: Kova penell o baro Devel, ko ray pral o bolepen oun i phoub: Ko morsh, kay vell kharedo nevo rouk, vell baro ap peskri platsa. Oun yob krell o baro Debleske i nevo kheer.

¹³ Yob hi kova, kay krell o baro Debleske i kheer, oun yob vell sharedo har i baro ray. Yob hi beshdo ap peskri rayli beshepaskri oun hi o ray pral peskre menshende. Oun i rashay hi tardo ap peskri čači rig. Oun kol douy djivenn lačes khetne.

¹⁴ Oun o baro rayeskri stadi ačell an o baro Debleskro kheer, te venn kol morsha Helday, Tobiya, Yedaya oun Yosia gar bistedo.”

¹⁵ Dran dour themma venna kolla, kay krenn o baro Debleskro kheer. Oun palle dikenn t'mer, kay o baro Devel, ko ray pral o bolepen oun i phoub, kova hi, kay bičras man pash t'mende. Te krenn t'mer kova, hoy t'maro baro Devel t'menge penell, vella kova halauter yaake.