Zakarie 5 - O Debleskro Lab 2024 (Sinte-Manouche)

O shobto dikepen: O pre-kerdo liil

¹ Me dikom pale pre oun dikom i liil, hoy djas an i loufta.

² Oun o bolepaskro poučas mandar: “Hoy dikeh?” Me penom: “I liil, hoy djal an i loufta. Ko liil hi enya metarya lengsto oun star-te-paash metarya bourhlo.”

³ Oun yob penas ap mande: “Kova hi o praasepen, hoy djal vin pral o tselo them Youda. Kava liil penell: Hakeno, kay rhorhell, vell vin tradedo dran o them. Ninna hakeno, kay dell i rhorheno sovel, vell krik lino.

⁴ O baro Devel, ko ray pral o bolepen oun i phoub, penell, ko praasepen te vell pral o čorepaskro kheer oun an o kheer kolestar, kay dell pes i rhorheno sovel an o lab o baro Deblestar. Ko liil ačell an lengre khera, oun rhal len pre, ninna lengro kasht oun lengre barra.”

O eftato dikepen: I djouvel an i korba

⁵ Oun ko bolepaskro, kay mantsa rakrell, vas glan oun penas ap mande: “Dik! Hoy vell kote?”

⁶ Oun me poučom: “Hoy hi kova?” Yob penas: “Kova hi i korba, hoy kote vin vell. Kay korba hi o čilačepen o tselo themestar.”

⁷ Pral ap koy korba his i pharo saster, te čakrell lo koy korba. Oun ko saster hadas pes. Oun koy his i djouvel, beshdo an koy korba.

⁸ Oun o bolepaskro penas: “Koya hi o čilačepen.” Oun yob das lake i ladini, te perell li pale an i korba, oun vitsras o saster pale ap i korba.

⁹ Oun me dikom pre oun dikom douy djouvyen, kay van pash mande. Kolen his moussya har kol bare čirkle, hoy kharenn storke. Oun o dourho djas an lengre moussya oun tradas len glan. Oun kal djouvya hidjran koy korba mank i phoub oun o bolepen krik.

¹⁰ Oun me penom ap o bolepaskro, kay mantsa rakrell: “Kay hidjrenn le koy korba?”

¹¹ Yob penas: “An o them Shinar, te vell lake kote i kheer kerdo. Kote vell koy korba pre tardo oun an-mangedo.”